មេដឹកនាំសហជីព៖ មិនដកថយ ក្នុងរឿងប្រាក់ខែកម្មករ១៦០ដុល្លារ
បើទោះបីជាកម្មករចូលធ្វើការធម្មតាវិញ ស្របពេលដែលរដ្ឋាភិបាលបាន សម្រេចតម្លើងប្រាក់ខែគោល ត្រឹមតែ១០០ដុល្លារយ៉ាងណាក៏ដោយ តែមេដឹកនាំសហជីពដែលធ្លាប់ដឹកនាំកម្មករធ្វើបាតុកម្មកន្លងមក ប្រកាសថាមិនអាចទទួលយក១០០ដុល្លារបានទេ ដាច់ខាតត្រូវតែ១៦០ដុល្លា ទើបកម្មករអាចរស់នៅដោយសមរម្យបាន។
ការដង្ហែក្បួនរំលឹកខួប១០ឆ្នាំ នៃការបាញ់សម្លាប់លោក ជា វិជ្ជា អតីតប្រធានសហជីពសេរីកម្មករ នៃព្រះរាជាណាចក្រកម្ពុជា ដោយមានការចូលរួមពីលោក សម រង្ស៊ីផង នៅថ្ងៃទី២២ ខែមករា ឆ្នាំ២០១៤។ (រូបថត MONOROOM.info/ O.Vary)
វិបត្តិការងារ -ថ្ងៃរម្លឹកវិញ្ញាណក្ខន្ធគំរប់ខួប១០ឆ្នាំ របស់លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ក៏ជាថ្ងៃដែលមេដឹកនាំសហជីពទាំងប្រាំបួនប្តេជ្ញាថា ការចរចារប្រាក់ឈ្នួលគោលដាច់ខាតកម្មករត្រូវតែទទួលបាន១៦០ដុល្លាក្នុងមួយខែ។
លោក ជា មុន្នី ជាប្អូនប្រុសបង្កើតរបស់ លោក ជា វិជ្ជា និងជាប្រធានសហជីពសេរីកម្មករ នៃព្រះរាជាណាចក្រកម្ពុជាបានថ្លែងថា «យើងមិនដកថយទេ ចំពោះការទាមទារប្រាក់បៀវត្ស កម្មករ១៦០ដុល្លានេះ យើងនូវតែបន្តទាមទារអញ្ចឹង។ បើប្រាក់ខែចាយមិនគ្រាន់កម្មករនឹងចំណាកស្រុក ហើយប្រសិនជាអត់កម្មករធ្វើការទេនោះ ឧស្សាហកម្មកាត់ដេរក៏ដួលដែរ បើឧស្សាហកម្មដួលរដ្ឋាភិបាលក៏ខាត អញ្ចឹងមានតែរដ្ឋាភិបាលគិតគូរពិចារណាឡើងវិញ។»
ប្រធានសហជីពសេរីកម្មករនៃព្រះរាជាណាចក្រកម្ពុជារូបនេះ បានលើកឡើងពីប្រាក់ឈ្នួលកម្មករ១០០ដុល្លា ដែលរដ្ឋាភិបាលអោយនោះ ថាកម្មករមិនទទួលយកទេ ព្រោះមិនមានតុល្យភាពជាមួយថ្លៃទំនិញបច្ចុប្បន្នបាន។ លោកអះអាងទៀតថា «មូលហេតុដែលកម្មកចូលធ្វើការវិញ ដោយសារតែសមត្ថកិច្ចបានបាញ់ពួកគាត់ ចាប់និងវាយពួកគាត់។ បើសមត្ថកិច្ចមិនធ្វើបែបហ្នឹង កម្មករមិនចូលធ្វើការនោះទេ។ អោយគាត់ចូលធ្វើការយ៉ាងម៉េច បើប្រាក់ខែស៊ីមិនគ្រាន់ផង។»
រីឯលោកអាត់ ធន់ ប្រធានសហភាពការងារកម្ពុជា នៅថ្ងៃទី២២ ខែមករា ឆ្នាំ២០១៤ ខណៈពេលដែលលោកបានចូលរួមគោរពវិញ្ញាណក្ខ័ណ្ឌលោក ជា វិជ្ជា ដែរនោះ បានរក្សាជំហរដូចគ្នានិងសហជីពទាំងប្រាំបីដែរថា «យើងទាំងអស់គ្នាជាកម្មករនឹងនៅបន្តការស៊ូមតិជាមួយនិងអ្នកបញ្ជាទិញ ថាធ្វើយ៉ាងណាអោយកម្មករទទួលបានប្រាក់មួយដែលសមរម្យ»។
ក្នុងពេលដែលលោករក្សាជំហរបែបនេះ ស្របជាមួយការទទូចពីកម្មករថា តើនៅពេលណាដែលមេដឹកនាំសហជីពធ្វើបាតុកម្មទាមទារប្រាក់អប្បមារ១៦០ដុល្លាបន្តទៀត ព្រោះពួកគេមិនអាចរស់នៅ ដោយសមរម្យជាមួយប្រាក់ខែ១០០ដុល្លាដែលរដ្ឋាភិបាលអោយបានទេ។ គួរតែមានការស្នើអោយមានការចរចារបញ្ហាប្រាក់ឈ្នួលនេះឡើងវិញ។
លោកបន្តថា «បើកម្មករធ្វើបាតុកម្ម-កូដកម្មតវ៉ាផ្សេងៗ វាមិនប៉ះពាល់អីដល់ការធ្វើវិយោគទុន ឬការនាំចេញ ការវិលត្រលប់វិញរបស់ក្រុមហ៊ុននៅស្រុកខ្មែរនោះទេ។ មានន័យថាទីផ្សារទាំងអស់ គេគោរពច្បាប់ស្រុក ប៉ុន្តែប្រសិនបើប្រាក់ឈ្នួល និងបញ្ហាចាប់ សំលាប់មិនត្រូវបានដោះស្រាយ និងនៅតែបន្តនោះ គឺជាសញ្ញាណមួយដ៏អាក្រក់ដែលអ្នកបញ្ជាទិញអាចបញ្ឈប់ការទិញនៅកម្ពុជា»។
ទស្សនាវដ្ដីមនោរម្យព័ងអាំងហ្វូ មិនទាន់ទទួលបានប្រតិកម្មពីរដ្ឋាភិបាល តាមរយៈក្រសួងការងាររបស់ខ្លួន នៅឡើយនៅល្ងាចថ្ងៃនេះ។ តែការប្រកាន់ជំហរបស់ មេដឹកនាំសហជីពទាំងនេះ ត្រូវបានសហជីពផ្សេងទៀត ដែលមានជំហរស្និតនឹងរដ្ឋាភិបាល និងថៅកែរោងចក្រ ចាត់ទុកថាខុសច្បាប់។ ក្នុងលិខិតមួយចុះថ្ងៃទី២២ ខែមករា ផ្ញើរទៅឲ្យរដ្ឋមន្ត្រីក្រសួងការងារ ក្រុមសហជីពដែលមានចំនួន៦៤ បានធ្វើការប្រឆាំងទៅនិងមេដឹកនាំសហជីព មួយចំនួន«តូច»ទាំងនេះ ថាជាការញុះញង់បន្តឲ្យកម្មករធ្វើកូដកម្ម បាតុកម្ម ទាមទារតមម្លើងប្រាក់ខែ១៦០ដុល្លារអាមេរិកក្នុងមួយខែ៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ២២ ខែមករា ឆ្នាំ២០១៤