បទ​យក​ការណ៍៖ គម្រោង​ចិន ធ្វើ​ឲ្យ​រាស្ត្រ​«យំ​អស់​ដី» នៅ​ខេត្ត​កោះកុង

ផ្ទះធ្វើពីឈើប្រក់អំពីសង្ក័សីព័ណក្រហម តំរៀបគ្នាជាជួរនៅសងខាងផ្លូវ និងនៅមួយចំនួនលាក់ខ្លួនកណ្តាលព្រៃ នៅ​ក្នុងស្រុកចំនួនពីរនៃខេត្តកោះកុង គឺស្រុកបុទុមសាគរ និងគីរីសាគរ ត្រូវបានកសាងឡើងដោយក្រុមហ៊ុនរបស់ចិន យូនៀនដេវឺលប្បមេនគ្រុប ដែលវិនិយោគលើវិស័យឧស្សាហកម្មទេសចរណ៍ និងទីក្រុងរណប។ គម្រោងនេះបាន​ធ្វើ​ឲ្យប៉ះពាល់ ដល់ប្រជាពលរដ្ឋចំនួន១១៤៣គ្រួសារ ត្រូវបានជម្លៀសចេញពីទីតាំងចាស់របស់ខ្លួន។
Loading...
  • ដោយ: លោក គិន
  • កែប្រែចុងក្រោយ: March 23, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ផ្ទះធ្វើពីឈើប្រក់អំពីសង្ក័សីព័ណក្រហម តំរៀបគ្នាជាជួរនៅសងខាងផ្លូវ និងនៅមួយចំនួនលាក់ខ្លួនកណ្តាលព្រៃ នៅ​ក្នុងស្រុកចំនួនពីរនៃខេត្តកោះកុង គឺស្រុកបុទុមសាគរ និងគីរីសាគរ ត្រូវបានកសាងឡើងដោយក្រុមហ៊ុនរបស់ចិន យូនៀនដេវឺលប្បមេនគ្រុប ដែលវិនិយោគលើវិស័យឧស្សាហកម្មទេសចរណ៍ និងទីក្រុងរណប។ គម្រោងនេះបាន​ធ្វើ​ឲ្យប៉ះពាល់ ដល់ប្រជាពលរដ្ឋចំនួន១១៤៣គ្រួសារ ត្រូវបានជម្លៀសចេញពីទីតាំងចាស់របស់ខ្លួន។


ទិដ្ឋភាពមួយនៃស្រុកបុទុមសាគរ ខេត្តកោះកុង។ (រូបថត ខេត្តកោះកុង)

របាយការណ៍ - សកម្មភាពនៃគម្រោងអភិវឌ្ឍន៍ ដែលបានកំពុងសាងសង់សណ្ឋាគារលំដាប់ផ្កាយប្រាំ និងទីលាន​វាយកូនគោល បានសាងសង់រួចបានចំនួន៩រន្ធ ដែលគ្រោងនឹងដាក់ឲ្យភ្ញៀវចូលលេងកំសាន្ត នៅក្នុងឆ្នាំក្រោយនេះ នៅក្នុងខែកុម្ភៈ បុគ្គលិកក្រុមហ៊ុនបានឈូស បំផ្លាញនិងដុតផ្ទះសម្បែងរបស់ប្រជាពលរដ្ឋ អស់ចំនួន៤៥ផ្ទះដើម្បី​ជា​ការបង្ខំឲ្យពួកគាត់ ទទួលយកសំណងទៅរស់នៅទីតាំងថ្មី។

លោក ផាន់ អេង អាយុ ៥៧ ឆ្នាំ ដែលជាជនរងគ្រោះ ដោយសារក្រុមហ៊ុនបានឈូសបំផ្លាញដីចំការ ពីកេរ្តិ៍ដូនតា​របស់​គាត់ ដើម្បីបំបាត់ភស្តុតាងហើយកំពុងបោះតង់រស់នៅក្នុងគំនរភេះ ដែលក្រុមហ៊ុនបានដុតផ្ទះរបស់គាត់ បានថ្លែង​ឲ្យ​ដឹងថា ពលរដ្ឋបានយល់ព្រមមករស់នៅខាងភូមិថ្មី ប៉ុន្តែក្រុមហ៊ុនមិនទាន់បានវាស់ដីចំការឲ្យ ដូច្នេះហើយបានត្រឡប់​ទៅធ្វើចំការនៅកន្លែងដីចាស់របស់ខ្លួនវិញ។ លោកបានរៀបរាប់ទៀតថា៖ «ប្រសិនក្រុមហ៊ុនដោះស្រាយ​តាម​គោល​ការណ៍អន្តរក្រសួងនោះ ពុំមានបញ្ហាអ្វីចោទនោះទេ តែក្រុមហ៊ុនធ្វើបំពាន ពុំបានផ្តល់សំណងដូចសន្យានោះទេ»។

លោកបានថ្លែងបន្តទៀតថា ខាងក្រុមហ៊ុនដែលចូលមកដុតបំផ្លាញផ្ទះប្រជាពលរដ្ឋ ដោយមានតំណាងក្រុមហ៊ុនចិន សន្តិសុខឯកជនរបស់ក្រុមហ៊ុន និងកំលាំងទាហានពុំបានស្តាប់អ្វីទាំងអស់ ក្រៅពីពាក្យបញ្ជាឲ្យដុតផ្ទះ បើទោះបីជា​ពលរដ្ឋបង្ហាញគេ ​នូវលិខិតរបស់ទីស្តីការគណៈរដ្ឋមន្ត្រី ឲ្យអាជ្ញាធរជួយអន្តរាគមន៍ក៏ដោយ។ លោកបានថ្លែងថា៖ «គេ​មិនស្តាប់យើងអ្វីទាំងអស់។ គេមកអភិវឌ្ឍន៍ក្រុមហ៊ុនរបស់គេ តែយើងជាម្ចាស់ដី បែរក្លាយជាជនរងគ្រោះ រកតែដី​ធ្វើ​ចំការមិនមាន»។

អង្គុយនៅក្រោមដើមចន្ទី ដែលមានទូកនៅខាងមុខ លោក ភិន វណ្ណៈ ផ្ទះរបស់គាត់ ត្រូវបានក្រុមហ៊ុនដុតដើម្បីគំរាម​ឲ្យយកសំណងនោះ បានថ្លែងឲ្យដឹងថា លោកបានចាប់ផ្តើមរស់នៅលើទូក ជាមួយគ្រួសាររបស់គាត់ បន្ទាប់ពី​ក្រុមហ៊ុន​បានផុតបំផ្លាញផ្ទះរបស់គាត់។ លោកបានថ្លែងឲ្យដឹងទៀតថា៖ «ខ្ញុំរស់នៅលើទូក វាប្រសើរជាងទៅយកផ្ទះ​នៅភូមិថ្មី ពីព្រោះទៅរស់នៅទីនោះដូចទៅស្លាប់អញ្ចឹង យើងគ្មានមុខរបរនោះទេ បើយើងនៅលើទូក យើងអាច​នេសាទ​ចិញ្ចឹមគ្រួសារបាន»។

លោកបានសម្ដែងទុក្ខកង្វល់ថា ឥឡូវនេះពលរដ្ឋដែលជាម្ចាស់ដីគ្មានដីនៅទេ ប៉ុន្តែក្រុមហ៊ុនចិន បែរជាគេមក​យកដី​យើង​រាប់ម៉ឺនហិកតាហើយ នៅពេលដែលគេចុះមកដុតផ្ទះពលរដ្ឋយើង បែរជាមានទាហ៊ានប៉ូលីសការពារ ដើម្បីគំរាម​ពលរដ្ឋទៀត។ លោកបានថ្លែងថា៖ «តើយុត្តិធម៌នៅឯណាយើងរស់នៅតាំងពីសម័យសង្គមរាស្ត្រនិយម»។

ជាការឆ្លើយតបនោះ លោក ង៉ូ ធៀនឡុង តំណាងក្រុមហ៊ុនយូនៀនដេវឺលប្បមេនគ្រុប បានថ្លែងឲ្យដឹងថា អ្វីដែល​ក្រុមហ៊ុនរបស់លោកធ្វើ គឺទៅតាម«គោលនយោបាយ»របស់រដ្ឋាភិបាល គឺពលរដ្ឋដែលរស់នៅមុនឆ្នាំ ១៩៩៣ ទទួល​បានសំណង៨០០០ដុល្លារសម្រាប់ដីមួយហិកតា និងមានសំណងជាច្រើនទៀតដូចជា ៦០០០ដុល្លារក្នុងមួយហិកតា ៤០០ដុល្លារក្នុងមួយហកិតា និង ២០០០ដុល្លារក្នុងមួយហិកតា រហូតដល់ ២០០ដុល្លារ។ រីឯការផ្តល់គោល​នយោបាយ​ផ្ទះគឺ៥០ម៉ែត្រគុណនិង ១០០ម៉ែត្រ និងដីចំការ២ហិកតា ប៉ុន្តែយោងទៅតាមសមាជិកគ្រួសារ បើមានសមាជិក​ច្រើន​គឺអាចទទួលបានដី៥ហិកតា។

លោកបានពន្យល់ដូច្នេះថា៖ «ពលរដ្ឋដែលទៅរស់នៅបោះតង់ហើយក្រុមហ៊ុនដុតចោល ហើយខ្លះទៅរស់នៅ​លើ​ទូក​ពលរដ្ឋនោះ តាមពិតបានទទួលយកសំណង់សព្វគ្រប់អស់ហើយពីក្រុមហ៊ុនយើង យើងមិនដែលដុតផ្ទះគេទេ​យើង​ដុតតង់។ ហើយយើងក៏ពុំដែលបញ្ឈប់អ្នកនេសាទមិនឲ្យនេសាទដែរ យើងថែមទាំងអនុញ្ញាតិឲ្យពួកគាត់​បោះ​តង់​ស្នាក់នៅប៉ុណ្ណោះអាសន្ន គឺនៅពេលថ្ងៃគាត់ទៅនេសាទ ពេលយប់អាចស្នាក់នៅកន្លែងតង់នោះ ប៉ុន្តែពួកគេត្រូវ​តែ​ធ្វើ​កិច្ចសន្យា​ជាមួយអាជ្ញាធរនិងក្រុមហ៊ុនថា ត្រូវធ្វើការរុះរើនៅពេលក្រុមហ៊ុនត្រូវការដើម្បីការវិនិយោគ ប៉ុន្តែពួកគាត់​នោះមិនមែនធ្វើតង់ទេពួកគាត់ព្យាយាមធ្វើផ្ទះ។»។

លោកបានថ្លែងឲ្យដឹងទៀតថា គ្មានក្រុមហ៊ុនណាជួយប្រជាជនដូចក្រុមហ៊ុនលោកទេ គឺ ធ្វើផ្ទះឲ្យពួកគាត់ កសាង​សាលារៀន​មួយខ្នងដែលមានប្រាំបន្ទប់ វត្ត ផ្សារ ដើម្បីឲ្យពួកគាត់រកស៊ី តាមពិតសំណងទាំងនោះ គឺជា«បន្ទុក»របស់​រដ្ឋាភិបាលទេ ពីព្រោះក្រុមហ៊ុនជួលដីពីរដ្ឋាភិបាល។ គម្រោងវិនិយោគរបស់លោកចំណាយ ដើម្បីទុន៣៨ពាន់​លាន​ដុល្លារ​ដើម្បីវិនិយោគទីក្រុងរណប សាងសងសណ្ឋាគារផ្កាយប្រាំ២ ទីលានវាយកូនគោល២ ទីក្រុងរណប អាគារ​ពាណិជ្ជកម្ម តំបន់ឧស្សាហកម្ម កាស៊ីណូ ព្រលានយន្តហោះអន្តរជាតិ និងកំពុងផែរ ដោយកែប្រែកន្លែងនេះ ឲ្យក្លាយ​ទៅ​ជាតំបន់ទេសចរណ៍ល្អបំផុត នៅអាស៊ីអាគ្នេយ៍នេះ។ លោក ង៉ូ ធៀនឡុង បានបកស្រាយឲ្យដឹងទៀតថា ៖ «រដ្ឋ​ដែលប៉ះពាល់ជាមួយគម្រោងវិនិយោគ ត្រូវបានបញ្ចប់នូវការទូទាត់សំណងអស់ហើយ ចំពោះប្រជាពលរដ្ឋរងគ្រោះ ១១៤៣គ្រួសារ នៅសល់តែ១៨ គ្រួសារប៉ុណ្ណោះ ដែលពុំទាន់បានដោះស្រាយគោលនយោបាយសំណង»។

ទោះជាមានការអះអាង អំពីការវិនិយោគ និងផ្តល់សំណងសមរម្យយ៉ាងណាក៏ដោយ បើយោងទៅតាមរបាយការណ៍ អង្កេតរបស់គណៈកម្មាធិការប្រព្រឹត្តិកម្ម នៃអង្គការសមាគមការពារសិទ្ធិមនុស្សកម្ពុជា បានរកឃើញថា ប្រជាជន​សរុបចំនួន១១៤៣គ្រួសារស្ថិតក្នុងឃុំចំនួន៥នៃស្រុកចំនួនពីរគឺស្រុកស្រុកគិរីសាគរនិងស្រុកបុទុមសារគរ ដែលរស់​នៅក្នុងទស្សវត្ស៦០និង៨០ និងវត្តចំនួនបី និងសាលាបឋមសិក្សារមួយ បានរងនូវផល់ប៉ះពាល់ដោយ​ត្រូវផ្លាស់ប្តូរ​ទី​តាំង​ ចេញពីតំបន់នោះ។ ប្រជាពលរដ្ឋចំនួន៨០០គ្រួសារ ស្មើរនិង៧១ភាគរយ បាន«បង្ខំចិត្ត»ផ្តិតមេដៃ យល់ព្រម ទៅ​រស់នៅក្នុងទីតាំងថ្មី។ ចំនែកប្រជាពលរដ្ឋមិនព្រមយកសំណង៣៤៣គ្រួសារ ស្មើរនិង២៩ភាគរយ បានសូមឲ្យ​រដ្ឋាភិបាលឆ្វៀលដីរបស់គាត់ ចេញពីក្រុមហ៊ុន។ ក្នុងករណីមិនអាចឆ្វៀលបាន​សុំឲ្យមានដំណោះស្រាយ​សំណង​សមរម្យ។

នៅក្នុងរបាយការណ៍នោះ បានឲ្យដឹងទៀតថា ការតាំងលំនៅដ្ឋាននៅទីតាំងថ្មី គឺប្រជាពលរដ្ឋប្រមាណ៧០ភាគរយ ជាអ្នកប្រកបរបនេសាទ និង១០ភាគរយ ជាអ្នកចំការ បានវិលត្រឡប់ទៅទីតាំងចាស់របស់ខ្លួនវិញ ដើម្បីប្រកបរបរជា​អ្នកនេសាទ និងប្រមូលផលដំណាំ។ មានតែប្រជាពលរដ្ឋ១ភាគរយប៉ុណ្ណោះ ដែលមានមុខរបរលក់ចាប់ហួយ​រឺគ្រឿង​ឧបភោគបរិភោគ មានជីវភាពល្អប្រសើរជាងមុន។

ជាការឆ្លើយតប លោក ង៉ូ ធៀនឡុង បានថ្លែងឲ្យដឹងថា ចំពោះរបាយការណ៍ដែលថា ពលរដ្ឋដែលបានទៅទីតាំងថ្មី​ ហើយចង់ត្រឡប់មកទីតាំងចាស់វិញនោះគឺមិនពិត ព្រោះខាងក្រុមហ៊ុនបានចុះទៅជូបពលរដ្ឋទាំងនោះ ហើយ​ក្រុមហ៊ុន ក៏ពុំបានចាប់បង្ខំពលរដ្ឋណាម្នាក់ ឲ្យផ្តិតមេដៃដើម្បីយល់ព្រម​ក្នុងការផ្លាស់ប្តូរទៅទីតាំងថ្មីនោះទេ គឺពួក​គាត់​ស្ម័គ្រចិត្តទៅដោយខ្លួនឯង ហើយក្រុមហ៊ុនក៏មានឯកសារដើម្បីបង្ហាញដែរ។

រដ្ឋាភិបាលកម្ពុជាបានចុះហត្ថលេខា លើកិច្ចសន្យា ជាមួយក្រុមហ៊ុន​យូនៀនដេវឺលប្បមេនគ្រុប ជួលដី​សម្រាប់​រយៈ​ពេល​«៩៩ ឆ្នាំ» នៅថ្ងៃទី ៩ ខែឧសភា ឆ្នាំ២០០៨ សម្រាប់ការសាងសង់តំបន់អភិវឌ្ឍន៍ពាណិជ្ជកម្ម និងរម្មណីយដ្ឋាន​ទេសចរណ៍ដើម្បីទាក់ទាញភ្ញៀវទេសចរណ៍ និងការវិនិយោគបន្ថែមទៀតលើផ្ទៃដីទំហំ ៣៦០០០ហិកតា ក្នុងស្រុក​គិរីសាគរ និងស្រុកបុទុមសារគរ។ ហើយនៅខែសីហា ឆ្នាំ ២០១១ រាជរដ្ឋាភិបាលបានចេញអនុក្រិត្យ ស្តីពីការកំណត់​ផ្ទៃដីទំហំ ៩១០០ ហិកតាទៅជាតំបន់ប្រើប្រាស់ដោយចីរភាព និងបានផ្តល់ដីសម្បទានជាលើកទី២ ឲ្យទៅក្រុមហ៊ុន​នេះ​ ដើម្បីធ្វើអាងស្តុកទឹកនិងវារីអគ្គីសនី។ ហើយនៅក្នុងកិច្ចសន្យាបានអនុញ្ញាតិឲ្យក្រុមហ៊ុនកាប់ឆ្កាព្រៃឈើ ដើម្បី​អភិវឌ្ឍន៍ទីតាំងវិនិយោគតាមប្លង់មេ ប៉ុន្តែត្រូវឲ្យក្រុមហ៊ុនបង់សួយសារនិងបុព្វលាភ ចំពោះឈើដែល​មានតម្លៃ​សេដ្ឋកិច្ច​ដែលខ្លួនកាប់ប្រើប្រាស់រឺលក់។

បើតាមការអះអាងរបស់ លោក នាង បូរាទីណូ មន្ត្រីសម្របសម្រួលសមាគមអាដហុកបានឲ្យដឹងថា គ្រាន់តែនៅ​ដើម​ឆ្នាំ២០១៤នេះ ក្រុមហ៊ុនចិន បានដុតផ្ទះ និងរុះបំផ្លាញផ្ទះប្រជាពលរដ្ឋនៅស្រុកបទុមសាគរ អស់៤៥ខ្នង ដើម្បីបំបិទ​ភស្តុតាងសម្រាប់ពលរដ្ឋ ដែលរស់នៅក្នុងភូមិចាស់ ដែលពុំព្រមទទួលយកសំណង។ ដូច្នេះក្រុមហ៊ុននិងអាជ្ញាធរ​ត្រូវ​ធ្វើការផ្ទៀងផ្ទាត់ឡើងវិញ ចំពោះរបាយការណ៍ដែលថាមានពលរដ្ឋសរុបតែចំនួន១៨គ្រួសារ ដែលពុំព្រមទទួល​យក​សំណងនោះ។ លោកបានពន្យល់ថា៖ «នៅក្នុងដំណោះស្រាយជូនប្រជាពលរដ្ឋវិញ គឺខាងក្រុមហ៊ុនក៏ដូចជាអាជ្ញាធរ ពុំបានផ្តល់តម្លាភាពដល់ពលរដ្ឋទេ។ គឺគេធ្វើនៅមានការបិទបាំង ហើយប្រជាពលរដ្ឋមួយចំនួន ទទួលយក​សំណង​ទាំងភាពងងិតងងុល ក្រុមហ៊ុនពុំបានអនុវត្តតាមគោលការណ៍របស់រដ្ឋាភិបាលដូចជាផ្តល់សំណង ៨០០០ ដុល្លារ​ក្នុង​ដីមួយហិកតា រឺ ៦០០០ រឺក៏ ៤០០០ ដុល្លារនោះទេ»។

លោកបានថ្លែងឲ្យដឹងទៀតថា ពលរដ្ឋខ្លះគាត់ទទួលយកគោលការណ៍ក្រុមហ៊ុន ដោយសារតែមានការគំរាមកំហែង​រឺក៏បន្លំដោយគ្រាន់តែពលរដ្ឋយល់ព្រមផ្តិតមេដៃថា យល់ព្រមប្តូរលំនៅដ្ឋានរបស់ពួកគេ ក្រុមហ៊ុនបានចុះមកថត​ផ្ទះ​ពលរដ្ឋហើយធ្វើការរុះរើផ្ទះរបស់ពួកគាត់តែម្តងដោយពុំបានផ្តល់អ្វីទាំងអស់ ហើយពលរដ្ឋភាគច្រើន ពុំបានទទួល​សំណងដីចំការ ដែលជាប្រភពចំណូលដើម្បីទ្រទ្រង់គ្រួសារនោះទេ៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី២៣ មីនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...