ខ្សែប្រយុទ្ធល្វីស ស្វារែស (Luis Suarez) នឹងត្រៀមពាក់អាវក្រុមលីវើភូល (Liverpool) ដើម្បីបង្ហាញខ្លួនក្នុងការប្រកួត​មិត្តភាព នាទីក្រុងមីលបឺន (Melbourne) នៅថ្ងៃពុធសប្តាហ៏នេះ ដែលជាការបង្ហាញខ្លួនលើទីលានប្រកួតជាលើកដំបូង បន្ទាប់ពីរូបគាត់ខាំដៃកីឡាករប្រែនីស្លាវ អ៊ីវ៉ាណូវីក (Branislav Ivanovic) កាលពីថ្ងៃទី២១ ខែមេសាកន្លងទៅ។

ស្វារេស ចូលមកហាត់ជាមួយក្រុមលីវើភូល។

បន្ទាប់ពីមកដល់ប្រទេសអូស្ត្រាលី កាលពីយប់ថ្ងៃសៅរ៏ ស្វារែសត្រូវបានអ្នកកាសែតហ្វកស្ពត (FOX Sport) តាមសួរ​សំណួរថា «តើលោករីករាយដែរទេ ក្នុងការមកចូលរួមជាមួយក្រុមនេះ?» និងមួយសំណួរទៀត «មានអ្នកគាំទ្រជាច្រើន​នៅតែទិញអាវអ្នក ដែលមានឈ្មោះអ្នក និងអាវលេខ៧ តើអ្នកនឹងអាចនៅបន្តជាមួយលីវើភូលទៀតទេ?»

ប៉ុន្តែល្វីស ស្វារែស បានដើររុញវ៉ាលី ទាំងមិនព្រមហារស្តី និងគ្មានការឆ្លើយតបអ្វីទាំងអស់ ចំពោះសំនួរទាំងនោះ ធ្វើឲ្យ​មានសេចក្តីសន្និដ្ឋានផ្សេងៗពីគ្នា៖ សេចក្តីរាយការណ៏ខ្លះថា គាត់មិននិយាយព្រោះគាត់ចង់ចាកចេញពីក្លិប។ រីឯអ្នកធ្វើ​សេចក្តីរាយការណ៏មួយចំនួន យល់ថាគាត់ធ្វើដូចនោះ ប្រហែលជាក្លិបបានប្រាប់គាត់ថា កុំឲ្យនិយាយអ្វីទាំងអស់ នៅពេល​ដែលអ្នកកាសែតសួរ ហើយគាត់អាចនឹងនៅបន្តជាមួយលីវើភូលទៀត។

គ្រូបង្វឹកលីវើភូល បានរៀបចំដាក់បញ្ចូលឲ្យខ្សែប្រយុទ្ធអន្តរជាតិអ៊ុយរ៉ាហ្គាយ ដែលមិនទាន់ប្រាកដ​ប្រជាជាមួយ​ក្រុម​នៅ​ឡើយនេះ ឲ្យចូលលេងជាមួយក្រុមមីលបឺន វីកតូរៀ (Melbourne Victory) នៅក្នុងកីឡាដ្ឋាន អិមស៊ីជី (MCG) មុនពេល​ដែលគាត់ត្រូវនិយាយអំពីអនាគតរបស់កីឡាកររូបនេះឲ្យបានច្បាស់លាស់ នៅពេលការប្រកួតបញ្ចប់រួចរាល់។

ខ្សែប្រយុទ្ធវ័យ២៦ឆ្នាំ ត្រូវបានក្រុមកាំភ្លើងធំអាសឺណល (Arsenal) តាមទិញ និងដេញថ្លៃជាច្រើនលើកច្រើនសារមក​ហើយ ប៉ុន្តែលីវើភូលព្យាយាមរកលេសដោះសារជានិច្ច ព្រោះពួកគេមិនចង់លក់កីឡាករឆ្នើមរបស់គេ បើទោះបីជាកន្លងមក ខ្សែ​ប្រយុទ្ធលេខ៧រូបនេះ ធ្លាប់និយាយថា ចង់ចាកចេញពីក្រុមក៏ដោយ។

ថ្ងៃនេះ ស្វារែសបានធ្វើការហ្វឹកហាត់ជាមួយសមាជិកក្រុមទាំងអស់ នៅក្នុងកីឡាដ្ឋានអេអិមអិមអាយ (AMMI Stadium) ហើយមើលទៅគាត់ដូចជាធម្មតា ដោយបញ្ចេញកាយវិការមានសើចរីករាយផង និងដូចជាក្រៀមក្រំផង ធ្វើឲ្យពិបាកក្នុង​វិនិច្ឆ័យថា «គាត់ពិតជារីករាយជាមួយក្រុម ឬគ្រាន់តែមកដើម្បីបង្រ្គប់កិច្ច» តែយ៉ាងណានោះ យើងមិនទាន់ដឹងទេ។

គ្រូបង្វឹកលីវើភូល លោកប្រេដិន រ៉ដចឺ (Brendan Rodgers) បាននិយាយនៅក្នុងសន្និសីតកាសែត ក្នុងទីក្រុងមីលបឺនថា៖ «ខ្ញុំមិនទាន់បាននិយាយជាមួយគាត់ (ស្វារែស) នៅឡើយទេ ព្រោះពួកយើងទើបតែមកពីទីក្រុងចាកាតា រីឯគាត់មកពី​ប្រទេសអ៊ុយរ៉ាហ្គាយ ដូច្នេះយើងទុកពេលឲ្យគាត់សម្រាក់ និងហ្វឹកហាត់ឲ្យបានល្អ ដើម្បីបង្ហាញខ្លួនក្នុងការប្រកួតនេះ។ យើងនឹងជជែកពីរឿងអនាគតរបស់គាត់ នៅពេលក្រោយ។»

គ្រាន់តែលឺដំណឹងថា ប្រធានក្រុមស្តេវ៉ិន ចឺរ៉ាដ (Steven Gerrard) និងខ្សែប្រយុទ្ធ ល្វីស ស្វារែស នឹងចូលលេងក្នុង​ការ​ប្រកូតមិត្តភាពនោះ សំបុត្រជិត១០ម៉ឺនកៅអី លក់គ្មានសល់សូមបី១សន្លឹក ព្រោះតែអ្នកគាំទ្រអស់នោះ អន្ទះសារចង់​ឃើញ​ស្វារែស បង្ហាញខ្លួនឲ្យហង្សក្រហមម្តងទៀត និងវីរបុរសរបស់ក្រុម (ចឺរ៉ាដ) ផងដែរ។ ហើយត្រូវបានគេសន្និដ្ឋានថា នោះ​ជាចំនួនអ្នកទស្សនាច្រើនបំផុតនៅក្នុងប្រវត្តិសាស្ត្រ ក្រុមហង្សក្រហមលីវើភូល៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២២ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ