មជ្ឈមណ្ឌសិទ្ធិមនុស្សកម្ពុជា (CCHR) បានលើកឡើងថា ក្រសួងព័ត៌មានសម្រេចផ្តល់អាជ្ញាប័ណ្ណផ្សព្វផ្សាយ ដោយ​ផ្អែកលើការស្រុះស្រួលផ្នែកនយោបាយ ជាជាងផ្តោតសំខាន់ទៅលើ គោលការណ៍តម្លាភាព និងភាពចម្រុះ។

រូបភាពកាត់ត រវាងរូបភាព និងនិមិត្តសញ្ញារបស់ប្រព័ន្ធផ្សព្វផ្សាយក្នុងស្រុក។ (រូបថត Mekhea)

វិស័យព័ត៌មាន - ក្នុងរបាយការណ៍របស់ខ្លួន ចេញផ្សាយថ្ងៃទី១៣ ខែកុម្ភៈ ឆ្នាំ២០១៤ ស្តីពីនិយតកម្មប្រព័ន្ធ​ផ្សព្វ​ផ្សាយ និងសេរីភាពបញ្ចេញមតិ មជ្ឈមណ្ឌសិទ្ធិមនុស្សកម្ពុជា(CCHR) បានអត្ថាធិប្បាយថា ក្រសួងព័ត៌មានបាន​ប្រើ​ប្រាស់សិទ្ធិរបស់ខ្លួន ដោយសេរី ក្នុងការសម្រេចថា គួរផ្តល់ ឬបដិសេធ ចំពោះការទាមទារអាជ្ញាប័ណ្ណផ្សព្វផ្សាយ។

បើតាមរបាយការណ៍ការដដែលនោះ ការសម្រេចថាគួរផ្តល់ឲ្យ ឬបដិសេធ ចំពោះការស្នើសុំអាជ្ញាប័ណ្ណផ្សព្វផ្សាយ គឺផ្អែកសំខាន់ទៅលើការស្រុះស្រួលផ្នែកនយោបាយ ជៀសជាងផ្តោតទៅលើ គោលការណ៍តម្លាភាព និងភាពចម្រុះ ដែលជាផ្នែកមួយសំខាន់ ក្នុងការជំរុញលិទ្ធិប្រជាធិបតេយ្យ និងការគោរពសិទ្ធិមនុស្ស។

ជុំវិញករណីនេះ ទស្សនាវដ្តីមនោរម្យ.អាំងហ្វូ មិនអាចទាក់ទងលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន ដើម្បី​ធ្វើការអត្ថាធិប្បាយបាននៅឡើយទេ។

ក្នុងពេលថ្មីៗនេះ ក្រសួងព័ត៌មានបានទាត់ចោលជាបន្តបន្ទាប់ ចំពោះការ​ស្នើសុំបង្កើតហ្វ្រេកង់ទូរទស្សន៍ និង​ដំឡើង​កម្លាំងផ្សាយវិទ្យុរបស់លោក ម៉ម សូណង់ដូ ប្រធានវិទ្យុសំបុកឃ្មុំ។ ជុំវិញការបដិសេធនេះ លោក ខៀវ កាញារិទ្ធ រដ្ឋមន្រ្តីក្រសួងព័ត៌មាន បានបកស្រាយថា មូលហេតុមកពីវិទ្យុសំបុកឃ្មុំ វិទ្យុអាស៊ីសេរី វិទ្យុវីអូអេ និងវិទ្យុសារិកាជា​ដើម មាននិន្នាការនយោបាយទៅរកគណបក្សសង្រ្គោះជាតិ ដែលជាគណបក្សជំទាស់ ហើយបែរជាផ្សាយវាយ​ប្រហារ​​ទៅលើរដ្ឋាភិបាលគណបក្សប្រជាជនកម្ពុជាទៅវិញ។

ចំពោះការលើកហេតុផលរបស់លោក ខៀវ កាញ្ញារីទ្ធ ត្រូវបានអ្នកតាមដានស្ថានការណ៍នយោបាយកម្ពុជា និង​អ្នក​វិភាគនយោបាយឯករាជ្យ លើកជាចម្ងល់ថា តើប្រព័ន្ធផ្សព្វផ្សាយនៅកម្ពុជា បង្កើតឡើងសម្រាប់តែគាំទ្រ ទាំង​ចំណុចខុស និងគាំទ្រទាំងចំណុចត្រូវ របស់រដ្ឋាភិបាល ហើយបែរទៅជាវាយប្រហារលើ រាល់ចំណុចខុស និងរាល់​ចំណុចត្រូវ របស់គណបក្សប្រជំទាស់ និងក្រុមអង្គការសង្គមស៊ីវិល ឬយ៉ាងណា?

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៣ ខែកុម្ភៈ ឆ្នាំ២០១៤