«យើងត្រូវតែតស៊ូ ដើម្បីសិទ្ធសេរីភាពរបស់ពួកយើង  ពួកយើងនឹងនៅតែបន្តការតស៊ូ លុះណាតែបានទទួលបាននូវ​យុត្តិធម៌» នេះជាសម្តីរបស់ស្រ្តីអ្នកភួមិបឹងកក់ បន្ទាប់ពីត្រូវបានដោះលែង នៅវេលាម៉ោងប្រមាណ២រសៀល ថ្ងៃ​ទី២១ ខែធ្នូ ឆ្នាំ២០១៤នេះ។

លោក រ៉ុង ឈុន និងស្ត្រីសកម្មជនមកពីសហគមន៍បឹងកក់ បន្ទាប់ពីត្រូវបានដោះលែងនៅរសៀលថ្ងៃទី២១ ខែមករា នេះ។ (រូបថត MONOROOM.info/ O.Vary)

សិទ្ធិមនុស្ស - មនុស្សដែលត្រូវបានចាប់ខ្លួនទាំង១១នាក់ កាលពីព្រឹកមិញនោះ ត្រូវបានដោះលែង​អោយមាន​សេរី​វិញហើយ។ បើទោះជាមានការចាប់ខ្លួនក៏ដោយ ក៏ក្រុមអ្នកតវ៉ានៅតែរក្សាជំហថាមិនចុះចាញ់។ នេះពាក្យសម្តីដែល​ស្រ្តីអ្នកភូមិបឹងកក់ទាំងនោះ បាននាំគ្នាស្រែកមុនគេ បន្ទាប់ត្រូវបានដោះលែង ទាំងមិនទាន់បានចេញពី របងស្នង​ការដ្ឋាន​រាជធានីភ្នំពេញ៖ «យើងត្រូវតែតស៊ូ ដើម្បីសិទ្ធសេរីភាពរបស់ពួក ពួកយើងនឹងនូវតែបន្តការតស៊ូ លុះណាតែ​បានទទួលបាននូវយុត្តិធម៌»។ ការស្រែកឡើងនេះ ដោយចង់បញ្ជាក់ប្រាប់ទៅដល់កងកម្លាំងសមត្ថកិច្ចថា មិនអាច​រារាំងការតស៊ូរកយុត្តិធម៌របស់ពួកគាត់បានឡើយ។

រីឯលោក រ៉ុង ឈុន បន្ទាប់ពីត្រូវបានដោះលែង ជាមួយស្រ្តីបឹងកក់ដែរនោះ​បានថ្លែងថា «យើងមិនបាន​ប្រព្រឹត្តិអំពើ​ខុសច្បាប់អីទេ មានតែអាជ្ញាធរទេដែលត្រូវខុសច្បាប់ ព្រោះនាំខ្លួនមនុស្សអត់មានដីការអីទាំងអស់ ហើយអ្វីដែល​អាជ្ញាធរ​កំពុងតែធ្វើនេះ កំពុងតែជំរុញអោយហ៊ុន សែន ធ្លាក់ទឹកហើយ»។ លោកអះអាងទៀតថា ​«ឥលូវនេះ​លិទ្ធិ​ប្រជាធិបតេយ្យ និងការគោរពសិទ្ធិមនុស្សនៅកម្ពុជា ធ្លាក់ចុះខ្លាំងណាស់ ដូច្នេះសូមអោយអន្តរជាតិ ជំរុញអោយ​ប្រជាពលរដ្ឋទទួលបាននូវការគោរពសិទ្ធិ នូវសិទ្ធិសេរីភាពក្នុងការប្រមូលផ្តុំសម្តែងមតិ និងការដាក់ញ្ញាត្តិ។»

ចំណែកអ្នកស្រី ទេព វណ្ណនី ក៏បានបង្ហាញនូវការតាំងចិត្តរបស់ខ្លួនដែរថា «អ្វីដែលយើងចង់បានគឺយុត្តិធម៌ ការភ័យ​ខ្លាចមិនអាចគម្រាមយើងបានទេ ការចាប់ខ្លួន សំលាប់ក៏មិនអាចសម្លុតបានដែរ»។

ខាងក្រោមនេះជាឃ្លាចំរៀងសង្ខេបខ្លី ដែលក្រុមអ្នកតវ៉ាច្រៀងនៅមុខស្នងការរាជធានីភ្នំពេញ បន្ទាប់ពីត្រូវបាន​ដោះលែងអោយមានសរីភាពឡើងវិញ។ ឃ្លាចំរៀងនេះ បានបញ្ជាក់ពីការប្តេជ្ញាចិត្តរបស់អ្នកសហគមន៍បឹងកក់ បើ​ទោះបីជាមានការមានគម្រាមកហែង ការចាប់ខ្លួនក៏ដោយ ក៏កម្លាំងសាមគ្គីតស៊ូ តវ៉ា នៅតែមានលុះណា​តែ​មាន​យុត្តិធម៌សំរាប់ពួកគេ។ មិនតែប៉ុណ្ណោះអត្ថន័យនៃចំរៀងនេះក៏ចង់បញ្ជាក់ដែរ ថាជ័យជំនះមិនដែលបាន​ដោយ​ងាយស្រួលឡើយ បើគ្មានការតស៊ូ និងការព្យាយាម។ ហើយបើនៅទីណាមានការជិះជាន់ ទីនោះត្រូវតែមាន​ការ​ក្រោកតវ៉ា៖

យើងខំប្រឹងធ្វើរាល់ថ្ងៃ នាយទុនកេងប្រវ័ញ្ចបំបាត់សិទ្ធិសេរី
ពួកយើងប្រុសស្រីឈឺចាប់ មកពួកយើងមករួមគ្នាតស៊ូ តស៊ូ
មកពួកយើងរូមកម្លាំង ទោះលំបាកយ៉ាងណា
ក៏យើងនៅតែប្រឆាំងកំហឹងឆេះងំក្នុងចិត្ត ត្រូវពុះពារទោះមាន..
ដើរជាក្បួនរួមគ្នា និងការតស៊ូគ្រប់ពេលវេលា សាមគ្គីគ្នាមិខ្លាច ...

សូមទស្សនាវីដេអូចំរៀង របស់ស្រ្តីអ្នកភូមិបឹងកក់ទាំងនោះខាងក្រោម៖

-----------------------------------------------
ដោយ៖ ក. ចាន់នីតា (ទំនាក់ទំនង៖[email protected])-ភ្នំពេញ ថ្ងៃទី ២១ ខែមករា ឆ្នាំ២០១៤