ភ្នំពេញ៖ អំណាចនៃរដ្ឋធម្មនុញ្ញកម្ពុជា កំណត់ថាកម្ពុជាជាប្រទេសប្រកាន់ភ្ជាប់នូវរបបប្រជាធិបតេយ្យសេរី-ពហុបក្ស។ ពលរដ្ឋទាំងអស់ត្រូវទទួលបាន នូវសិទ្ធិ«ស្មើៗគ្នា»ដោយសុច្ចរិតភាព លើគ្រប់និន្នាការនយោបាយ។ ពលរដ្ឋមានសិទ្ធិ​ចូល​រួមក្នុងឆាកនយោបាយ និងបង្កើតគណបក្សនយោបាយ និងការចូលរូមក្នុងយុទ្ធនាការឃោសនា ស្វែងរកប្រជាប្រិយភាព ការគាំទ្រ និងទំនុកចិត្តពីប្រជាពលរដ្ឋជាម្ចាស់ឆ្នោត។

លោក សេង សុខេង ជាប្រធានគណបក្សសញ្ជាតិកម្ពុជា។ (រូបថត គណបក្សសញ្ជាតិកម្ពុជា)

ដើម្បីគោរពនូវគោលការណ៍ស្មើភាពគ្នា នៃការឃោសនារវាងគណបក្សទាំងអស់ ដែលចូលរួមក្នុងការបោះឆ្នោតខាងមុខ មនោរម្យព័ងអាំងហ្វូ បានធ្វើកិច្ចសម្ភាសជាមួយលោក កែវ ណារ៉េត ប្រធានក្រុមប្រឹក្សារាជធានីភ្នំពេញ នៃគណបក្ស​សញ្ជាតិកម្ពុជា ដែលមានលោក សេង សុខេង ជាប្រធាន។ គោលនយោបាយសំខាន់ៗរបស់គណបក្សសញ្ជាតិកម្ពុជា ក្នុង​ការចូលរួមប្រគួតប្រជែង តាមរយៈការបោះឆ្នោតថ្នាក់ជាតិនាថ្ងៃអាទិត្យ ទី២៨ ខែកក្កដា ពេលខាងមុខដែលមានន័យ​ដូច​ខាងក្រោម៖

មនោរម្យព័ងអាំងហ្វូ៖ តើមានយន្តការអ្វីខ្លះ ដែលជម្រុញឲ្យមានគំនិតផ្តួចផ្តើម បង្កើតនូវគណបក្សសញ្ជាតិកម្ពុជា នេះ​ឡើង ក្នុងឆ្នាំណា?

កែវ ណារ៉េត ៖ ភាពក្រីក្ររបស់ប្រជាពលរដ្ឋកម្ពុជាដ៏ច្រើនលើសលុបជាងដប់លាននាក់ ជាសត្រូវទីមួយរបស់បក្ស​សញ្ជាតិកម្ពុជា ហេតុដូច្នេះទើបសមាជិកសមាជិការ សម្រេចបង្កើតគណបក្សនេះឡើង ដោយប្រកាន់នូវជំហរបង្រួមបង្រួម ផ្សះផ្សា ឯកភាពជាតិ ធ្វើយ៉ាងណាកាត់បន្ថយ និងលប់បំបាត់ចោលនូវភាពក្រីក្រទាំងនេះ។ នេះជាមូលហេតុមួយ ដែល​ជម្រុញឲ្យគណបក្សសញ្ជាតិកម្ពុជា ជ្រើសរើសនូវសញ្ញាតំណាងបក្ស ដែលមានរូបព្រះអាទិត្យ និងព្រះចន្ទ័ជួបគ្នា ក្នុងន័យ​ប្រជាធិបតេយ្យ និងការអភិវឌ្ឍន៍។ គណបក្សសញ្ជាតិកម្ពុជានេះត្រូវបានបង្កើតឡើងក្នុងឆ្នាំ២០១២។

មនោរម្យព័ងអាំងហ្វូ៖ ដើម្បីចូលរូមក្នុងការបោះឆ្នោតនាពេលខាងមុខនេះ តើគណបក្សលោក មានគោល​នយោបាយ​សំខាន់ៗអ្វីខ្លះ?

កែវ ណារ៉េត ៖ គោលនយោបាយរបស់គណបក្សសញ្ជាតិកម្ពុជា មានប្រាំបីចំណុចសំខាន់ៗ ទីមួយបង្រួបបង្រួម ផ្សះផ្សា និងឯកភាពជាតិ ទីពីរការពារអធិបតេយ្យភាព និងបូរណៈភាពទឹកដី ទីបីគោរពសិទ្ធិមនុស្ស និងលទ្ធិប្រជាធិបតេយ្យ ទីបួន​គោរពគោលការណ៍វប្បធម៌នីតិរដ្ឋ ទីប្រាំអភិវឌ្ឍន៍សេដ្ឋកិច្ចជាតិ ទីប្រាំមួយគោរពគោលការណ៍វប្បធម៌សន្តិភាព សន្តិសុខ សុវត្ថិភាពសង្គម និងទីប្រាំពីរការពារវប្បធម៌ និងបរិស្ថានធម្មជាតិ។ ក្រៅពីគោលនយោបាយនេះ គណបក្សសញ្ជាតិកម្ពុជា​ មានគោលជំហរប្រាំ “ខ” ទីមួយបង្រួបបង្រួម ផ្សះផ្សា និងឯកភាពជាតិ ទីពីរមិនប្រកាន់និន្នាការនយោបាយ ទីបីមិនរើស​អើង​ជាតិសាសន៍ ជំនឿ សាសនា ទីបួនមិនរឹបអូសទ្រព្យបុគ្គល និងទីប្រាំលើកលែងទោសនយោបាយ លុបចោលទោស​ប្រហាជីវិត។

មនោរម្យព័ងអាំងហ្វូ៖ ក្នុងគោលនយោបាយទីមួយបង្រួបបង្រួម ផ្សះផ្សា ឯកភាពជាតិ និងទីពីរ ការពារ​អធិបតេយ្យភាព បូរណៈភាពទឹកដី តើលោកអាចបញ្ជាក់បន្ថែមលើបញ្ហានេះបានទេ?

កែវ ណារ៉េត ៖ គណបក្សយើងមិនមែនជាបក្សប្រឆាំងទេ យើងរួមខ្មែរទាំងអស់ និងចង់ឲ្យខ្មែរទាំងអស់ត្រូវគ្នា អត់មាន​ប្រឆាំងខ្មែរណាមួយនោះទេ ហើយក៏មិនប្រឆាំងនិងរដ្ឋាភិបាល ឬគណបក្សណានោះដែរ។ យើងនឹងធ្វើការដោះស្រាយ​បញ្ហាព្រំដែន ជាមួយប្រទេសជិតខាងដូចជាវៀតណាម ថៃ និងឡាវ ដោយពិតប្រាកដ ប្រកបដោយសន្តិភាព ព្រមទាំង​សហការនៅក្នុងតំបន់ និងលើសកលលោក។ កត្តាទាំងនេះអាចធ្វើការដោះស្រាយទៅបាន លុះត្រាតែ ប្រជាជាតិខ្មែរ​ទាំងមូលត្រូវរកឲ្យឃើញនូវចំណុច«រួមមួយ» ធ្វើយ៉ាងណាឲ្យមានការគោរពស្រលាញ់គ្នា មានការសហការ និងរួបរួមគ្នា​ដោយ​គ្មានការខ្វែងគំនិតគ្នា។

មនោរម្យព័ងអាំងហ្វូ៖ ប្រសិនបើប្រជាពលរដ្ឋកម្ពុជា នៅតាមបណ្តាខេត្ត ឬក្រុងនានា បានបាត់បង់នូវសិទ្ធិដីធ្លី សិទ្ធិនៃការរស់នៅ ជាពិសេសសិទ្ធិលំនៅដ្ឋាន ក្រោមគម្រោងអភិវឌ្ឍន៍នោះ តាមគោលនយោបាយ​គណបក្ស​លោក និងធ្វើការដោះស្រាយយ៉ាងណាចំពោះបញ្ហាខាងលើនេះ?

កែវ ណារ៉េត ៖ កត្តាសំខាន់អ្នកដែលត្រូវដោះស្រាយត្រូវតែជាមនុស្សដែលមានសមត្ថភាព និងមានជំនាញពិតប្រាកដ​ទៅតាមផ្នែកនីមួយៗ និងកត្តាមួយទៀតគឺច្បាប់ ធ្វើយ៉ាងណាឲ្យមានការគោរព និងអនុវត្តន៍តាមច្បាប់ជាធរមាន ដោយ​ចំពោះមុខ និងស្មើភាព។ បើសិនជាច្បាប់មានចន្លោះប្រហោង ត្រូវធ្វើការកែប្រែច្បាប់ដែលផ្តល់ប្រយោជន៍ដល់ប្រជាជន ដល់ក្រុមហ៊ុនដែលដាក់វិនិយោគនីកម្ពុជា និងមិនខាតដល់ប្រយោជន៍ជាតិ។ កត្តទាំងពីរនេះ អាចធ្វើការឆ្លើយតបទៅ​នឹង​បញ្ហាខាងលើបាន។

មនោរម្យព័ងអាំងហ្វូ៖ លោកថា «ភាពក្រីក្ររបស់ប្រជារាស្រ្ត» ជាសត្រូវធំបំផុតរបស់គណបក្សសញ្ជាតិកម្ពុជា តើគណបក្សលោកត្រូវធ្វើយ៉ាងណា តាមយន្តការអ្វី ដើម្បីបំបាត់នូវភាពក្រីក្រទាំងនេះបាន?

កែវ ណារ៉េត ៖ យើងមើលឃើញថា នៅតាមជនបទជនជាតិខ្មែររងនូវភាពក្រីក្រខ្លាំងបំផុត ដូច្នេះតាមយុទ្ធសាស្ត្រនៃការ​កាត់បន្ថយ និងលប់បំបាត់ភាពក្រីក្រ យើងត្រូវរៀបចំហេដ្ឋារចនាសម្ពន្ធ័ បង្កើននូវកំណើនសេដ្ឋកិច្ច ទាក់ទាញក្រុមហ៊ុន​វិនិយោគទុន បញ្ចុះតម្លៃពន្ធនាំចូល បង្កើនការងារក្នុងស្រុក ជាពិសេសការអភិវឌ្ឍន៍ហេដ្ឋារចនាសម្ពន្ធ័ជនបទ​ជារឿង​សំខាន់។

មនោរម្យព័ងអាំងហ្វូ៖ ក្នុងគោលជំហររបស់គណបក្សទាំងប្រាំ “ខ” ខាងលើ មានចំណុចមួយដែលបានដាក់ថា «លុបចោលទោសប្រហាជីវិត» តែក្នុងច្បាប់រដ្ឋធម្មនុញ្ញយើង បានចែងយ៉ាងច្បាស់ថា គ្មានទេទោស​ប្រហាជីវិត​នៅកម្ពុជា តើក្នុងន័យខាងលើ លោកអាចបញ្ជាក់ពីមូលហេតុបានទេ?

កែវ ណារ៉េត ៖ ករណីនេះគណបក្សរបស់លោកចង់ការពារនូវការវិលត្រឡប់មកវិញនៃរបបខ្មែរក្រហម ដែលកាប់សម្លាប់​មនុស្សមិនរើសពេលវេលា និងមានបានឆ្លងកាត់ប្រព័ន្ធតុលាការ។ ជាពិសេសបច្ចុប្បន្ននេះ​ក៏មានការសម្លាប់មនុស្សក្រៅ​ប្រព័ន្ធតុលាការច្រើនដែរ ឯជនល្មើសក៏រស់នៅក្រៅរង្វង់ច្បាប់។ ដាច់ខាតធ្វើយ៉ាងណា ដាក់ការអនុវត្តន៍ទាំងអស់ទៅក្នុង​ប្រព័ន្ធច្បាប់ជាធំ។

មនោរម្យព័ងអាំងហ្វូ៖ ក្រឡេកមកមើល យុទ្ធនាការនៃការឃោសនាបោះឆ្នោតវិញ តើគណបក្សលោកបានចេញ​ធ្វើការឃោសនា បានប៉ុន្មានខេត្តក្រុងហើយ មកទល់និងពេលនេះ ហើយលោកនឹងបន្តរយុទ្ធការយ៉ាងណា​ជា​បន្តរទៀត?

កែវ ណារ៉េត ៖ ចាប់តាំងពីថ្ងៃទី២៧ ខែមិថុនាមក ក្នុងរយៈពេលប្រាំបួនថ្ងៃនេះ យើងធ្វើការឃោសនាបានក្នុងខេត្ត-ក្រុង​មួយចំនួន តែអវត្តមានខេត្តមួយចំនួនទៀតដូចជាកំពត កំពង់សោម និងខេត្តនៅប៉ែកឥសានប្រទេស។ នៅថ្ងៃមុខ​បន្តរ​ទៀតនេះយើងបានចាត់តាំងសកម្មជនបក្សប្រចាំខេត្តនីមួយៗឲ្យរៀបចំធ្វើយុទ្ធនាការនេះជាបន្តរនៅតាមខេត្តរៀងៗខ្លួន។ នៅថ្ងៃទីទី១០ និងថ្ងៃទី២៦ ខែកក្កដា នឹងមានការឃោសនាក្នុងទ្រង់ទ្រាយធំនៅទីក្រុងភ្នំពេញ នាទីលានប្រជាធិបតេយ្យ។

មនោរម្យព័ងអាំងហ្វូ៖ តើលោកអាចបញ្ជាក់បានទេថា បេក្ខភាពតំណាងរាស្រ្តរបស់គណបក្សសញ្ជាតិកម្ពុជា​ មាន​ចំនូនសរុបប៉ុន្មាននាក់ ជាស្រ្តីប៉ុន្មាន និងមាននៅខេត្តណាខ្លះ?

កែវ ណារ៉េត ៖ បេក្ខជនសរុបទាំងអស់មានចំនួនជាងបីរយនាក់ ក្នុងនោះមានស្រ្តីចំនួន១៤២នាក់ និងបុរសចំនួន១៦៤នាក់ ទាំងពេញសិទ្ធិ និងបំរុង។ ហើយមានបេក្ខជនជាតំណាងរាស្រ្តនៅគ្រប់២៤ខេត្ត-ក្រុង។

សូមបញ្ជាក់ថា គណបក្សសញ្ជាតិកម្ពុជា បានចុះបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសរើស​ក្រុម​ប្រឹក្សាឃុំសង្កាត់ អាណត្តិទី៣ កាលពីថ្ងៃទី៣ ខែមិថុនា ឆ្នាំ២០១២ មានចំនួន៣៧១ឃុំ-សង្កាត់ ក្នុងចំណោមឃុំ-សង្កាត់ ចំនួន ១.៦៣៣នៅទូទាំងប្រទេស៕

-------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៥ កក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ