បន្ទាប់ពីត្រូវបានកោះហៅអោយចូលទៅបំភ្លឺ នៅសាលាដំបូងរាជធានីភ្នំពេញរួចមក ហើយមិនត្រូវបានចោទ​ប្រកាន់​នោះ លោក សម រង្សី និងលោក កឹម សុខា មេដឹកនាំគណបក្សប្រឆាំងប្រកាសជំហរថា នឹងនៅតែបន្តទាមទារ​រក​យុត្តិធម៌ជូនប្រជាជន ដើម្បីអោយមានការបោះឆ្នោតឡើងវិញ។

លោក កឹម សុខា (ខាងឆ្វេង) និងលោក សម រង្ស៊ី នៅក្នុងសន្និសីទការសែតរបស់គណបក្សសង្គ្រោះជាតិ ថ្ងៃទី២៨ ខែធ្នូ ឆ្នាំ២០១៣។ (រូបថត MONOROOM.info/ O.Vary)

ប្រព័ន្ធយុត្តិធម៌ - «ខ្ញុំសូមប្រាប់ទៅអ្នកដែលចង់ធ្វើបាប សម រង្សី កឹម សុខាអោយដឹងថា បើចង់ធ្វើបាប​គឺមិនអាច​ធ្វើរួចបានទេ» នេះជាការថ្លែងរបស់លោកកឹម សុខា ទៅកាន់អ្នកចួលរួមជាច្រើនរយនាក់ នៅទីស្នាក់ការរបស់ខ្លួន ក្រោយពីចេញពីការចូលទៅបំភ្លឺរួច នៅសាលាដំបូងរាជធានីភ្នំពេញ កាលពីថ្ងៃទី ១៤ ខែមករា ឆ្នាំ២០១៤ ម្សិលម៉ិញ​នេះ។

លោកបន្តថា បើទោះបីជាមានគេចាំតែចោតប្រកាន់ មូលបង្កាត់យ៉ាងណាក៏ដោយ ក៏លោកនៅតែប្រកាន់​គោលជំហរ​ការពារប្រជាជនខ្មែរ «យើងខ្ញុំ អត់រុញរាទេ នឹងនូវតែបន្តបំរើបងប្អូនតទៅមុខទៀត»។

លោក កឹម សុខា បានបន្តទៀតថា «យើងមិនខ្លាចចំពោះច្បាប់ទេ តែយើងខ្លាចចំពោះច្បាប់ណាដែលមិនត្រឹមត្រូវ»។ ការលើកឡើងរបស់លោក ទំនងជាចង់សំដៅដល់ភាពមិនឯករាជ្យរបស់ប្រព័ន្ធតុលាការកម្ពុជា ដែលលោក​យល់​ថា​ស្ថានប័នតុលាការ ដែលស្ថិតនៅក្រោមអ្នកនយោបាយ។ ទាក់ទងនិងបញ្ហានេះ លោកក៏បានបញ្ជាក់ពីបញ្ហា ដែល​អ្នកនយោបាយបង្គាប់ ទៅកាន់តុលាការកម្ពុជាដែរថា «បើអត់មានសម្ពាធនយោបាយពីលើ មកកាន់​ព្រះរាជ​អាជ្ញា​តុលាការអោយធ្វើអីទេនោះ រឿងហ្នឹងវាចប់ហើយអត់មានអីទេ។ ហើយបើគេចង់ធ្វើអីទៀត គេនឹងបញ្ជាមកតុលាការ​ទៀតហើយ។ សូមបងប្អូនតាមឃ្លាំងមើល តើគេចង់ធ្វើអីយើងទៀត។»

ទស្សនាវដ្ដីមនោរម្យព័ងអាំងហ្វូមិនអាចទទួលបានប្រតិកម្ម ឬការបកស្រាយពន្យល់ណាមួយ ពីសាលាដំបូងរាជធានី​ជុំវិញការកោះហៅទៅសាកសួរ នូវមេដឹកនាំប្រឆាំង រួមទាំងមេដឹកនាំសហជីពមួយរូបទៀត កាលពីថ្ងៃទី១៤ ខែមករា​ នោះនៅឡើយ។ តែសូមបញ្ជាក់ថា អយ្យការអមសាលាដំបូង លោក ហៀង សុភក្ត្រ បានចេញដីការកោះហៅ ក្រុម​មេ​ដឹកនាំប្រឆាំងទាំងបីរូបនេះ អោយទៅបំភ្លឺកាលពីថ្ងៃទី០៤ ខែមករា ពីបទញុះញង់អោយ​មានអំពើហិង្សា ក្នុងអំឡុង​ពេលកម្មករធ្វើបាតុកម្ម-កូដកម្ម កាលពីពេលថ្មីៗនេះ។

ដោយឡែក លោកសម រង្ស៊ី ប្រធានគណបក្ស​សង្រ្គោះជាតិ ដែលឈរនៅក្បែរអនុប្រធានរបស់លោក បានថ្លែង​ចាត់ទុកថា នោះជាជោគជ័យដ៏ធំមួយ ដែលប្រព័ន្ធតុលាការកម្ពុជាពោរពេញទៅដោយភាពមន្ទិល «មិនអាចធ្វើអ្វី សម រង្ស៊ី កឹម សុខា បាន»។ លោកបាន​ចោទ​សួរសំនួរ បកត្រឡប់ទៅស្ថាប័នតុលាការវិញយ៉ាងខ្លីថា «បើ​យើងទៅបំភ្លឺ ម៉េច​គេមិនហៅអ្នកបាញ់មកផង»។

ក្នុងទឹកមុខញញឹមពព្រាយ ខណៈដែលតុលាការមិនបានធ្វើការចោទប្រកាន់នោះ ប្រធានគណបក្សប្រឆាំង បាន​ថ្លែងអោយដឹងទៀតថា «ព្រឹកនេះយើងទៅបំភ្លឺនៅតុលាការ ដើម្បីអោយពិភពលោកគេដឹងការពិត ថាយើងមាន​ធ្វើ​អ្វីខុសទេ យើងគ្រាន់តែការពារឆន្ទៈប្រជាពលរដ្ឋដោយអហិង្សា និងសន្តិវិធី ឃើញថាហើយពិភពលោក គេការពារ​កម្មករមិនមែនបាញ់សំលាប់កម្មករនោះទេ»។ ការថ្លែងរបស់មេដឹកនាំក្រុមប្រឆាំងបែបនេះ ត្រូវបានអ្នកគាំទ្រ​នៅ​ទី​នោះ ទះដៃអបអរយ៉ាងខ្លាំង ដែលធ្វើឲ្យគេគិតថា ប្រជាប្រិយភាពរបស់លោក កាន់តែកើនខ្លាំងឡើង។ មិនត្រឹមតែ​ប៉ុណ្ណោះ លោក សម រង្ស៊ី បានសន្យានឹងក្រុមអ្នកគាំទ្រទៀតថា បាតុកម្ម​តវ៉ា អោយមានការបោះឆ្នោត​ឡើងវិញ នឹង​នៅ​តែកើតមាន បើទោះបីជាធ្លាប់មានការបង្រ្កាបម្តងកាលពីថ្ងៃទី៤ ខែមករា ឆ្នាំ​២០១៤កន្លងទៅថ្មីនេះក៏ដោយ។

មេដឹកនាំគណបក្សប្រឆាំង បានចោទជាសំណួរទៅ ក្រុមអ្នកគាំទ្រថា «តើនៅពេលណា ដែលគណបក្សសង្រ្គោះ​ជាតិធ្វើបាតុកម្ម បងប្អូនមករួមទៀតដែរឬទេ? (...) អញ្ចឹងចាំជួបគ្នាពេលខាងមុខនេះ៕»

-----------------------------------------------
ដោយ៖ក. ចាន់នីតា (ទំនាក់ទំនង៖[email protected])-ភ្នំពេញ ថ្ងៃទី១៥ ខែមករា ឆ្នាំ២០១៤