វេទិការ​មហាជន​ថ្នាក់​ជាតិ​ខេត្ត​រតនគីរី «រិត​ត្បិត»​មិន​ឲ្យ​លើក​ពី​បញ្ហា​ដី​ធ្លី?

វេទិការសាធារណៈមួយ ដែលបានរៀបចំឡើងដោយអាជ្ញាធរស្រុកវ៉ឺនសៃ ខេត្តរតនគីរី ត្រូវបានអ្នកសង្កេតការណ៍​អង្គការក្រៅរដ្ឋាភិបាលមួយ បានលើកឡើងថា ហាក់បីដូចជាមានការកំណត់នូវសិទ្ធិសេរីភាព ក្នុងការបញ្ចេញ​មតិ​ពាក់ព័ន្ធនឹងបញ្ហារំលោភដីធ្លី។
Loading...
  • ដោយ: អ៊ុម វ៉ារី
  • កែប្រែចុងក្រោយ: March 12, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

វេទិការសាធារណៈមួយ ដែលបានរៀបចំឡើងដោយអាជ្ញាធរស្រុកវ៉ឺនសៃ ខេត្តរតនគីរី ត្រូវបានអ្នកសង្កេតការណ៍​អង្គការក្រៅរដ្ឋាភិបាលមួយ បានលើកឡើងថា ហាក់បីដូចជាមានការកំណត់នូវសិទ្ធិសេរីភាព ក្នុងការបញ្ចេញ​មតិ​ពាក់ព័ន្ធនឹងបញ្ហារំលោភដីធ្លី។


វេទិកាមហាជននៅខេត្តរតនគិីរី ថ្ងៃទី១១ ខែមីនា ឆ្នាំ២០១៤។ (រូបថត ឆាយ ធី)

សិទ្ធិបញ្ចេញមតិ - ប្រជាពលរដ្ឋមកពីប្រាំភូមិ ជាង១០០គ្រួសារ ក្នុងឃុំភ្នំកុក ស្រុកវ៉ឺនសៃ ខេត្តរតនគិរី បាន​ចូលរួម​ក្នុងវេទិកាសាធារណៈពិគ្រោះ និងស្តាប់យោបល់ប្រជាពលរដ្ឋ ដែលបានរៀបចំឡើងដោយមន្រ្តីរដ្ឋាភិបាលថ្នាក់ខេត្ត ស្រុក ឃុំ ស្តីពីការកំណែទម្រង់សេវាសាធារណៈ និងភូមិឃុំមានសុវត្តិភាពកាលពីថ្ងៃទី១១ ខែមីនា ឆ្នាំ២០១៤ម្សិល​ម៉ិញនេះ។

វេទិកាបង្គ្រប់កិច្ច?

ក្នុងកិច្ចសម្ភាសជាមួយទស្សនាវដ្តី មនោរម្យ.អាំងហ្វូ ក្នុងថ្ងៃទី១២ ខែមីនា ឆ្នាំ២០១៤នេះ លោក ឆាយ ធី មន្រ្តីអាដហុក​ប្រចាំខេត្តរតនគីរី សម្តែងស្វាគមន៍ និងគាំទ្រដែលមានវេទិការមួយបង្កើតឡើងជាលើកដំបូង។ លោកថា អាជ្ញាធរ​មូលដ្នានថ្នាក់ជាតិ រៀបចំវេទិការ ផ្តល់ឱកាលទៅដល់ប្រជាពលរដ្ឋរបស់ខ្លួន ដែលមានឆន្ទៈចង់បញ្ចេញនូវមតិ យោបល់ លើកពីបញ្ហា ក្តីកង្វល់អស់ពីដួងចិត្តរបស់ពួកគាត់។ លោកបន្តថា យ៉ាងនេះក្តីលោកក៏នៅមានការ​សោក​ស្តាយ ដែលវេទិការខាងលើហាក់ពុំទាន់មានលក្ខណៈសេរី តម្លាភាព ឆ្លុះបញ្ចាំងពីឆន្ទះពលរដ្ឋពិតប្រាកដ​នៅឡើយ​ទេ «គ្រាន់តែជាការធ្វើបង្រ្គប់កិច្ចប៉ុណ្ណោះ»។

ឆ្លើយតបទៅនឹងការចោទប្រកាន់ខាងលើនេះ អភិបាលស្រុកវ៉ឺនសៃលោកជុំ ងិល ក្នុងបទសម្ភាសជាមួយទស្សនាវដ្តី មនោរម្យ.អាំងហ្វូ នារសៀលនេះ បានបដិសេធចំពោះការចោទប្រកាន់ថាមានការបិទបាំង ឬហាមឃាត់មិនឲ្យ​មាន​ការសម្តែងមតិដោយប្រជាពលរដ្ឋក្នុងវេទិការសាធារណៈនោះ។ លោកបានបញ្ជាក់ថា វេទិការសាធារណៈនេះ​ត្រូវ​បានអនុញ្ញាតិ ឲ្យប្រជាពលរដ្ឋដែលបានចូលរួមទាំងអស់ បង្ហាញពីបញ្ហាទុក្ខលំបាករបស់ខ្លួន ដើម្បីឲ្យក្រុមជំនាញ​នីមួយៗ បានចូលរួមនោះធ្វើការដោះស្រាយភ្លាមនៅនឹងកន្លែង។ លោកបន្តថា តែបើបញ្ហានោះមានភាពស្មុគស្មាញ ដោះស្រាយភ្លាមៗមិនបានទេ និងធ្វើសេចក្តីរាយការណ៍ទៅថ្នាក់លើ ដើម្បីជួយអន្តរាគម និងដោះស្រាយបន្ត។

ជាមួយគ្នានេះ លោកអភិបាលក៏បានទទួលស្គាល់ដែរថា ខាងជំនាញរបស់លោក មានការហាមឃាត់ប្រជាពលរដ្ឋ​មួយចំនួនពិតប្រាកដមែន។ តែពួកគាត់ទាំងនោះ លើកយកបញ្ហាដីធ្លីតែមួយគត់ មិនលើកយកបញ្ហាផ្សេងៗទៀត ដូច​ជាសេវាសាធារណៈ ឬសន្តិសុខជាដើម។ «ករណីដីធ្លីគាត់និយាយជាង១០នាក់ហើយ យើងថារកអាណាដែលជា​បញ្ហា និយាយបន្តរទៀត កុំនិយាយតែបញ្ហាមួយមុខហ្នឹង។ (…) ដូចអត់មានអ្នកណាហាមឃាត់គាត់ទេ ឲ្យបង្ហាញតែ​ទាំងអស់គ្នា និងគ្រប់ករណីទាំងអស់ហ្នឹង។ បើសិនជាករណីគេលើកហើយ វាដូចគ្នាទេ សូមឲ្យជួយលើកពីករណី​ផ្សេង​ដែលមិនទាន់មានគេលើកឡើង។»

ទោះមានការបដិសេធ ដោយលោកអភិបាលស្រុកវ៉ឺនសៃយ៉ាងនេះក្តី ក៏ មន្រ្តីសិទ្ធិមនុស្សអាដហុក ប្រចាំខេត្តរតនគីរី​លោក ឆាយ ធី បានសង្កត់ធ្ងន់ថាការហាមឃាត់នោះ ត្រូវបានលោកអធិការស្រុកវ៉ឺនសៃ ជាអ្នកមិនអនុញ្ញាតិឲ្យ​លើក​ឡើង ពិសេសពាក់ព័ន្ធនិងក្រុមហ៊ុនថ្មីមួយឈ្នោះថា អេសខេ រ៉ូបបឺ ផ្លានថេសិន (SK Rubber Plantation) ដែលទើប​តែចូលមកបោះបង្គោលព្រំរំលោភចូលដីស្រែ ចំការពួកគាត់ និងដីព្រៃសហគមន៍។ «គាត់ (អធិការស្រុកវ៉ឺនសៃ) មិន​មែនហាមឃាត់មិនឲ្យនិយាយក្នុងវេទិការជាទូទៅទេ គ្រាន់តែមិនឲ្យនិយាយពាក់ព័ន្ធនឹងបញ្ហាដីធ្លី»។

ករណីចោទប្រកាន់នេះដែរ លោក តឿ នូថង អធិការស្រុកវ៉ឺនសៃ បានចូលខ្លួនធ្វើការបដិសេធចោលទាំងស្រុង ថា​គ្មាន​មូលហេតុដែលក្រុមការងាររបស់គាត់ រៀបចំវេទិការសាធារណៈ ដើម្បីស្តាប់ និងទទួលយកបញ្ហា​របស់ប្រជា​ពលរដ្ឋ​មកដោះស្រាយ ហើយបែរជាហាមឃាត់ មិនឲ្យពលរដ្ឋលើកឡើងពីបញ្ហាទាំងនោះទេ។ «និយាយដោយសេរី មានបញ្ហាប្រឈមអ្វីដូចជាលួច ប្លន់ ក្មេងទំនើង…។ ឲ្យមានយោបល់ទាំងអស់គ្នា។ អត់មានព្រឹត្តិការណ៍នោះ (ហាម​ឃាត់ពលរដ្ឋមិនឲ្យនិយាយ) ទេ អ្នកដែលលើកឡើងមិនពិតនោះទេ។ (…) ឥឡូវក្រុមហ៊ុនអេសខេ ជាមួយប្រជា​ពលរដ្ឋ គេសម្របសម្រួល និងធ្វើការដោះស្រាយគ្នារួចហើយ។»

យ៉ាងនេះក្តីលោក ឆាយ ធី មន្រ្តីអង្គការសិទ្ធិមនុស្សអាដហុក បានសម្តែងនូវការគាំទ្រ ចំពោះការបង្កើតឲ្យមានវេទិការ​សាធារណៈថ្នាក់ជាតិមួយនេះ។ លោកបន្តរថា យ៉ាងហោចណាស់ វេទិការនេះក៏ផ្តល់ឲ្យប្រជាពលរដ្ឋ បានបង្ហាញ​នូវទុក្ខលំបាករបស់គាត់ចេញមកក្រៅដែរ ទោះបីការលើកឡើងនោះ មិនទាន់មានការ​ដោះស្រាយបានមួយ​រយ​ភាគ​រយក៏ដោយ។

សូមរម្លឹកថា វេទិការសាធារណៈថ្នាក់ជាតិនេះរៀបចំឡើង ក្នុងគោលបំណងឲ្យប្រជាពលរដ្ឋ គ្រប់និន្នាការ​ទាំង​អស់​បានចូលរួមតស៊ូមតិ សម្តែងការតវ៉ា និងការសួរដេញដោលនានា។ ការសម្តែងមតិទាំងនោះ រួមមានការលើកយ​ក​បញ្ហាដីស្រែ, ដីចំការ ដីព្រៃសហគមន៍ជាដើម។ ជាមួយគ្នានេះ ក៏មានការលើកឡើង ពីការផ្តល់សេវាកម្មផ្សេងៗ សេវាសាធារណៈ បញ្ហាឆក់ត្រី កាប់ព្រៃឈើ,ដឹកឈើខុសច្បាប់ ព្រមទាំងបញ្ហាអសន្តិសុខ និងការមិនអនុវត្តច្បាប់​ជាដើម៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១២ មីនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...