ការរុករកយន្ដហោះបាត់ខ្លួន ដែលត្រូវបានគេកំណត់ជាចុងក្រោយ ថាបានធ្លាក់នៅក្នុងលំហខាងត្បូង នៃមហា​សមុទ្រ​ឥណ្ឌានោះ បានត្រូវធ្វើឡើងវិញនៅព្រឹកថ្ងៃពុធ ទី២៦ ខែមីនានេះ បន្ទាប់ពីបានផ្អាកកាលពីថ្ងៃអង្គារម្សិលម៉ិញ ដោយ​សារតែធាតុអាកាសនៅកណ្ដាលសមុទ្រ មិនអំណោយផល និងមានរលកធំៗ។

រលកធំៗ នៅក្នុងមហាសមុទ្រឥណ្ឌា ថតដោយអ្នករុករករបស់ប្រទេសអូស្ត្រាលី។ (រូបថតផ្ដិតចេញពីវីដេអូ)

បាត់យន្ដហោះ - បេសកកម្មស្វែងរកយន្ដហោះ ដែលគេសង្ស័យថា បានធ្លាក់ក្នុងមហាសមុទ្រឥណ្ឌាខាងត្បូងនោះ បានចាប់បន្តធ្វើឡើងវិញនៅព្រឹកថ្ងៃពុធ ទី២៦ ខែមីនានេះ ដោយសារតែអាកាសធាតុមានភាពល្អប្រសើរជាងមុន។ បេសកកម្មនេះ បានផ្អាក​កាលពីថ្ងៃ​អង្គារ​ទី២៥ ម្សិលម៉ិញ នៅក្នុងរយៈពេលយ៉ាងតិច ២៤ម៉ោង ដោយសារតែ​នៅក្នុង​តំបន់រុករក ស្ថានភាព​ឧត្តុនិយម​ដែល​មាន​ទាំងខ្យល់ព្យុះ និងភ្លៀងធ្លាក់ដ៏ខ្លាំងក្លានោះផង បានធ្វើឲ្យក្រុមអ្នកស្រាវជ្រាវ​យន្ដហោះ វាយតម្លៃ​ថាអាចនឹងមាន​គ្រោះថ្នាក់ ដល់ពួកគេ។

ក្នុងថ្ងៃនេះដែរ នាវាជាច្រើនគ្រឿង និងយន្ដហោះមិនតិចជាង ១២គ្រឿង (ក្នុងនោះមាន៧ ជាយន្ដហោះកងទ័ព) របស់​ប្រទេសចិន នឹងធ្វើដំណើរទៅដល់តំបន់រុករក ដើម្បីស្វែងរកវត្ថុពីរដែលត្រូវបានថតឆ្លុះរកឃើញដោយ ប្រព័ន្ធ​ផ្កាយ​រណបរបស់ខ្លួន ដែលបើតាមពួកគេ អាចជាបំណែករបស់យន្ដហោះ ប៊ូអ៊ីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ បាត់ខ្លួនតាំងពីថ្ងៃទី៨ ខែមីនា នៅពេលដែលយន្ដហោះនេះ បានបម្រើសេវាកម្មជើងហោះហើរ MH370 ភ្ជាប់រដ្ឋធានីកូឡាឡំពួរ ឆ្ពោះទៅកាន់រដ្ឋធានីប៉េកាំង។ យន្ដហោះដឹកអ្នកដំណើរនេះ មានផ្ទុកអ្នកដំណើរ និង​អ្នកបម្រើការនៅលើយន្ដហោះ ចំនួន២៣៩នាក់ ក្នុងនោះ១៥៣នាក់ ជាជនជាតិចិន។

យ៉ាងណាក៏ដោយ ក៏ក្រុមអ្នកស្រាវជ្រាវ បានកំណត់រួចហើយថា ត្រូវតែស្វែងរកវត្ថុដែលពួកគេឆ្លុះឃើញទាំងនេះ ដើម្បីដឹងពីអត្តសញ្ញាណរបស់វា។ ប៉ុន្តែនាវា HMAS Success របស់ប្រទេសអូស្ត្រាលី ដែលបាន​ធ្វើដំណើ​រជិត​ទៅ​ដល់តំបន់រុករកទៅហើយ នៅថ្ងៃអង្គារម្សិលម៉ិញ តែត្រូវបានផ្អាកដំណើរទៅវិញ ដោយហេតុថាបានជួបនូវរលកធំៗ កំពស់ខ្ពស់ជាង៤ម៉ែត្រ។

អ្នកជំនាញជាច្រើនបានថ្លែងបញ្ជាក់ថា តំបន់ដែលគេត្រូវទៅធ្វើការស្វែងរកនោះ មានចម្ងាយឆ្ងាយដាច់​សន្លឹម​ពីដី​គោក ហើយមិនសូវមាននាវាបើកកាត់ច្រើនឡើយ។ ជាពិសេស បំណែកដែលអាចបណ្ដាលពីគ្រោះលិចនាវា ឬ​មាន​កុងទើន័រធ្លាក់ចូលទឹកនោះទៀតសោធ ក៏កាន់តែកម្រណាស់ដែរ៕

វីដេអូបង្ហាញពីរលកធំៗ គួរឲ្យខ្លាចនៅមហាសមុទ្រឥណ្ឌា៖

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៥ មីនា ២០១៤