ក្នុងទំព័រហ្វេសប៊ុក ដែលត្រូវបានគេស្គាល់ថាជារបស់នាយករដ្ឋមន្រ្តីហ៊ុន សែន បានអះអាងថា ជប៉ុនកំពុងចាប់យក​ឱកាសវិនិយោគនៅកម្ពុជា ដោយប្រទេសមួយនេះ ចាត់ទុកថាប្រទេសកម្ពុជាជាទិសដៅវិនិយោគដ៏សំខាន់បំផុត ហើយក៏យុត្តិសាស្រ្តរបស់រដ្ឋភិបាល ក្នុងការកាត់បន្ថយភាពក្រីក្រ នៅអាណត្តិទី៥នេះដែរ។ ប៉ុន្តែវាជាការអះអាង ដែលដូចជា«មិនសូវពិត»។

មជ្ឈមណ្ឌលពាណិជ្ជកម្ម អាអេអុន របស់ជប៉ុន នៅរាជធានីភ្នំពេញ។ (រូបថត ហ្វេសប៊ុក)

វិនិយោគ - ទំព័រហ្វេសប៊ុកមួយដែលគេជឿថា ជារបស់លោកនាយករដ្ឋមន្រ្តីហ៊ុនសែន បានសរសេរអួតអាង​នៅ​ថ្ងៃសៅរ៍ទី២២ ខែកុម្ភៈនេះ ទាក់ទងនឹងការវិនិយោគរបស់ប្រទេសជប៉ុន នៅក្នុងប្រទេសកម្ពុជា ដោយយោងលើ​មូលហេតុដ៏សំខាន់ នៃកិច្ច«សហប្រតិបត្តិការដ៏រឹងមាំរវាងប្រទេសជប៉ុន និងកម្ពុជា»។ លើសពីនេះទៅទៀត ទំព័រ​នេះបានសរសេរដោយមានមោទនភាពថា «ប្រទេសជប៉ុន និងក្រុមហ៊ុនអាជីវកម្មជប៉ុន មានជំនឿទុកចិត្តយ៉ាងខ្លាំង មកលើរាជរដ្ឋាភិបាលកម្ពុជា ក្នុងការធានាសុវត្ថិភាព សន្តិភាព ដើម្បីអោយក្រុមហ៊ុនបរទេស អាចប្រកបអាជីវកម្ម​ដោយមិនមានការភ័យខ្លាច។»

ទំព័រហ្វេសប៊ុកដែលមានឈ្មោះថា សម្ដេច ហ៊ុន សែន នាយករដ្ឋមន្ត្រី និងមានមនុស្សចូលមកចុចចូលចិត្តជិត​២០​ម៉ឺន​នាក់ បានលើកយកតួលេខមួយមកបញ្ជាក់ថា «មកទល់ពេលនេះមានក្រុមហ៊ុនជប៉ុនជាង១២២ បានមកវិនិយោគ និងបណ្តាក់ទុនធ្វើ់អាជីវកម្មនៅកម្ពុជា»។

ការលើកឡើងរបស់ទំព័៍រនេះ បានផ្ទុយទៅនឹងការលើកឡើងមួយចំនួន របស់មន្ត្រីជាន់ខ្ពស់របស់រដ្ឋាភិបាលខ្លួនឯង និងអ្នកវិភាគសេដ្ឋកិច្ចឯករាជ្យ ដែលតែងតែលើកឡើងថា ការវិនិយោគទុនរបស់វិនិយោគិនជប៉ុន នៅតែមានចំនួន​ដ៏តិចតួចនៅឡើយ។ ជាងនេះទៅទៀត បើយោងតាមទិន្នន័យ ពីស្ថានទូតជប៉ុនប្រចាំនៅកម្ពុជាបានបញ្ជាក់ថា ការវិនិយោគរបស់ជប៉ុននៅកម្ពុជា ក្នុងឆ្នាំ២០១៣ មានចំនួនត្រឹមតែប្រមាណជា ៤៧,៥លាន ដុល្លារ ប៉ុណ្ណោះ ដែល​ធ្លាក់ចុះ២៨០លានដុល្លារអាមេរិក បើធៀបនឹងឆ្នាំ២០១២ ដែលមានចំនួនដល់ទៅ ៣២៨លានដុល្លារ។ ចំនួន៤៧,៥​លានដុល្លារ ជាចំនួនទឹកប្រាក់ដ៏ទាបមួយ។

លោក ខៀវ កាញារិទ្ធ ធ្លាប់សរសេរនៅលើទំព័រហ្វេសប៊ុកផ្ទាល់ខ្លួនរបស់លោក ដោយបង្ហើប​ពីជំនួបរវាងនាយក​រដ្ឋមន្ត្រីទាំងពីរប្រទេស លោក ហ៊ុន សែន និងលោក ស៊ីនហ្សូ អាប៊េ ក្នុងពេលដែលនាយក​រដ្ឋមន្ត្រី​ជប៉ុនមកធ្វើ​ទស្សនកិច្ចនៅកម្ពុជាថា ជប៉ុនត្រូវការឲ្យកម្ពុជាតម្លើងសមត្ថភាព ខាងការផ្គត់ផ្គង់ថាមពល (អគ្គិសនី) ឲ្យ​បានគ្រប់​គ្រាន់​សិន មុននឹងវិនិយោគិនរបស់គេមកដាក់ទុននៅកម្ពុជា។

សំណេររបស់លោក ខៀវ កាញារិទ្ធ នៅពេលនោះ ទំនងជាចង់បង្វែងអារម្មណ៍ក្រុមអ្នកប្រើប្រាស់បណ្ដាញសង្គម ឲ្យ​ងាកចេញពីការរិះគន់ដ៏ខ្លាំងក្លារបស់មតិមួយចំនួន ដែលបានលើកមូលហេតុមកនិយាយថា ជប៉ុនមិនមកដាក់​ទុន​រក​ទទួលទានច្រើននៅកម្ពុជា ដោយសារតែប្រទេសកម្ពុជា ជាប្រទេសដែលពុករលួយជាងគេបង្អស់នៅអាស៊ីអាគ្នេយ៍ និងស្អុយរលួយជាងគេជាប់ចំណាត់លេខពីរ នៅអាស៊ីបន្ទាប់ពីប្រទេសកុម្មុយនីសផ្ដាច់ការ កូរ៉េខាងជើង។ ការលើក​ឡើងរបស់ក្រុមអ្នករិះគន់ ដោយសំអាងទៅលើរបាយការណ៍មួយ ចេញផ្សាយដោយអង្គការតម្លាភាពអន្តរជាតិ កាល​ពីពេលថ្មីៗនេះ។

អ្នកណាក៏គេមើលដឹងដែរថា ប្រទេសមួយចំនួន ដូចជាប្រទេសជប៉ុនជាដើម សុទ្ធចិត្តផ្ដល់ជំនួយមកឲ្យកម្ពុជា តែ​ជប៉ុន​នៅមានភាពរារែកនៅឡើយ ក្នុងការដាក់ទុនវិនិយោគនៅក្នុងប្រទេសមួយនេះ។ អ្នកស្រាវជ្រាវវិស័យ​សេដ្ឋកិច្ច​កម្ពុជា លោក នៅ សីហា ធ្លាប់បានលើកមូលហេតុឲ្យទស្សនាវដ្ដីមនោរម្យ.អាំងហ្វូ ដឹងថា នោះមកពីកម្ពុជាមាន​ទីផ្សារ​តូច មានការលំបាកក្នុងការចុះបញ្ជីពាណិជ្ជកម្ម ការិយាធិបតេយ្យ អំពើពុករលួយ អភិបាលកិច្ចមិនល្អ និងបញ្ហា​ផ្សេងៗ​​មួយចំនួនទៀត។

អ្នកជំនាញសេដ្ឋកិច្ចរូបនេះ បានពន្យល់ថា ជាគោលការណ៍ ប្រទេសជប៉ុនមានការពិនិត្យល្អិតល្អន់ណាស់ មុននឹង​ដាក់ទុនវិនិយោគនៅប្រទេសណាមួយ។ ប៉ុន្តែ លោក នៅ សីហា បានបង្ហាញនូវសុទ្ទិដ្ឋិនិយមថា កម្ពុជាមិននៅ​មួយ​កន្លែងទេ កម្ពុជានឹងបោះជំហានទៅមុខ ព្រោះកម្ពុជាមានសក្តានុពលច្រើន ពិសេស កសិកម្ម ទេសចរណ៍ និង​ធនាគារជាដើម។ ដូច្នេះបើយោងទៅលើសក្ដានុពលទាំងនេះ អ្នកវិនិយោគទុនជប៉ុនអាចនឹងមកកម្ពុជា កាន់តែច្រើន​​​ក្នុងពេលឆាប់ៗខាងមុខ។

យ៉ាងណាក៏ដោយ ក៏អ្នកវិភាគបានថ្លែងថា កម្ពុជាចាំបាច់ត្រូវធ្វើកំណែទម្រង់ ឲ្យបានពិតប្រាកដ ដើម្បីកសាងកេរ្ដ៍​ឈ្មោះ ជុំវិញការបំបាត់អំពើពុករលួយ និងប្រសិទ្ធិភាពនៃប្រព័ន្ធអនុវត្តច្បាប់ ឲ្យបានល្អជាមុនសិន។ កំណែទម្រង់ ដែលជាមូលដ្ឋានគ្រឹះយ៉ាងសំខាន់ មុននឹងឈានទៅដល់ការ«អួតអាង»៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២២ ខែកុម្ភៈ ឆ្នាំ២០១៤