ជាថ្មីម្ដងទៀត នាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា បានឆ្លើយបដិសេធ តបទៅកាន់ឱសានវាទ​របស់​មេដឹកនាំបាតុកម្ម ដែលបានកំណត់រយៈពេល២ថ្ងៃ  ដើម្បីទាមទារឲ្យលោកស្រីបង្កើត«ក្រុមប្រឹក្សាប្រជាជន»​មួយ ដោយបានចាត់ទុកថាការទាមទារនោះ គ្មាន«ធម្មនុញ្ញភាព»។ តែទោះជាយ៉ាងណាក៏ដោយ  ក៏លោកស្រី ត្រៀម​ខ្លួនរួចជាស្រេចថានឹងធ្វើនូវរាល់អ្វីៗ ដើម្បីយកសុខសន្តិភាពត្រឡប់មកវិញ និងបិទបញ្ចប់នូវបាតុកម្មហិង្សា ដែល​បាន​ធ្វើប្រឆាំងនឹងរដ្ឋាភិបាលលោកស្រី។

លោកស្រី យីងឡាក់ ស៊ីណាវ៉ាត្រា នាយករដ្ឋមន្ត្រីថៃ ថ្លែងអង្វរប្រជាជាតិ។ (រូបថត Wason Wanonchakorn, AP)

នយោបាយថៃ - លោកស្រីយីងឡាក់ ស៊ីណាវ៉ាត្រា បានថ្លែងបញ្ជាក់បែបនេះ នៅក្នុងសន្និសិទការសែតមួយ ដែល​ផ្សាយតាមកញ្ចក់ទូរទស្សន៍ ដែលបង្ហាញឲ្យឃើញជាថ្មីទៀត ពីភាពជាប់គាំងខាងនយោបាយ នៅក្នុងប្រទេសថៃ​បច្ចុប្បន្ន ខណៈពេលដែលអំពើហិង្សា និងការប្រឈមមុខរវាងកងកម្លាំងនគរបាល និងក្រុមបាតុករប្រឆាំង កំពុងបន្ត​រីករាលដាលនៅតាមដងផ្លូវ។

ក្រុមបាតុករបានប្រើប្រាស់រថយន្ដប្រមូលសម្រាម ដើម្បីព្យាយាមបុកទម្លាយ​រនាំង​បេតុង ដែលដាក់ខណ្ឌសម្រាប់​ការពារទីស្ដីការរដ្ឋាភិបាល និងអាគារផ្សេងទៀត។ កងកម្លាំងនគរបាលបានព្យាយាម​រុញច្រានក្រុមបាតុករ ដោយប្រើ​ឧស្ម័នបង្ហូទឹកភ្នែក បំពង់បាញ់ទឹក និងបាញ់គ្រាប់កៅស៊ូ ខណៈពេលក្រុមបាតុករ​បាន​តបតរវិញ ដោយប្រើគ្រាប់បែក​កែឆ្នៃ។

រលកចលនារបស់ក្រុមបាតុករប្រឆាំង ដែលចង់ទម្លាក់រដ្ឋាភិបាលរបស់​លោកស្រី យីងឡាក់ នេះ បានធ្វើឲ្យរង្គើដល់​សេដ្ឋកិច្ចរបស់ប្រទេស ហើយក្នុងពេលខាងមុខនេះ ក៏អាចទំនងនឹងប៉ះពាល់ដល់រដូវកាលទេសចរណ៍ ដែលប្រទេស​ថៃធ្លាប់តែមានកេរ្ត៍ឈ្មោះល្បីល្បាញនោះទៀតផង។

នៅក្នុងតុល្យភាពផ្លូវការ បានឲ្យដឹងថា យ៉ាងហោចណាស់​មនុស្ស​បីនាក់បានស្លាប់ និងច្រើនជាង២០០នាក់​ផ្សេង​ទៀតរងរបួស នៅក្នុងការប្រឈមមុខរវាងក្រុមបាតុករ និង​កង​កម្លាំងនគរបាលក្នុងរយៈពេលបីថ្ងៃចុងក្រោយនេះ។

ជាមួយសម្លេងក្នុងន័យអង្វរក ប៉ុន្តែម៉ត់ចត់ នាសន្និសិទការសែត លោកស្រី យីងឡាក់ បានថ្លែងថា «ប្រសិនជាមានអ្វី​ដែលខ្ញុំអាចធ្វើបាន ដើម្បីប្ដូរយកសន្តិភាពទៅឲ្យប្រជាជនថៃ ខ្ញុំរីករាយនឹងធ្វើ»។ លោកស្រីបន្តថា «រដ្ឋាភិបាលបើក​ចំហរជានិច្ច ដើម្បីការចរចារទាំងឡាយ។ ប៉ុន្តែសម្រាប់ខ្លួនខ្ញុំផ្ទាល់ ខ្ញុំមើលមិនឃើញពីដំណោះស្រាយ ដែលគោរព​ច្បាប់​និងរដ្ឋធម្មនុញ្ញ ដើម្បីឆ្លើយតបទៅនឹងបញ្ហា (ឱសានវាទ) នេះទេ។»

សូមរំលឹកឡើងវិញថា មេដឹកនាំបាតុករ លោក ស៊ូថេប ថោងស៊ូបាន បានជួបលោកស្រី យីងឡាក់ នៅយប់ថ្ងៃអាទិត្យ​ទី០១ខែធ្នូ ម្សិលម៉ិញ ហើយបានបញ្ជាក់ពីជំហរ មិនចង់បានការលាលែងតំណែងរបស់នាយករដ្ឋមន្ត្រី ឬការបើឆ្នោត​មុន​កាលកំណត់នោះទេ។ ប៉ុន្តែនៅចំពោះមុខ លោកស្រី យីងឡាក់ ដែលបានជាប់ឆ្នោត​តាមលិទ្ធិប្រជាធិបតេយ្យ​កាល​ពី ឆ្នាំ២០១១នោះ លោក ស៊ូថេប មានបំណងចងឲ្យលោកស្រីបង្កើត«ក្រុមប្រឹក្សាប្រជាជន»មួយ ដែល​មិនចេញ​ពីការបោះឆ្នោត ឲ្យជ្រើសតាំងនាយករដ្ឋមន្ត្រីថ្មីមួយរូបទៅវិញ។ ការទាមទារនេះ បានរងនូវការរិះគន់យ៉ាងច្រើន ថា​មិនស្របតាមលិទ្ធិប្រជាធិបតេយ្យ។

លោកស្រី យីងឡាក់ បានបញ្ជាក់បន្តទៀតថា «ខ្ញុំមិនដឹងថាតើអាចទទួលយកយ៉ាងដូចម្ដេច នូវការទាមទាររបស់​លោក ស៊ូថេប។ យើងមិនដឹងត្រូវធ្វើយ៉ាងដូចម្ដេចទេ។ នៅពេលឥឡូវនេះ យើងមើលមិនឃើញច្រកចេញ ដែល​អធម្មនុញ្ញភាពបែបនេះ ថាអាចឆ្លើយតបនឹងវិបត្តិនោះទេ៕»

------------------------------------------------
ដោយ ៖ កេសរកូល - ភ្នំពេញ ថ្ងៃទី០២ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ