ការចោទប្រកាន់មេដឹកនាំបក្សប្រឆាំងថៃ ជាការដោះដូរនយោបាយ?
ខណៈបាតុករប្រឆាំងបានចុះតាមដងផ្លូវ តាំងពីជាងមួយខែមកហើយ ដើម្បីទាមទារឲ្យនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រា ចុះចេញពីតំណែងនោះ នៅក្នុងតុលាការឯណោះវិញ តុលាការបានធ្វើការចោទប្រកាន់លោក អាភីសិត វៀចាជីវ៉ា (Abhisit Vejjajiva) ប្រធានគណបក្សប្រជាធិបតេយ្យដែលជាគណបក្សប្រឆាំង ពីបទ«មនុស្សឃាត»នៅពេលដែលមានការបង្ក្រាបមួយ ទៅលើបាតុកម្មនៃក្រុមអាវក្រហមកណ្ដាលរាជធានីបាងកក កាលពីឆ្នាំ២០១០។
លោក អាភីសិត វៀចាជីវ៉ា នៅក្នុងតុលាការ ថ្ងៃទី១២ ខែធ្នូ ឆ្នាំ២០១៣។ (រូបថត AP)
នយោបាយថៃ - នៅឆ្នាំ២០១០ លោក អាភីសិទ វៀចាជីវ៉ា ស្ថិតក្នុងតំណែងជានាយករដ្ឋមន្ត្រី ហើយការបង្ក្រាបបាតុករអាវក្រហម ស្និតនឹងអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រា ដែលកងកម្លាំងប្រដាប់អាវុធធ្វើនៅពេលនោះ បានធ្វើឲ្យមនុស្ស៩០នាក់ស្លាប់ និង១៩០០នាក់ផ្សេងទៀត រងរបួស។ បច្ចុប្បន្ន លោក អាភីសិត ជាប្រធានគណបក្សប្រឆាំងរូបនេះ ត្រូវបានតុលាការចោទប្រកាន់ នៅថ្ងៃព្រហស្បត្តិ៍ទី១២ខែធ្នូថា លោកមានជាប់ពាក់ព័ន្ធនៅក្នុងព្រឹត្តិការណ៍នោះ។
«កូនក្ដីរបស់ខ្ញុំ បានច្រានចោលការចោទប្រកាន់ទាំងនោះ» នេះជាការប្រកាសរបស់មេធាវី ការពារក្ដីឲ្យលោក អាភីសិត។ ចំណែកលោក អាភីសិតវិញ មិនបានបកស្រាយអ្វី នៅចំពោះមុខក្រុមអ្នកការសែតនោះទេ។ លោកត្រូវបានតុលាការអនុញ្ញាត ឲ្យនៅក្រៅឃុំជាបណ្ដោះអាសន្ន ដើម្បីរងចាំថ្ងៃបើកសវនាការ ដែលនឹងត្រៀមធ្វើនៅថ្ងៃទី២៤ ខែមិនា ឆ្នាំ២០១៤ខាងមុខ។
លោក ស៊ូថេប ថោងស៊ូបាន ដែលនៅឆ្នាំ២០១០ជាឧបនាយករដ្ឋមន្ត្រី ក៏ត្រូវបានតុលាកាធ្វើការចោទប្រកាន់ដូចគ្នា តែលោកមិនមានវត្តមាននៅក្នុងតុលាការ នៅថ្ងៃនេះទេ។ តុលាការបានសង្ស័យថា លោកបានបញ្ជាឲ្យកងកម្លាំងប្រដាប់អាវុធ ឲ្យប្រើកាំភ្លើងជាមួយគ្រាប់ពិត បាញ់ទៅលើបាតុករនៅសម័យកាលនោះ។ បើទោះជានៅពេលនេះ មានដីការឲ្យចាប់ខ្លួនលោក ពីបទពន្យុះឲ្យបាតុករចូលទន្ទ្រានអាគារសាធារណៈ និងពីបទបំបះបំបោរក៏ដោយ ក៏លោក ស៊ូថេប នៅតែមានសេរីភាព ហើយបានកំពុងដឹកនាំបាតុកម្ម ដែលមានរយៈពេលជាង១ខែមកហើយ ប្រឆាំងនឹងរដ្ឋាភិបាលសព្វថ្ងៃ ដឹកនាំដោយ លោកស្រី យីងឡាក់ ស៊ីណាវ៉ាត្រា។
សំនុំរឿងក្ដីដ៏ចម្រូងចម្រាស់នេះ បានកើតឡើងចំពេលដែលប្រទេសថៃ កំពុងឆ្លងកាត់ពេលវេលាមួយដ៏លំបាក។ សាស្ត្រាចារ្យមួយរូប ពីសកលវិទ្យាល័យជូឡាឡុងកន ដែលជាអ្នកតាមដានសភាពការណ៍នយោបាយនេះយ៉ាងជិតដិតនោះ បានសម្លឹងឃើញបញ្ហានេះ ដោយដាក់ចេញនូវសេចក្ដីសន្និដ្ឋានពីរយ៉ាង៖
ទីមួយ៖ ការចោទប្រកាន់ដោយតុលាការ ទៅលើមេដឹកនាំគណបក្សប្រឆាំង នឹងអាចដុតកម្ដៅក្រុមបាតុករប្រឆាំង ដែលកំពុងតែមានកម្លាំងស្រាប់ ឲ្យធ្វើសកម្មភាពកាន់តែខ្លាំងឡើងថែមទៀត ហើយអាចឈានទៅប្រើហិង្សាដើម្បីរំលំរដ្ឋាភិបាល លោកស្រី យីងឡាក់។ ប៉ុន្តែ ដំណោះស្រាយទីមួយនេះ នឹងអាចធ្វើឲ្យប្រទេសថៃត្រូវបែកជាពីរ ដោយសារតែក្រុមអាវក្រហម ដែលគាំទ្រមិនងាកររនូវគ្រួសារត្រកូល ស៊ីណាវ៉ាត្រានោះ ច្បាស់ជាមិនទុកឲ្យបាតុករអាវលឿងសព្វថ្ងៃ ធ្វើអ្វីស្រេចនឹងចិត្តនោះទេ។
ទីពីរ៖ រដ្ឋាភិបាលអាចប្រើរូបភាព នៃការចោទប្រកាន់របស់តុលាការ ដើម្បីទប់ទល់នឹងបាតុកម្មប្រឆាំង ហើយក៏អាចបង្ខំឲ្យមេដឹកនាំគណបក្សប្រឆាំងទាំងនេះ ឲ្យចូលមកចរចារជាមួយខ្លួនឡើងវិញ។ សេចក្ដីសន្និដ្ឋានទីពីរ ទំនងជាអាចមានហេតុផលរបស់វា ហើយអាចធ្វើឲ្យសភាពការណ៍រំជើបរំជួលថ្ងៃនេះ ត្រឡប់មករកភាពស្ងប់ស្ងាត់វិញ។ មិនត្រឹមតែប៉ុណ្ណោះ បើការចរចារកើតមានមែន វាទំនងជាអាចឈាន ទៅរកការលើកលែងទោសលោក ថាក់ស៊ីន ដែលបានគេចខ្លួនទៅក្រៅប្រទេស ពីការផ្ដន្ទាទោសរបស់តុលាការថៃ ពីបទពុករលួយនោះថែមទៀតផង។
នៅយប់ថ្ងៃព្រហស្បត្តិ៍នេះ លោកស្រី យីងឡាក់ បានធ្វើសេចក្ដីអំពាវនាវមួយ អញ្ជើញគ្រប់ភាគីទាំងអស់ ដើម្បីចូលរួមពិភាក្សាដោះស្រាយវិបត្តិ ដែលនឹងប្រព្រឹត្តិនៅថ្ងៃអាទិត្យខាងមុខ។ លោកស្រី បានបញ្ជាក់នៅក្នុងសេចក្ដីថ្លែងនោះថា រដ្ឋាភិបាលចង់បានយោបល់របស់ អ្នកដែលពាក់ព័ន្ធទាំងអស់ ដើម្បីកសាងប្រទេសថៃឆ្ពោះទៅមុខទាំងអស់គ្នា។ ប៉ុន្តែក្រោយពីការប្រកាសរបស់នាយករដ្ឋមន្ត្រី អ្នកនាំពាក្យក្រុមបាតុករប្រឆាំង បានច្រានចោលការស្នើសុំនោះ ដោយនិយាយថា លោកស្រី យីងឡាក់ មិនឆ្លើយឲ្យចំនឹងការចង់បានរបស់បាតុករ។
ទោះបីជាយ៉ាងណាក៏ដោយ គេនឹងរងចាំមើល នៅពេលអនាគត ថានឹងមានរឿងអ្វីកើតឡើងពិតប្រាកដ។ សូមបញ្ជាក់ដែរថា គណបក្សប្រជាធិបតេយ្យរបស់លោក អាភីសិទ រៀចាជីវ៉ា មិនដែលបានឈ្នះឆ្នោតសកលនោះទេ តាំងពី២០ឆ្នាំមកហើយ។ ប៉ុន្តែលោក និងគណបក្សរបស់លោក បានកាន់អំណាចចំនួនបីឆ្នាំ ពី២០០៨ មកឆ្នាំ២០១១ ដោយសារសាលដីការមួយរបស់តុលាការ បានរំលាយគណបក្សនយោបាយឈ្នះឆ្នោត៕
------------------------------------------------
ដោយ ៖ កេសរកូល - ភ្នំពេញ ថ្ងៃទី១២ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ