វិភាគ៖ តើបំណងឲ្យមានបុគ្គលឯករាជ្យក្នុង គ.ជ.ប អាចទៅរួចទេ?
- ដោយ: ជា ធីរិទ្ធ
- កែប្រែចុងក្រោយ: March 13, 2014
- ប្រធានបទ:
- អត្ថបទ: មានបញ្ហា?
- មតិ-យោបល់
-
ក្រុមការងារបច្ចេកទេសនៃគណបក្សទាំងពីរ បានបរាជ័យដោយមិនបានចេញសេចក្តីថ្លែងការណ៍រួម នៅក្នុងកិច្ចប្រជុំគណៈកម្មការចម្រុះកាលពីថ្ងៃទី ១០ ខែមីនា កន្លងទៅ ដោយសារគណបក្សប្រឆាំង លើកប្រធានបទសមាភាព គ.ជ.ប។ គណបក្សសង្គ្រោះជាតិ ទាមទារឲ្យមានការផ្លាស់ប្តូរ សមាសភាពស្ថាប័នមួយនេះ ដោយដាក់បុគ្គលឯករាជ្យមកជំនួសវិញ។ តើការចង់បានរបស់បក្សប្រឆាំងបែបនេះ អាចធ្វើទៅរួចដែរឬទេ?
រូបគំនូរកំប្លែងរបស់អង្គការខមហ្វ្រែល។
វិភាគ - មិនមែនជារឿងថ្មីនោះទេ ពោលគឺតាំងពីជាង ១០ ឆ្នាំមុនមកម្លេះ ដែលគណបក្សប្រឆាំងទន្ទេញក្នុងចិត្ត ចង់ឲ្យរដ្ឋាភិបាលកែទម្រង់ការបោះឆ្នោត តាមរយៈការផ្លាស់ប្តូរសមាសភាពគណកម្មាធិការជាតិ រៀបចំការបោះឆ្នោតបច្ចុប្បន្នចេញ ដាក់បុគ្គលឯករាជ្យធ្វើការនៅក្នុងស្ថាប័ននេះវិញ។ គណបក្សប្រឆាំងតែងចោទប្រកាន់ថា សមាសភាពថ្នាក់ដឹកនាំ គ.ជ. ប ជាង ៤ អាណត្តិមកនេះ មានលោក អ៊ឹម សួរស្តី លោក ទេព នីថា ជាដើម គឺជាមនុស្សរបស់គណបក្សប្រជាជនកម្ពុជា ទាំងសាច់ទាំងឈាមតែម្ដង។
ដោយសារតែមេដឹកនាំ គ.ជ.ប ជាមនុស្សរបស់គណបក្សប្រជាជនកម្ពុជានេះហើយ ដែលធ្វើឲ្យការបោះឆ្នោតជាង ៤ អាណត្តិ ពោលគឺចាប់តាំងពីឆ្នាំ ១៩៩៨ មកនេះ ត្រូវបានអ្នកឃ្លាំមើលឯករាជ្យ ឲ្យតម្លៃទៅលើការបោះឆ្នោតទាំងនោះ មិនសូវមានភាពយុត្តិធម៌ ត្រឹមត្រូវ និងអព្យាក្រឹត្យ ឯករាជ្យនោះឡើយ។ ក្រុមអ្នកឃ្លាំមើល ដែលមានទាំងក្រុមជាតិ និងអន្តរជាតិផង ថែមទាំងចោទស្ថាប័ន គ.ជ.ប ដឹកនាំយ៉ាងចាស់ខែដោយ លោក អ៊ឹម សួរស្តី លោក ទេព នីថា នេះថា ជាអ្នកជួយលួចបន្លំសន្លឹកឆ្នោត ឲ្យគណបក្សប្រជាជនកម្ពុជា នៅគ្រប់អាណត្តិនោះទៀត។
មូលហេតុនេះហើយ ទើបនៅក្រោយការបោះឆ្នោតនីតិកាលទី ៥ នេះ គណបក្សប្រឆាំង គឺគណបក្សសង្គ្រោះជាតិ និងអង្គការសង្គមស៊ីវិលជាច្រើន ដែលធ្វើការទាក់ទងនឹងការបោះឆ្នោត ទទួចទាមទារយ៉ាងខ្លាំងក្លា ចង់ឲ្យមានការកែទម្រង់ការបោះឆ្នោត ជាពិសេសផ្លាស់ប្តូរសមាសភាព គ.ជ.ប ដោយដាក់បុគ្គលឯករាជ្យមកធ្វើការនៅក្នុងស្ថាប័ននេះវិញ។
ប៉ុន្តែអ្វីដែលគេត្រូវចោទជាសំនួរ ថាតើការទាមទាររបស់បក្សប្រឆាំង និងក្រុមអង្គការសង្គមស៊ីវិលមួយចំនួនបែបនេះ នឹងធ្វើឲ្យគណបក្សប្រជាជនកម្ពុជាយល់ព្រមដែរឬទេ?
ជាសំនួរដែលមិនពិបាកឆ្លើយ ព្រោះ«ចំណីនៅក្នុងមាត់ហើយ នរណាឡើយចង់ខ្ជាក់មកវិញនោះ?» នរណាគេដឹងដែរថានៅប្រទេសកម្ពុជា គឺអំណាចប្រមូលផ្តុំទៅលើតែបុគ្គលម្នាក់ គឺលោក ហ៊ុន សែន នាយករដ្ឋមន្ត្រីដ៏ចាស់វស្សាកាន់អំណាចជិត ៣០ឆ្នាំ។ លោក ហ៊ុន សែន ដែលជាប់ឈ្មោះជាបុរសខ្លាំង កាន់អំណាចដោយកណ្ដាប់ដៃដែកនោះ មានអំណាចក្តោបក្តាប់ទៅលើស្ថាប័ន របស់រដ្ឋសំខាន់ៗទាំងអស់ រាប់ទាំងស្ថាប័ន គ.ជ.ប នោះដែរ។
ជាពិសេស គេត្រូវយល់ថា គឺស្ថាប័ន គ.ជ.ប នេះហើយដែលបានបង្កបង្កើតភាពស្រប់ច្បាប់ ឲ្យលោកបានកាន់អំណាចជាដរាបមកដល់ថ្ងៃនេះ។ រីឯសំនួរមួយទៀត គេត្រូវសួរថា តើលោក ហ៊ុន សែន និងបក្សពួកក្រុមគ្រួសាររបស់លោក មានបានគិតសូម្បីតែមួយវិនាទីឬទេ ថាលោក ចង់ចុះពីអំណាចនោះ? ជាសំនួរដែលគេត្រូវស្វែងរកចម្លើយ ដូចរងចាំផ្កាយធ្លាក់ពីលើមេឃ ឬឆ្លើយឲ្យខ្លី «កុំសង្ឃឹម»ឲ្យសោះ។ ម្លោះហើយ គ្មានហេតុផលអ្វី ដែលធ្វើឲ្យលោកហ៊ុន សែន ត្រូវផ្លាស់ប្តូរសមាសភាពថ្នាក់ដឹកនាំ គ.ជ.ប ដែលលោកខំរៀបចំតាំងពី«ព្រេងនាយ» ដែលសុទ្ធសឹងជាមនុស្សរបស់ខ្លួន ហើយដាក់បុគ្គលណាផ្សេង ដែលលោកមិនស្គាល់ជំនួសវិញនោះឡើយ។
ម្យ៉ាងវិញទៀត ហេតុផលសំខាន់ជាងនេះ គឺគណបក្សប្រជាជនកម្ពុជា ពិតជាមិនអាចទុកចិត្តចំពោះបុគ្គលដែលបក្សប្រឆាំង និងអង្គការសង្គមស៊ីវិលហៅថា ជា«បុគ្គលឯករាជ្យ»នោះទេ។ គណបក្សកាន់អំណាចសព្វថ្ងៃដឹងខ្លួន យ៉ាងច្បាស់ ថានៅក្នុងប្រទេសកម្ពុជា អ្នកដែលមានជំហរឯករាជ្យ មិនងាយគេបង្វឹលបាន ឬបញ្ញាជនភាគច្រើន សុទ្ធសឹងជាអ្នករិះគន់រដ្ឋាភិបាលលោក ហ៊ុន សែន ទោះបើមិនច្រើន ក៏គេបានបង្ហាញជំហរមិនគាំទ្ររដ្ឋាភិបាលលោក ហ៊ុន សែន នោះដែរ។
មជ្ឈដ្ឋានប្រឆាំងមួយចំនួន បានលើកមកវិភាគថា មានតែកម្លាំងពីរយ៉ាង ដែលធ្វើឲ្យគណបក្សប្រជាជនកម្ពុជា និងលោក ហ៊ុន សែន អាចយល់ព្រមផ្លាស់ប្តូរសមាសភាព គ.ជ.ប នោះបានគឺ កម្លាំងមហាជន និងកម្លាំងអន្តរជាតិ។ តែនោះ គឺជាការវិភាគមួយ ដែលនៅ«ស្ទើភ្លើង» ព្រោះគេគម្បី«ស្គាល់»លោក ហ៊ុន សែន ឲ្យបានច្រើនជាងនេះ។
ស្មារតីប្រជាជនកម្ពុជា ដែលត្រូវបានរបបខ្មែរក្រហម និងរបបកុម្មុយនីសដែលលើកបន្ដុបដោយវៀតណាម វាយបំបាក់រាបដល់ដីនោះ ទើបតែងើបមកវិញ ក្នុងរយៈប៉ុន្មានឆ្នាំចុងក្រោយនេះប៉ុណ្ណោះ។ ការងើបឡើងបន្ដិចនេះ មិនគ្រប់គ្រាន់នឹងឲ្យមានកម្លាំងមហាជនមួយ ដើម្បីដាក់សម្ពាធលើលោក ហ៊ុន សែន និងគណបក្សប្រជាជននោះទេ។ មិនត្រឹមតែប៉ុណ្ណោះ សភាពការណ៍បង្ក្រាប នៅដងវិថីវ៉េងស្រង ជាឧទាហរណ៍ស្រាប់បញ្ជាក់ថា លោក ហ៊ុន សែន មិនខ្លាចនឹងប្រើកម្លាំង ដើម្បីបំបាក់ស្មារតីទប់ទល់នឹងកម្លាំងមហាជន ដែលមជ្ឈដ្ឋានខាងលើបានលើកឡើងនោះឡើយ។
រីឯការលើកឡើង ពីកម្លាំងអន្តរជាតិដើម្បីដាក់សម្ពាធលោក ហ៊ុន សែន នោះទៀតសោធ វាបានត្រឹមតែធ្វើឲ្យលោក ហ៊ុន សែន និងបក្សពួក កាន់តែផ្ទុះសំណើចសើចសប្បាយយ៉ាងរីករាយបន្ថែមទៀតប៉ុណ្ណោះ។ ព្រោះនយោបាយ «អោបដៃចិន លិទ្ធជើងវៀតណាម» របស់លោក ហ៊ុន សែន នឹងបញ្ចេញរូបរាងកាន់តែច្បាស់នៅពេលនោះ។ លោក ហ៊ុន សែន និងបក្សពួកធ្លាប់និយាយច្រើនដងច្រើនសារហើយថា «សង្កត់ក ហ៊ុន សែន មិនមែន ហ៊ុន សែន ជាអ្នកលៀនអណ្ដាតនោះទេ»៕
------------------------------
ដោយ វិធូ (ទំនាក់ទំនង [email protected]) - ភ្នំពេញ ថ្ងៃទី១២ មីនា ២០១៤