ថៃ៖ ដីការតុលាការលើកទីពីរ ឲ្យចាប់ខ្លួនមេបាតុករ ពីបទបំបះបំបោរ
ដីការឃាត់ខ្លួន ពីបទបំបះបំបោរ ត្រូវបានចេញផ្សាយប្រឆាំងនឹងមេដឹកនាំបាតុកម្ម លោក ស៊ូថេប ថោងស៊ូបាង នៅរាជធានីបាងកក។ នេះបើតាមការឲ្យដឹង របស់នគរបាលជាតិថៃ នៅយប់ថ្ងៃចន្ទទី២ខែវិច្ឆិកានេះ បន្ទាប់ពីការប្រឈមមុខដាក់គ្នាយ៉ាងតឹងតែង រវាងកងកម្លាំងនគរបាល និងក្រុមបាតុករ ដែលចាងទម្លាក់រដ្ឋាភិបាល។
មេដឹកនាំបាតុកម្ម លោក ស៊ូថេប ថោងស៊ូបាង ថ្លែងនៅលើវេទិកាបាតុកម្ម។ (រូបថត AP0)
បទល្មើស - អគ្គស្នងការរងនគរបាលជាតិថៃ លោក ចៃយុទ្ធ តាណាតាវៀរ៉ាត់ (Chayut Thanataweerat) បានប្រកាសតាមទូរទស្សន៍ថា «បន្ទុកនៃបទចោទប្រកាន់ ទាក់ទងនឹងការបះបោរ ដែលបានដាក់ចេញប្រឆាំងនឹង មេដឹកនាំបាតុកម្មលោក ស៊ូថេប ថោងស៊ូបាន មានទម្ងន់ទោសស្មើទោសប្រហារជីវិត ឬជាប់ពន្ធនាគារអស់មួយជីវិត»។
ការសែតបាងកកប៉ុស្ដ៍ បានធ្វើសេចក្ដីរាយការណ៍មួយដែរ ថាក្រៅពីលោក ស៊ូថេប មេដឹកនាំបាតុកម្មសំខាន់ៗផ្សេងទៀត យ៉ាងហោចណាស់ចំនួន៤រូប គឺលោកនីធីថន ឡាំលឿ, លោកឧថៃ យុដម៉ានី, លោករ៉ាត់ចាយុទ្ធ ស៊ីរ៉ាយោធិនផាក់ឌី និងលោកភីជីត ចៃមង្គល ក៏នឹងត្រូវប្រឈមមុខ នឹងការចាប់ខ្លួនយកមកផ្ដន្ទាទោស ដោយតុលាការឧក្រិដ្ឋកម្មថៃនោះដែរ។ បើតាមមាត្រា១១៣ នៃច្បាប់ព្រហ្មទណ្ឌថៃ ជនជាប់សង្ស័យទាំងនេះ នឹងត្រូវប្រឈមនឹងការផ្ដន្ទាទោស ដ៏ធ្ងន់បំផុតមួយ។
តែអ្វីដែលនៅជាមន្ទិលនៅពេលនេះ នៅត្រង់ថា តើដីការឃាត់ខ្លួនខាងលើនេះ នឹងត្រូវយកមកអនុវត្តន៍មែនឬយ៉ាងណា។ សូមបញ្ជាក់ថា ដីការឃាត់ខ្លួនលើកទីមួយមុននេះ ប្រឆាំងលោក ស៊ូថេប ពីបទដឹកនាំបាតុកម្មចូលកាន់កាប់ ក្រសួងហិរញ្ញវត្ថុ មិនបានធ្វើឲ្យលោក ស៊ូថេប ខ្លាចរអាអ្វីឡើយ។ មិនត្រឹមតែលោកនៅមានសេរីភាព ធ្វើការជួបប្រជុំជាមួយក្រុមបាតុករ ដោយសេរីប៉ុណ្ណោះទេ លោក ស៊ូថេប នៅថែមទាំងត្រូវបានទទួល ឲ្យមកជួបតទល់មុខ ជាមួយនាយករដ្ឋមន្ត្រី យីងឡាក់ ស៊ីណាវ៉ាត្រា កាលពីថ្ងៃអាទិត្យទី១ខែធ្នូនោះទៀតផង៕
------------------------------------------------
ដោយ ៖ កេសរកូល - ភ្នំពេញ ថ្ងៃទី០២ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ