អតីតអ្នកបុរីកីឡាជាង១៤០ គ្រួសារ ដែលកំពុងរស់នៅតំបន់ភ្នំបាត ក្នុងឃុំផ្សារដែក ស្រុកពញាឮ ខេត្តកណ្ដាលបាន​ប្រតិកម្ម ចំពោះតម្លៃអគ្គីសនីកម្ពុជា នឹងត្រូវភ្ជាប់ចូលក្នុងឃុំនេះមានតម្លៃខ្ពស់ ពី១០០ ទៅ១២០ ដុល្លាអាមេរិក ក្នុង​មួយ​គ្រួសារ។

មើលពីលើភ្នំព្រះរាជទ្រព្យ៖ សហគមន៍ភ្នំបាត ដែលសុទ្ធសឹងត្រូវជម្លៀសចេញពីរាជធានី យកទៅនៅទីនោះ។ (រូបថត ស្រុុកស្រែ)

សង្គម - ប្រជាសហគមន៍ភ្នំបាត ជាអតីតអ្នករស់នៅក្នុងតំបន់បុរីកីឡា ដែលត្រូវបានបង្ខំឲ្យចេញពីលំនៅដ្ឋាន​ដោយ​អាជ្ញាធររាជធានីភ្នំពេញ ដើម្បី​យក​តំបន់នោះ ទៅ​ធ្វើ​ការអភិវឌ្ឍន៍តាមរយៈក្រុមហ៊ុនផានអ៊ីម៉ិច។ ក្នុងរយៈពេលជាង​ពីរឆ្នាំមកនេះ អាជ្ញាធររាជធានី​មិនបានយកចិត្តទុកដាក់ ទៅតាមការសន្យារបស់ខ្លួនឡើយ ពិសេសបញ្ហាបណ្តាញទឹក និងភ្លើង។ នេះជាការបញ្ជាក់​របស់អ្នកស្រី កែវ វុឌ្ឍី តំណាងសហគមន៍ភ្នំបាត។

អ្នកស្រី កែវ វុឌ្ឍី បានបញ្ជាក់ថា សព្វថ្ងៃនេះ ការរស់នៅក្នុងពេលរាត្រី របស់សហគមពឹងផ្អែកទាំងស្រុង ទៅលើភ្លើង​ចង្កៀងប្រេងកាត។ ជីវភាពរស់នៅទាំងរដាបរដួសគ្មានទឹក គ្មានភ្លើង និងគ្មានមុខរបរអ្វីអាចផ្គត់ផ្គង់​ជីវភាពបាន​ស្ថិតស្ថេរទេ រស់ព្រោះពឹងផ្អែកលើជំនួយសប្បុរសជន ឬអង្គការសង្គមស៊ីវិល។ អ្នកស្រីបន្ថែមថា ពលរដ្ឋទាំងអស់​នឹង​គ្មានលទ្ធភាពណាមួយ ដើម្បីភ្ជាប់បណ្តាញអគី្គសនីសម្រាប់មួយគ្រួសារ ដល់ទៅ១២០ដុល្លានោះឡើយ។

ស្រ្តីម្នាក់ទៀត ដែលកំពុងត្អូញត្អែរពីការរករបរចិញ្ចឹមជីវិត អ្នកស្រី វង្ស ចាន់ធី បានលើកឡើងថា ការភ្ជាប់នេះដំបូង​ឡើយ ត្រូវបានធានាដោយលោក ទូច ខន ជាអ្នករត់ការមួយចប់ក្នុងការភ្ជាប់បណ្តាញនេះ ឯប្រជាពលរដ្ឋចាំតែ​ប្រើ​ប្រាស់។ ក្រោយមកលោកក៏បានតម្រូវឲ្យប្រជាពលរដ្ឋមួយគ្រួសារបង់ថ្លៃសេវាភ្ជាប់នោះចំនួនពី១០០ដុល្លា ទៅ១២០ ដុល្លា។  អ្នកស្រីបានបង្ហាញនូវក្តីកង្វល់ ក្នុងការកំណត់តម្លៃភ្ជាប់បណ្តាញអគ្គីសនីនេះថា ដោយសារតែវាហួសពី​លទ្ធភាព​របស់​ពួកគាត់។

ទស្សនាវដ្តីមនោរម្យ.អាំងហ្វូ នៅមិនអាចសុំការបញ្ជាក់ពីលោក ទូច ខន ចំពោះការចោទប្រកាន់ខាងលើបាន​ទេ​ ក្នុង​ល្ងាចនេះ។

ឯមន្រ្តីអគ្គីសនីកម្ពុជាវិញទស្សនាវដ្តីមនោរម្យ.អាំងហ្វូ ក៏មិនអាចសុំការបកស្រាយពីបញ្ហានេះបានដែរ ដោយគាត់បាន​ឆ្លើយថា មិនអាចផ្តល់នូវចម្លើយពីករណីនេះឡើយ។

តំណាងសហគមដដែល អ្នកស្រី កែវ វុឌ្ឍី បានបន្ថែមថា ពលរដ្ឋ​ទាំង​អស់មិនសុខចិត្ត នឹងតម្លៃខ្ពស់​ក្នុងការភ្ជាប់​បណ្តាញ​អគ្គីសនីនេះ អ្នកស្រីបានទៅសុំការបញ្ជាក់ពី​តំណាងអគ្គីសនី​កម្ពុជា​ លើតម្លៃភ្លើងនេះ។ អ្នកស្រីបន្តថា មន្រ្តី​អគ្គីសនី​កម្ពុជារូបនោះបានប្រាប់ថា មិនមានតម្រូវឲ្យបង់ថ្លៃភ្ជាប់​បណ្តាញ​រហូតដល់ ១០០ ឬ១២០ដុល្លាអាមេរិកទេ។ មន្រ្តីនោះ​បន្តថា ក្នុងមួយគ្រួសារបង់ត្រឹមតែ ១៥២ ០០០រៀល និងត្រូវចំណាយបន្ថែម នូវខ្សែភ្លើងចាប់ពីបង្គោលមេ រហូតដល់ផ្ទះ​រាងៗខ្លួនប៉ុណ្ណោះ ចំពោះតម្លៃលើសពីនេះ​មិន​ទទួល​យកទេ។ អ្នកស្រីក៏បានធ្វើតាមការណែនាំ របស់​មន្រ្តីរូបនោះ​​ដូច្នេះថា «កុំឲ្យគេធ្វើមេខ្យល់ ត្រូវតែទៅ​ភ្ជាប់​បណ្តាញដោយខ្លួនឯង។ ខាងអគ្គីសនីបង់ត្រឹមតែ ១៥២ ០០០ រៀល​ទេ ជាមួយនឹងការចំណាយ​បន្ថែមលើ​ខ្សែអូស​ចូល​ផ្ទះប៉ុណ្ណោះ»។

តំណាងសហគមន៍ខាងលើក៏បាន ស្នើដល់ប្រជាពលរដ្ឋទាំងអស់ ត្រូវទៅដាក់ពាក្យភ្ជាប់បណ្តាញអគ្គីសនី​ដោយ​ខ្លួន​ឯង ជាមួយនឹងការចំណាយត្រឹមតែ១៥២០០០រៀល។ អ្នកស្រីបន្ថែមថា ទោះត្រូវចំណាយតែ១៥២០០០រៀលក៏ដោយ សម្រាប់អតីតអ្នកបុរីកីឡាទាំងអស់ នៅតែជាបន្ទុកមួយយ៉ាងធ្ងន់ និងក៏ជាបញ្ហាប្រឈមដែរ ព្រោះពួកគាត់ភាគច្រើន​នៅតែគ្មានលទ្ធភាពក្នុងការភ្ជាប់បណ្តាញនេះដដែល។ «១៥២០០០រៀលនេះពិបាកដែរ មិនដឹងរកស៊ីអីផង។ បើបាន​គាត់(អគ្គីសនីកម្ពុជា) ចុះឲ្យក្រោមហ្នឹងប្រហែលជាអាច ព្រោះអី១៥២០០០រៀល សម្រាប់គ្រួសារភាគច្រើនមាន ដូច​ជាជនពិការ ចាស់ជរានៅតែផ្ទះជាដើម។ (…) ដឹងថាត្រូវគិតយ៉ាងម៉េចទេ ព្រោះនៅកណ្តាលព្រៃ៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៣ ខែមីនា ឆ្នាំ២០១៤