ក្រុមបាល់ទាត់ហង្សក្រហម លីវើភូល (Liverpool) ត្រូវបានម្ចាស់ក្លិប លោក ចន ហិនរី (John Henry) ប្រកាសលក់នៅតម្លៃ​ប្រមាណ ៣៥០លានផោន (៥៣,៨៤ លានដុល្លាសហរដ្ឋអាមេរិក) បន្ទាប់ពីក្លិបមួយនេះ មិនរីកចំរើនសោះក្នុងរយះពេល​៣ឆ្នាំ ដែលគាត់បានកាន់កាប់។

ក្រុមកីឡាករ លីវើភូល និងកីឡាករ ជេរ៉ា ស្ទេវេន សប្បាយពេលបានជ័យជំនះ។ (រូបថត Liverpool)

មហាសេដ្ឋីសញ្ជាតិអាមេរិក លោកហិនរី និងក្រុមហ៊ុន ហ្វែនវ៉េស្ពតហ្គ្រប់ (Fenway Sports Group) បានចំណាយលុយ ៣០០លានផោន ទិញយកក្រុមម្ចាស់ជើងឯកឆែមពានលីក (Champions League) ៥សម័យកាលរបស់អង់គ្លេសមួយនេះ កាលពីឆ្នាំ២០១០។

កំឡុងពេលដែលលោកហិនរី បានក្លាយជាម្ចាស់ក្លិប ស្របពេលឆ្នាំដែលក្រុមលីវើភូលធ្លាក់ទម្រង់លេងយ៉ាងខ្លាំង រហូត​ដល់​បាត់បង់កៅអីទៅលេងនៅក្របខ័ណ្ឌអ៊ឺរ៉ុប ជាបន្តបន្ទាប់។ ប៉ុន្តែនៅឆ្នាំ២០១០នោះ លោកបានចំណាយរហូតដល់ ១៨៧លាន​ផោន ដើម្បីឲ្យគ្រូបង្វឹកទិញកីឡាករមកពង្រឹងក្រុមឡើងវិញ។

ទោះបីជាយ៉ាងណាក៏ដោយ រយះពេល៣ឆ្នាំចុងក្រោយនេះ លីវើភូលមិនដែលឡើងទៅឈរជិតទីតាំងកំពូល​នៃក្របខ័ណ្ឌ​ព្រីមែលីក (Premier League) នោះទេ។

ប្រភពពីទីក្រុងលីវើភូល បានដកស្រង់សម្តីរបស់លោកហិនរី និងក្រុមហ៊ុនកីឡារបស់អាមេរិកថា៖ «ពួកគេមកកាន់កាប់​ក្លិបនេះ ដើម្បីចង់ជួយ និងដើម្បីប្រាក់ចំណេញផងដែរ ប៉ុន្តែក្លិបមិនបានទៅលេងក្នុងក្របខ័ណ្ឌអ៊ឺរ៉ុប ហើយថែមទាំង​ត្រដាបត្រដួសក្នុងលីកទៀត ទោះបីជាគាត់ចំណាយអស់ច្រើនសន្ធឹកសន្ធាប់យ៉ាងណាក៏ដោយ។»

គួរបញ្ជាក់ថា ក្រោមការដឹកនាំរបស់អតីតគ្រូបង្វឹក លោកខិនី ដាងគ្លីស (Kenny Dalglish) លីវើភូលបានទិញកីឡាករ​ថ្លៃៗ​ជាច្រើនរូប ប៉ុន្តែលេងពុំបានល្អនោះទេ ជាក់ស្តែងដូចជាខ្សែប្រយុទ្ធ អេនឌី ខារ៉ូល (Andy Carroll) ទិញចូលក្នុងតម្លៃ ៣៥​លានផោន ប៉ុន្តែលក់ចេញទៅវិញ បានតែ ១៩លានផោន បន្ទាប់ពីគ្មានប្រសិទ្ធភាពក្នុងការរកគ្រាប់បាល់បញ្ចូលទី។

កាសែតដឹសាន់ (The Sun) បានរាយការណ៏ថា បច្ចុប្បន្នក្លិបលីវើភូល មានមហាសេដ្ឋី៣រូបកំពុងតែចាប់អារម្មណ៏ និងចង់​គ្រប់គ្រងបន្ត ក្នុងនោះមានមហាសេដ្ឋីប្រេង ប្រទេសសៅឌីអារ៉ាប៊ី១រូប និងមហាសេដ្ឋីអាមេរិក២រូបផ្សេងទៀត៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ