ខ្សែបម្រើអេដិន ហាស្ស៊ាដ (Eden Hazard) និយាយថា កីឡាករវ៉ែន រ៉ូនី (Wayne Rooney) នឹងក្លាយជា «ការទិញចូលដ៏ល្អ​បំផុតមួយ» សម្រាប់ក្រុមឆែលស៊ី (Chelsea) ហើយគាត់នឹងស្វាគមន៏ បើរ៉ូនី ពិតជាមកកាន់កីឡាដ្ឋាន ស្តេមហ្វដ ប្រិជ្ជ (Stamford Bridge) មែន។

កីឡាករ វ៉ែន រ៉ូនី (ខាងឆ្វេង) និងកីឡាករ អេដិន ហាស្ស៊ាដ ក្នុងការជួបប្រកួតរវាងមែនឆេស្ទើរ យូណាយធីត និងឆែលស៊ី កន្លងមក។ (រូបថត football365.com)

រ៉ូនី បានចាកចេញពីទីក្រុងបាងកក ទៅកាន់ប្រទេសអង់គ្លេសវិញ កាលពីសប្តាហ៏មុន បន្ទាប់ពីមានរបួសសរសៃរ​ពួរគន្លាក់​ជើង ដែលធ្វើឲ្យគាត់មិនអាចបន្តជួយក្រុមម៉ែនឆេស្ទើ យូណៃធីត (Manchester United) ក្នុងការប្រកួតមិត្តភាពនៅ​តំបន់​អាស៊ី និងអូស្ត្រាលីបាន។

គ្រូបង្វឹកម៉ែនញូ លោកដេវីដ ម៉យ (David Moyes) បាននិយាយរួចហើយថា ខ្សែប្រយុទ្ធអង់គ្លេស មិនមែនសម្រាប់លក់​នោះ​ទេ បន្ទាប់ពីលោកជូសេ ម៉ូរីញ៉ូ (Jose Mourinho) បានបញ្ចេញចំណាប់អារម្មណ៏ថា គាត់ពេញចិត្តរ៉ូនី។

ហាស្ស៊ាដ បាននិយាយថា៖ «រ៉ូនី នឹងក្លាយជាការទិញចូលដ៏ល្អបំផុត។ គាត់ជាកីឡាករដ៏អស្ចារ្យ ដែលមានបទពិសោធន៏​ច្រើន ហើយអាយុរបស់គាត់ក៏នៅក្មេងដែរ ព្រោះទើបតែ ២៧ឆ្នាំ។ គាត់អាចលេងក្នុងកំរិតកំពូល ២ទៅ៣ឆ្នាំទៀត។ ប៉ុន្តែ​រឿងទាំងនេះ មិនអាស្រ័យលើខ្ញុំនោះទេ ហើយខ្ញុំក៏មិនមែនជាអ្នកសម្រេចដែរ។»

ខ្សែបម្រើវ័យ២២ឆ្នាំ (ហាស្ស៊ាដ) បាននិយាយថា គាត់នឹងខិតខំឲ្យអស់លទ្ធភាព នៅរដូវកាលថ្មី និងព្យាយាមលេង​ឲ្យបាន​កំរិតមួយខ្ពស់បំផុត ក្រោមការដឹកនាំរដូវកាលដំបូងរបស់លោក ម៉ូរីញ៉ូ។

គាត់បាននិយាយថា៖ «លោកម៉ូរីញូ បានប្រាប់ពួកយើងអស់ហើយ ពីអ្វីដែលគាត់រំពឹងចង់បានពីពួកយើង ហើយអ្វីដែល​គាត់ចង់ឃើញ។ សម្រាប់ខ្ញុំ គាត់បានប្រាប់ខ្ញុំថា ឲ្យមានឆន្ទះខ្ពស់ក្នុងការប្រកួត និងព្យាយាមឲ្យអស់លទ្ធភាព, បើអ្នកអាច​ធ្វើអ្វីៗទាំងនោះបាន អ្នកនឹងក្លាយជាមនុស្សពិសេសនៅរដូវកាលថ្មីនេះ។»

កីឡាកររូបនេះដដែលបានបន្ថែមថា៖ «ខ្ញុំបានប្រាប់គាត់ថា ខ្ញុំចង់ធ្វើអ្វីៗសម្រាប់ខ្លួនឯងឲ្យបានល្អជាទីបំផុត ធ្វើអ្វីដែល​ខ្ញុំ​អាចធ្វើបាន និងអ្វីដែលគាត់ (ម៉ូរីញ៉ូ) ចង់បាន ចង់ឃើញលទ្ធផលពីពួកយើង។ ខ្ញុំសង្ឃឹមថា ខ្ញុំនឹងអាចរីកចំរើនជាងមុន៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៦ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ