មនុស្សជាច្រើនសិបនាក់ បានរងរបួសដោយសារការផ្ទុះគ្រាប់បែកឆ្នៃមួយគ្រាប់ នៅកណ្ដាលហ្វូងបាតុករ​ប្រឆាំង​រដ្ឋាភិបាល កាលពីថ្ងៃសុក្រទៅ១៧ ខែមករា ក្នុងរាជធានីបាងកកប្រទេសថៃ។ នៅយប់ថ្ងៃដដែល គ្រាប់បែកឆ្នៃ​មួយ​គ្រាប់ទៀត ត្រូវ​បានបោះចូលទៅក្នុង គេហដ្ឋានរបស់អភិបាលរាជធានី តែមិនបានធ្វើឲ្យរបួសអ្វីទេ។ ហេតុការណ៍ដ៏​អាក្រក់ បាន​បន្ថែម​ភាពតានតឹង ឲ្យមានកម្រិតខ្លាំងទ្វេឡើង ហើយបានបង្កការព្រួយបារម្ភពីអំពើហិង្សាផ្សេងទៀត ថានឹងអាច​កើត​មាន​ឡើងនៅទូទាំងប្រទេស។

សកម្មភាពទាញអ្នករងរបួស ចេញពីរថយន្ដបន្ទាប់ពីការបំផ្ទុះគ្រាប់បែបថ្ងៃទី១៧ ខែមករាឆ្នាំ២០១៤នោះ។ (រូបថត AFP)

នយោបាយថៃ - គ្រាប់បែកឆ្នៃនេះបានផ្ទុះឡើងតែប៉ុន្មានម៉ែត្រប៉ុណ្ណោះ ខាងមុខមេដឹកនាំបាតុកម្ម លោក ស៊ូថេប ថោងស៊ូបាន (Suthep Thaugsuban) ប៉ុន្តែមិនបានធ្វើឲ្យលោករងរបួសអ្វីទេ។ អ្នកនាំពាក្យរបស់មេដឹកនាំបាតុករ លោក អាកាណាត ប្រូមផាន (Akanat Promphan) បាននិយាយថា គ្រាប់បែកត្រូវបានគប់សំដៅរថយន្ដមួយ ដែល​បើកបរដោយក្រុមបាតុករ។

ផ្នែកសង្គ្រោះបន្ទាន់នៃរាជធានីបាងកក បានអះអាងថា មនុស្ស៣៦នាក់ បានរងរបួស ហើយភាគច្រើនពីក្នុងនោះ​មានសភាពស្រាល។ មានតែបុរសម្នាក់ប៉ុណ្ណោះ ដែលចាំបាច់ត្រូវចូលទៅធ្វើការវះកាត់ជាបន្ទាន់។

នគរបាលបាននិយាយថា គ្រាប់បែបនោះត្រូវបានគេគប់ចេញ ពីអាគារបោះបង់ចោលមួយ។ អាគារនោះ​ត្រូវបាន​ក្រុមបាតុករ ចូលទៅឆែកឆេរភ្លាមៗនោះដែរ តែមិនបានរកឃើញអ្វីនោះទេ។

នគរបាលបានថ្លែងឲ្យដឹងទៀតថា នៅក្នុងយប់ដដែលនេះ មនុស្សពីរនាក់បានជិះម៉ូតូ បានបោះគ្រាប់បែក​ឆ្នៃ​របៀប​នេះមួយទៀត ចូលទៅក្នុងលំនៅដ្ឋានអភិបាលរាជធានីបាងកក។ លោកអភិបាលរាជធានី សមាជិកមួយរូប​នៃ​គណបក្សប្រជាធិបតេយ្យ (បក្សប្រឆាំង) ដែលគាំទ្របាតុកម្ម មិនមានវត្តមាននៅក្នុងលំនៅដ្ឋានរបស់លោកនោះទេ នៅពេលហេតុការណ៍នេះកើតឡើង ហើយក៏មិនមាននរណាទទួលរងគ្រោះថ្នាក់អ្វីដែរ។

ប្រទេសថៃបានជាប់គាំង ទៅក្នុងរលកបាតុកម្ម ទាមទារឲ្យនាយករដ្ឋមន្ត្រី ដែលចេញពីការបោះឆ្នោតឆ្នាំ២០១១ លោកស្រី យីងឡាក់ ស៊ីណាវ៉ាត្រា ប្អូនស្រីលោក ថាក់ស៊ីន ស៊ីណាវ៉ាត្រា លាចេញពីតំណែង តាំងពីជាងពីរខែ​មក​ហើយ។ ក្រុមបាតុករប្រឆាំង បានបិទផ្លូវសាធារណៈជាច្រើននៃរាជធានី នៅក្នុងសប្ដាហ៍នេះ ដោយបានប្រើ​ស្បោ​ងដីខ្សាច់ កងឡាន និងរបាំងដែក។

ក្រុមបាតុករ ដែលមានបំណងចង់ឲ្យលប់ចោលនូវការបោះឆ្នោតដែលនឹងរៀបចំធ្វើនៅថ្ងៃទី២ ខែកុម្ភះខាងមុខនេះ ត្រូវបានគេមើលឃើញជាទូទៅ ថាបានធ្វើការទាមទាររបស់ខ្លួន តាមបែបសន្តិវិធី ប៉ុន្តែមានសេចក្ដីរាយការណ៍​ពី​អំពើហិង្សា ថាបានកើតឡើងនៅពេលយប់។ ការបាញ់បោះ សំដៅការជួបជុំគ្នានេះ និងការបំផ្ទុះគ្រាប់តូចតាចមួយ​ចំនួន ត្រូវបានធ្វើនៅក្នុងលំនៅដ្ឋាននៃមេដឹកនាំបាតកម្ម។ ប៉ុន្តែគេនៅមិនទាន់ដឹងថា នរណាជាអ្នកនៅពីក្រោយ​ការ​វាយប្រហារទាំងនោះទេ។

អំពើហិង្សាដែលចេះតែបន្តទាំងនេះ អាចនឹងជំរុញឲ្យមានរដ្ឋប្រហារមួយឡើងដោយពួកយោធា ដែលជាអ្វីដែល​ក្រុមប្រឆាំង​កំពុងចង់បាន។ កងទ័ពថៃ បានធ្វើរដ្ឋប្រហារទាមទារយកអំណាចចំនួន១១ដងរួចមកហើយ រាប់ចាប់​តាំងពីប្រទេសសៀម បានបិទបញ្ចប់រាជានិយមផ្ដាច់ការ នៅឆ្នាំ១៩៣២ ក្លាយជាប្រទេសថៃ ដែលមានរបប​រាជានិយមអាស្រ័យរដ្ឋធម្មនុញ្ញនោះមក៕

------------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី១៧ ខែមករា ឆ្នាំ២០១៤