ព័ត៌មានដ៏រសើបមួយ បានចុះផ្សាយនៅលើភ្នំពេញប៉ុស្តិ៏នាថ្ងៃនេះថា គ្រូបង្វឹកសញ្ជាតិកូរ៉េខាងត្បូង លោក លី តែហុន (Lee Tae Hoon) ទំនងនឹងអាចវិលត្រឡប់មកដឹកនាំ ក្រុមបាល់ទាត់ជម្រើសជាតិកម្ពុជាជាលើកទី២វិញ ខណៈដែលព័ត៌មាន​ដំបូង​បានឲ្យដឹងថា ការតែងតាំងនឹងត្រូវធ្វើឡើង នៅប៉ុន្មានថ្ងៃខាងមុខនេះ។

លោក លី តែហុន (រូបបែរមុខ) នៅលើលានប្រកួត។

គ្រូបង្វឹកវ័យ៤២ឆ្នាំរូបនេះ បានចូលមកដឹកនាំក្រុមជម្រើសជាតិកម្ពុជាលើកដំបូង នៅខែសីហា ឆ្នាំ២០១០។ ប៉ុន្តែក្រោម​ការ​ដឹកនាំរបស់គាត់ ក្រុមជម្រើសជាតិកម្ពុជា ធ្វើមិនបានល្អនោះទេ ក្នុងការប្រកួតពានរង្វាន់ប្រចាំតំបន់ ឬការប្រកួតលក្ខណៈ​អន្តរជាតិនានា ដែលធ្វើឲ្យអ្នកគាំទ្របាល់ទាត់របស់កម្ពុជាជាច្រើន មានការរិះគន់យ៉ាងខ្លាំង ហើយទីបំផុតគាត់​ក៏​ត្រូវចុះ​ចេញ​ពីដំណែង នៅខែឧសភា ឆ្នាំ២០១២។

នៅពេលដែលលោក លី តែហុន បានចាកចេញ កីឡាករជើងចាស់របស់កម្ពុជា លោកហុក សុចិត្រា ក៏បានឡើង​កាន់​ដំណែងជាគ្រូបង្វឹកបណ្តោះអាសន្នបានមួយរយះពេលខ្លី មុនពេលដែលសហព័ន្ធបាល់ទាត់កម្ពុជា (FFC) សម្រេចតែង​តាំង​លោកប្រាក់ សុវណ្ណារ៉ា ជាគ្រូបង្វឹកពេញសិទ្ធវិញ។

ទោះជាយ៉ាងណា លោកសុវណ្ណារ៉ា ដែលជាគ្រូបង្វឹកថ្មីនោះ ក៏មិនអាចជួយស្រោចស្រង់ក្រុមមួយនេះបានដែរ ពោលគឺកាន់​តែមានសភាពយ៉ាប់យឺនជាងមុនទៀត ដោយសារក្រោមការដឹកនាំរបស់គាត់កន្លងមក កម្ពុជាមិនដែលស្គាល់ពាក្យថា «ឈ្នះ» សោះ។

រយះពេលដែលចាកចេញពីដំណែងគ្រូបង្វឹកកម្ពុជាកន្លងមក លោកលី តែហុន មិនដែលឃ្លាតឆ្ងាយ​ពីបាល់ទាត់កម្ពុជា​នោះ​ទេ ពោលគឺគាត់តែងតែសង្កេតមើលការប្រកួតទាំងក្នុងលីក និងក្រុមជម្រើសជាតិកម្ពុជាជានិច្ច។ ជាក់ស្តែងគ្រូបង្វឹក​កូរ៉េខាង​ត្បូងរូបនេះ ក៏បានមកទស្សនាផ្ទាល់ ក្នុងការប្រកួតផ្តាច់ព្រ័ត្រពានរង្វាន់មិត្តហ្វូនខេមបូឌានលីក រវាងក្រុមបឹងកេត និង​ស្វាយរៀងផងដែរ។

សហព័ន្ធបាល់ទាត់កម្ពុជា កំពុងតែស្ថិតក្នុងដំណាក់កាលពិភាក្សាគ្នា ជាមួយនឹងលោកលី តែហុន ដើម្បីធ្វើការ​តែងតាំងជា​ផ្លូវការមួយក្នុងពេលឆាប់ៗ ហើយគ្រូបង្វឹករូបនេះ អាចនឹងចាប់ផ្តើមការងារនៅខែក្រោយតែម្តង ដើម្បីដឹកនាំក្រុមកម្ពុជា​ត្រៀមទៅប្រកួតព្រឹត្តិការណ៏ស៊ីហ្គេម នៅប្រទេសមីយ៉ាន់ម៉ា នៅខែធ្នូរខាងមុខនេះ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២២ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ