រូបភាពមួយ វាបានបង្កប់នូវអត្ថន័យរាប់ពាន់ពាក្យនៅក្នុងនោះ ហើយពេលនេះហ្វេសប៊ុក (Facebook) នឹងអាចឲ្យអ្នក​គ្រប់​គ្នា អាចបន្ថែមអត្ថន័យ ពីលើការសន្ទនារបស់អ្នក កាន់តែអស្ចារ្យបន្ថែម ជាមួយនឹងមុនងារថ្មីស្រឡាងមួយទៀត។

ហ្វេសប៊ុក បង្កើតមុខងារថ្មី សម្រាប់ស្ថាប័នរូបថត របស់ខ្លួន។ (រូបថតជំនួស របស់ mashable.com)

ប្រព័ន្ធបណ្តាញសង្គមដ៏ធំបំផុតរបស់ពិភពលោកមួយនេះ បានប្រកាសពីតួនាទីថ្មីមួយទៀត កាលពីថ្ងៃច័ន្ទ ដែលអនុញ្ញាត​ឲ្យអ្នកប្រើប្រាស់អាចចែករំលែក (share) នូវអាល់ប៊ុមរូបថតបាន ហើយមុខងារថ្មីនេះ ក៏អាចឲ្យអ្នកប្រើប្រាស់អាចបន្ថែម រូបភាព ចូលទៅក្នុងអាល់ប៊ុមតែមួយ យ៉ាងងាយស្រួលផងដែរ។

អាល់ប៊ុមមួយ អ្នកអាចចែករំលែកបាន ៥០ដង និងអាចចែករំលែកម្តងៗ បានរូបថត ២០០សន្លឹក។ ការបង្កើតអាល់ប៊ុមថ្មី វាអនុញ្ញាតឲ្យអ្នកធ្វើការជ្រើសរើសនូវគន្លឹះ ដើម្បីធ្វើការអញ្ជើញអ្នកមិត្តភក្តិផ្សេងៗទៀត ចូលមកចែករំលែក ឬបន្ថែមទៅ​លើអាល់ប៊ុមនោះបាន។ ដោយឡែកបើអ្នកជាអ្នកបង្កើតនូវអាល់ប៊ុមរូបថតនោះ អ្នកអាចមានសិទ្ធគ្រប់គ្រងអាល់ប៊ុមនោះ ទាំងមូលជំនួសមិត្តភក្តិបាន។

គួរបញ្ជាក់ថា កាលពីមុនអ្នកប្រើប្រាស់ អាចត្រឹមតែបញ្ចូលរូបភាពទៅក្នុងអាល់ប៊ុម ដែលបានបង្កើតតែប៉ុណ្ណោះ។ ហើយ​អាល់ប៊ុមនីមួយៗ កំណត់រូបថតត្រឹម ១០០០សន្លឹក។

តួនាទីចែករំលែកអាល់ប៊ុមថ្មីនេះ មានគន្លឹះ (settings) ៣យ៉ាង៖ សាធារណៈ (public), ឲ្យមិត្តភក្តិរបស់អ្នកឃើញ (friends of contributors) និងអ្នកឃើញតែម្នាក់ឯង (contributors only)។ កត្តាទាំងនោះវាជួយឲ្យអ្នកបង្កើតអាល់ប៊ុម អាចត្រួត​ពិនិត្យបានថា តើអ្នកណាបានចូលទៅកាន់ក្រុមនៃរូបថតទាំងអស់នោះ។ លោក បប់ បែដវីន (Bob Baldwin) វិស្វករ​ខាង​កម្មវិធី នៅក្នុងក្រុមហ៊ុនហ្វេសប៊ុកបាននិយាយ។

ការចែករំលែករូបថតលក្ខណៈអាល់ប៊ុមនេះ វាមានសារសំខាន់សម្រាប់ព្រឹត្តិការណ៏នានាជាក្រុមដូចជា៖ ដំណើរកំសាន្ត អាពារហ៏ពិពារហ៏ ពិធីជប់លៀង ឬពិធីជួបជុំគ្រួសារជាដើម។

ទោះជាយ៉ាងណា សម្រាប់នៅលើទូរស័ព្ទដៃ ក្រុមហ៊ុនពុំទាន់បង្កើតនៅឡើយទេ ប៉ុន្តែពួកគេសន្យាថា នឹងធ្វើការអភិវឌ្ឍន៏​បន្ថែមនៅលើទូរស័ព្ទដៃវ៉ៃឆ្លាត ក្នុងពេលឆាប់ៗខាងមុខ។

សម្រាប់ប្រិយមិត្តវិញ តើមានឃើញប៊ូតុងចុចចែករំលែកអាល់ប៊ុមរួបថតហើយ ឬនៅ? បើពុំទាន់ឃើញទេ សូមធ្វើតាម​ការណែនាំខ្លីៗ ដូចតទៅ៖ ចុចលើឈ្មោះរបស់អ្នក - ចុចលើពាក្យហ្វូតូ (Photos) នៅផ្នែកខាងលើ - ចុចលើពាក្យអាល់ប៊ុម (Albums) នៅផ្នែកខាងលើដែរ - បន្ទាប់មកចុចលើអាល់ប៊ុមរូបថតរបស់អ្នកណាមួយ នោះវានឹងមានពាក្យស្សៀ (Share) នៅខាងក្រោម៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ