បណ្តាមតិរបស់អ្នកប្រើប្រាស់ហ្វេសប៊ុកជាច្រើន បានសង្ស័យថា កញ្ញាធី សុវណ្ណថា បានចាកចេញទៅ​បង្កើតទំព័រ​ផ្ទាល់​ខ្លួន ដោយសារមានជម្លោះផ្ទៃក្នុងនៅក្នុងក្រុមការងារ នៃទំព័រដ៏ធំមានឈ្មោះថា I Love Cambodia hot news។ តែមតិខ្សិបខ្សៀវនេះ ត្រូវបានម្ចាស់គ្រប់គ្រងទំព័រនេះបដិសេធចោល ដោយអះអាងថា ធី សុវណ្ណថា បានចេញពីក្រុម​នេះដោយខ្លួននាង និងដោយសារតែនាងចង់មានភាពឯករាជ្យ។

រូបភាពផ្ដិតពីទំព័រហ្វេសប៊ុក I Love Cambodia hot news។

សង្គ្រាមហ្វេសប៊ុក - ការរំជើបរំជួលនៅក្នុងចំណោមអ្នកតាមដានទំព័រធំៗ នៅក្នុងបណ្ដាញសង្គមហ្វេសប៊ុក បានផ្ទុះ​ឡើងជាបន្តបន្តាប់។ ព្រឹត្តិការណ៍ដែលអ្នកតាមដាន បាននាំគ្នាឆ្ងល់ហើយចោទជាសំនួរឡើងគ្រប់គ្នានោះ គឺកញ្ញា​ ធី សុវណ្ណថា ដែលគេតែងតែឃើញនាង ជាសមាជិកយ៉ាងសកម្មនៅក្នុងទំព័រ I Love Cambodia hot news កន្លងមក​នោះ បែរជាបានបំបែកខ្លួនទៅបង្កើតទំព័រថ្មីមួយទៀត ដែលរហូតមកដល់ពេលនេះ បានកើនប្រជាប្រិយភាពខ្លាំងដែរ។

នៅក្នុងព្រឹត្តិការណ៍ចុងក្រោយ ដោយសារមានសេចក្ដីថ្លែងការណ៍ ដល់ទៅពីរសន្លឹកដ៏ប្រទាំងប្រទើស របស់​គណបក្ស​សង្គ្រោះជាតិ បដិសេធការផ្សាយពត៌មានរបស់កញ្ញា ធី សុវណ្ណថា ទាក់ទងនឹងការដាក់ពាក្យ​បណ្ដឹងរបស់ប្រធាន​គណបក្សសង្គ្រោះជាតិ លោក សម រង្ស៊ី ប្រឆាំងលោក ហ៊ុន សែន ទៅកាន់តុលាការព្រហ្មទណ្ឌអន្តរជាតិនោះ ការ​សង្ឃ័យពីការបែកបាក់ផ្ទៃក្នុងនៃក្រុមការងារ I Love Cambodia hot news នេះ ត្រូវបានបង្ហាញឲ្យឃើញ កាន់តែ​ច្បាស់ថែមទៀត។ សេចក្ដីថ្លែងការណ៍នោះមួយសន្លឹក ថែមទាំងត្រូវបានចុះផ្សាយនៅលើទំព័រផ្លូវការរបស់ កញ្ញា កឹម មនោវិទ្យា អគ្គនាយករងផ្នែកទំនាក់ទំនងសាធារណៈ នៃ​គណបក្ស​សង្គ្រោះជាតិ និងត្រូវជាបុត្រីរបស់អនុប្រធាន គណបក្សសង្គ្រោះជាតិនោះផងទៀត។

ប៉ុន្តែនៅក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ នៅថ្ងៃទី៧ ខែកុម្ភះនេះ ម្ចាស់គ្រប់គ្រងទំព័រ I Love Cambodia hot news លោក គឹម សុវណ្ណារិទ្ធ បានបដិសេធការសង្ស័យខាងលើ ហើយថ្លែងអះអាងថា «មូលហេតុ​ដែលខ្ញុំដក ធី សុវណ្ណថា ចេញពីក្រុម មិនមែនជាការបែកបាក់ផ្ទៃក្នុងនោះទេ ដោយ សុវណ្ណថា ត្រូវការភាព​ម្ចាស់​ការ​ឯករាជ្យ។ ហើយម្យ៉ាងទៀត យើងចង់ចែកការងារគ្នាធ្វើ ដើម្បីអោយសកម្មភាពកាន់តែធំ។» សម្រាប់មតិរបស់​ក្រុម​តារាៗមួយចំនួន នៅក្នុងបណ្តាញសង្គមហ្វេសប៊ុក ដែលយល់ថា កញ្ញា ធី សុវណ្ណថា ត្រូវបានដកចេញដូចគល់ស្ពៃ ពីទំព័រ I Love Cambodia hot news នោះ ត្រូវបានលោក គឹម សុវណ្ណារិទ្ធ បដិសេធ និងបានថ្លែងការពារនាងថា «នៅ​ក្រុមការងារ ធី សុវណ្ណថា ជាមនុស្សសកម្ម ហើយតែងតែគោរពបងបងៗ នៅក្នុងក្រុមហ្នឹងជានិច្ច»។

លោកបានអោយដឹងទៀតថា «សុវណ្ណថា ជាក្មេងស្រីល្អម្នាក់ ហើយមើលទៅលើសកម្មភាពរបស់គាត់ គាត់ជា​ក្មេង​ស្រីម្នាក់ដែលក្លាហាន មានឆន្ទៈហើយគាត់ធ្វើអ្វីដែលយុវជនដទៃទៀត មិនហ៊ានធ្វើ ឧទាហរណ៍កន្លែងមួយ ដែល​កំពុងផ្ទុះអាវុធអ្នកផ្សេងមិនហ៊ានទៅទេ តែនាងហ៊ានទៅ។ ម្យ៉ាងទៀតគាត់ហ៊ានប្រឈមមុខនឹងគ្រោះថ្នាក់ នឹងការ​គម្រាមគំហែង។ រីឯលក្ខណៈជីវភាពគ្រួសារគាត់ធូធារ ដែលអំណោយផលដល់ក្រុមដែរ នៅពេលដែល​គាត់ចុះខេត្ត​ម្តងៗ ពួកខ្ញុំមិនចាំបាច់ ចំណាយលុយអោយគាត់ នោះទេ។»

ខុសពីការលើកលើកឡើងរបស់ លោក គឹម សុវណ្ណារិទ្ធ ខាងលើ លោក អេង ពន្លក ដែលជាអតីតអ្នកគ្រប់គ្រង និង​ជាអ្នក​ជួយជ្រោមជ្រែងផ្តល់ប្រឹក្សា ទំព័រ I Love Cambodia hot news ដែរនោះ បានះអះអាងប្រាប់ទស្សនាវដ្ដីថា «ការណ៍ដែលយើងដកគាត់ ចេញពីក្រុមការងារ I Love Cambodia hot news ដោយសារតែគាត់មានទំនាក់ទំនង​ជាមួយ ផែ សុវណ្ណារិទ្ធ ដែលជាសកម្មជនរបស់គណបក្សប្រជាជន។ មូលហេតុបែបនេះហើយ ទើបយើងដក សុវណ្ណថា ចេញបណ្តោះអាសន្នសិន។ យើងចង់ដាក់គាត់ចូលមកវិញដែរ ក៏ប៉ុន្តែគាត់នៅតែមិនដាច់ទំនាក់ទំនង​ជា​មួយផែ សុវណ្ណារិទ្ធដដែល។ ហើយម្យ៉ាង យើងដកគាត់ចេញដើម្បីការពារ​ក្រុម។» នៅក្នុងការចុះផ្សាយជាច្រើន នៅ​លើទំព័រហ្វេសប៊ុករបស់លោក អេង ពន្លក គេឧស្សាហ៍ឃើញ កញ្ញា ធី សុវណ្ណាថា ត្រូវបានចោទប្រកាន់ ថាជា​គិញ​សម្ងាត់​នោះថែមទៀត។

ការប្រកាន់ជំហររបស់លោក អេង ពន្លក មិនត្រូវបានលោក គឹម សុវណ្ណារិទ្ធ សប្បាយចិត្តនោះឡើយ ហើយបាន​ប្រកាសនៅថ្ងៃទី០៥ ខែកុម្ភះកន្លងមកថ្មីៗ ដកលោក អេង ពន្លក ចេញពីក្រុមការងារ I Love Cambodia hot news។ លោក គឹម សុវណ្ណារិទ្ធ បានសរសេរនៅលើទំព័រផ្ទាល់ខ្លួន របស់លោកថា «"គុណមួយសំពៅ ទោសមួយចូលទៅ កំពប់គុណអស់" ពាក្យស្លោកនេះ បានដិតជាប់ក្នុងគំនិតកូនខ្មែរ ហើយក៏ដូចជា អេង ពន្លក។ ខ្ញុំ គឹម សុវណ្ណារិទ្ធ នឹង​គាំទ្រ សុវណ្ណថា រហូតដល់ដង្ហើមចុងក្រោយ។»

ម្ចាស់គ្រប់គ្រងទំព័រដ៏ធំមួយនេះ បានថ្លែងប្រាប់ទស្សនាវដ្ដីទៀតថា «អ្វីដែលគេតែងតែធ្វើការវាយប្រហារ ទៅលើ សុវណ្ណថា ដោយសារអ្នកផ្សេងហ្នឹង ច្រណែននឹងប្រជាប្រិយភាពគាត់។»

លោក អេង ឆៃអៀង តំណាងរាស្ត្រជាប់ឆ្នោត របស់គណបក្សសង្គ្រោះជាតិ ដែលជាបងប្រុសរបស់លោក អេង ពន្លក ក៏ធ្លាប់សរសេរនៅលើទំព័ររបស់លោកដែរថា «ខ្ញុំគាំទ្រនូវសេចក្តីក្លាហាន និងសកម្មភាពនយោបាយរបស់កញ្ញា ធីសុវណ្ណថា កន្លងមក ហើយខ្ញុំនឹងគាំទ្រនាងជានិច្ច បើនាងនៅតែបន្តរសកម្មភាពការពារផលប្រយោជជាតិ ប្រជា​ពលរដ្ឋ យុត្តិធម៌ និងប្រឆាំងនិងអំណាចផ្តាច់ការ ទោះបីមានគេសង្ស័យនាងថា ជាចារកម្មរបស់ CPP ក៏ដោយ»។

បើម្ចាស់ទំព័រថា គ្មានជម្លោះផ្ទៃក្នុងទេ តែបើយោងទៅលើការដកដាក់ អ្នកគ្រប់គ្រងទំព័រនេះជាបន្តបន្ទាប់ តើគេ​អាច​ជឿថាមិនមានជម្លោះផ្ទៃក្នុងបានដែរឬទេ? សំនួរជាបន្តទៅទៀតនឹងកំណត់ថា តើលោក អេង ពន្លក ច្រណែន​នឹង​ប្រជាប្រិយភាពរបស់កញ្ញា ធី សុវណ្ណថា មែនឬ? តើការសង្ស័យ និងការលាបពណ៌ឲ្យគ្នាចេះតែកើតមាន នៅក្នុង​សង្គមខ្មែរ ជាដរាបរហូតតទៅឬយ៉ាងណា? ជាសំនួរដែលសុទ្ធសឹងតែពិបាកនឹងរកចម្លើយ។ ផ្ទុយទៅវិញ បើគេរក​ចម្លើយបានវិញនោះ បញ្ហាក៏ប្រហែលជាមិនចប់ដោយងាយស្រួលនោះដែរ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) - ភ្នំពេញ ថ្ងៃទី ០៧ ខែកុម្ភៈ ឆ្នាំ២០១៤