រាល់ការចចារទាំងអស់តែងតែបិទទ្វារ មិនឲ្យអ្នកណាម្នាក់​បានដឹង​ ពីលទ្ធផលអ្វីឲ្យច្បាស់លាស់ឡើយ រវាងគណបក្ស​ប្រជាជនកម្ពុជា និងគណបក្សសង្គ្រោះជាតិ។ នេះជាបន្ទូលរិះគន់របស់ទ្រង់ រណឬទ្ធិ កាលពីថ្ងៃទី១៦ ខែមីនាកន្លងមក នៅ​សណ្ឋាគារសាន់វ៉េ។ មិនត្រឹមតែប៉ុណ្ណោះ សម្ដេចក្រុមព្រះអង្គនេះ បានបង្ហាញជំហរ ចង់ឲ្យគណបក្ស​សង្គ្រោះ​ជាតិ ចូល​ប្រជុំ​ក្នុង​រដ្ឋសភា នោះទើបជាដំណោះស្រាយពិតប្រាកដ លើបញ្ហានយោបាយ និងការលើកយកប្រយោជន៍​រាស្រ្ត​ជាធំ។

សម្ដេចក្រុមព្រះ នរោត្ដម រណឬទ្ធិ នៅសណ្ឋាគារសាន់វេ ថ្ងៃទី១៦ខែមីនា ឆ្នាំ២០១៤។ (រូបថត MONOROOM.info/ Channita)

នយោបាយកម្ពុជា - អ្នកវិភាគនយោបាយឯករាជ្យ លោក សុខ ទូច បាន​លើក​ឡើង​ក្នុងបណ្តាញសង្គមហ្វេសប៊ូក ចាត់ទុកការអំពាវនាវរបស់ទ្រង់ រណ ឬទ្ធិ ស្នើឲ្យគណបក្សប្រឆាំងចូលរដ្ឋសភានោះ ថាហាក់​ដូចមានបំណង​ចង់​បង្ខំ​ឲ្យគណបក្សប្រឆាំងមួយនេះ ដើរតាមលំអានចាស់របស់ទ្រង់ដែលបានទទួល«បរាជ័យ» ក្នុង​ឆាកនយោបាយនេះ ដែលមានយ៉ាងហោចណាស់ចំនួនបីលើកមកហើយនោះ។ លោកបានបញ្ជាក់​យ៉ាងដូច្នេះ​ថា «សម្តេចក្រុមព្រះ ផ្តល់​យោបល់ឲ្យគណបក្សង្រ្គោះជាតិចូលសភា។ បទពិសោធន៍នេះព្រះអង្អបានទទួលចំនួនបីដងហើយ ចុងក្រោយ​ព្រះអង្គ​យាង​ទៅ (ប្រទេស) ម៉ាឡេស៊ី។»

មតិជាច្រើន បានចាប់អារម្ភថាហេតុអ្វីក៏ព្រះអង្គម្ចាស់ នរោត្ដម រណឬទ្ធិ ចង់ឲ្យគណបក្សសង្គ្រោះជាតិ ចូលប្រជុំក្នុង​រដ្ឋសភា ទាំងមិនមានកិច្ចព្រមព្រៀងអ្វីយ៉ាងដូចនេះ? ទាក់ទងនឹងការលើកឡើងខាងលើ អ្នកតាមដានស្ថានការ​នយោបាយនៅកម្ពុជា តាមរយៈទំព័រហ្វេសប៊ុកមួយឈ្មោះថា ឈរ រ៉ាណ បានបញ្ចេញនូវចំណាប់អារម្មណ៍​ថា នេះជា​កលល្បិចមួយរបស់ប្រទេសវៀតណាម និងអ្នកដឹកនាំខ្មែរដែលស្និតទៅនឹងប្រទេសមួយនេះ ក្នុងបំណងបង្ករភាព​ចលាចល ប្របូលច្របល់ក្នុងឆាកនយោបាយកម្ពុជា។

ទំព័ររបស់ ឈរ រ៉ាណ ខាងលើបានបន្ថែមថា ជម្លោះលើកនេះមិនមានជាបញ្ហារវាងរាស្រ្ត និងរាស្រ្ត​ដូច​ពេលមុនឡើយ តែជាបញ្ហារវាងខ្សែរាជវង្សនិងប្រជារាស្រ្ត។ លោកបានលើកឡើងដូច្នេះថា «ភាពច្របល់ក្នុងសៃវៀន នយោបាយខ្មែរ ដោយបង្កជំលោះចេញមុខរវាងពួកស្តេច និងមហាជនខ្មែរក្នុងគោលដៅចំបង បន្ទាបឥទ្ធិពល​ពួក​ស្តេច និងបន្ថយ​កំលាំង​មហាជនខ្មែរ ដែលមានគណបក្សសង្គ្រោះជាតិជាជំហរ និងអាចឲ្យមហាជនខ្មែរយល់​ច្រលំ​យួន និងពួកកញ្ជះ​យួនល្អ។»

ទោះជាយ៉ាងណាក៏ដោយ អ្នកលេងបណ្តាញសង្គមម្នាក់ទៀត ដែលមានគណនីរបស់ខ្លួនឈ្មោះ ចាន់ សុភាព (Sopheap Chan) បានលើកឡើងយ៉ាងខ្លីថា «សង្ឃឹមថាព្រះអង្គរមិនមែនជាឈ្នាន់គេ ឫក៏ព្រះអង្គរនិយាយ​ដើម្បី​លួង​គេដើម្បីយកអំណាច នៅកន្លែងណាមួយនៅលើកក្រោយ?» ឯម្ចាស់គណនីម្នាក់ទៀតឈ្មោះ ប៉ុក លក្ស្មី (Leaksmy Pok) បានបញ្ជាក់ជាចុងក្រោយថា «មនុស្សដែលបរាជ័យជារៀងរហូតនោះ ផ្តល់ឱវាទដល់អ្នកដទៃ​ពិបាកគេជឿ​ណាស់ !»។

បើយោងតាមគេហទំព័រហ្វេសប៊ុក ដែលដាក់ឈ្មោះលោកនាយករដ្ឋមន្រ្តីហ៊ុន សែន វិញ ហាក់ដូចជាឆ្លើយស្របគ្នា​ជាមួយនឹងទ្រង់ រណឬទ្ធិ យ៉ាងដូច្នេះដែរថា «ការចរចារអាចបន្តបាន ក្រោយពីសមាជិកសមាជិការ​បក្សប្រឆាំង​បាន​ចូលស្បថទទួលតំណែងជាផ្លូវការ ពីរដ្ឋសភារួចរាល់ហើយ។» ជាមួយនិងចំលើយនេះ ទំព័ត៌ហ្វេសប៊ូកមួយនេះ ក៏​បានទាញនូវអំណះអំណាងពីប្រជាពលរដ្ឋមួយចំនួន ដែលគាំទ្រលើគណបក្សប្រជាជនកម្ពុជាថា ពួកគេបានគាំទ្រឲ្យ​«បញ្ឈប់»​ការចរចារទាំងស្រុងជាមួយបក្សប្រឆាំង។ ទំព័រមួយនេះ ក៏បានបញ្ជាក់ពីជំហររបស់ខ្លួន ក្នុងការទទួល​យក​សំណើររបស់ប្រជាពលរដ្ឋយ៉ាងដូច្នេះថា «ក្នុងនាមគណបក្សឈ្នះឆ្នោត ដែលកំពុងដឹកនាំរាជរដ្ឋាភិបាល គណបក្ស​ប្រជាជននឹងយកមតិប្រជាពលរដ្ឋមកពិចារណា»។

ដោយឡែក បណ្ដាទំព័រ តាមបណ្តាញសង្គមនៃថ្នាក់ដឹកនាំកំពូល របស់គណបក្សសង្គ្រោះជាតិ មិនមានការលើក​ឡើងប្រតិកម្មទៅនឹងទ្រង់ រណឬទ្ធិ នោះទេ។ តែតាមការប្រកាសជាផ្លូវការដោយលោក សុន ឆ័យ នៅវិមានព្រឹទ្ធិសភា ក្រោយជំនួបលើកទីបួន នៅថ្ងៃទី១៧ ខែមីនានេះថា គណបក្សសង្គ្រោះជាតិនឹងមិនចូលរដ្ឋសភាឡើយ ដរាបណា​មិនមានការរៀបចំឲ្យមានការបោះឆ្នោតឡើងវិញមុនអាណត្តិ និង គ.ជ.ប មិនត្រូវបានផ្លាស់ប្តូរ ជាមួយនឹងការបញ្ជូល​ទៅជាស្ថាប័នធម្មនុញ្ញនោះ។

អ្នកវិភាគឯករាជ្យដដែល លោកសុខ ទូច បានបន្ថែមយោបល់ទៀតថា «ការចូលសភារបស់គណបក្ស​សង្រ្គោះជាតិ​ត្រូវតែចូល ប៉ុន្តែត្រូវតែមានលក្ខខ័ណ្ឌឲ្យបានច្បាស់លាស់ជាមុនសិន។ បើមិនដូចនោះទេ ច្បាស់ជាដូចសម្តេច​ក្រុម​ព្រះ​ បីដង កន្លងមក៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៨ មីនា ២០១៤