សត្រូវថ្មីរបស់នគរបាលនៅថៃ មិនមែនជាក្រុមឧក្រិដ្ឋជនគ្រឿងញៀន ឬការកកស្ទះចរាចរណ៍ដែល ជាបញ្ហាដ៏ឈឺក្បាល​នៅ​រាជធានីនោះទេ ហើយការហ្វឹកហាត់នេះ ក៏មានបញ្ជាឲ្យធ្វើតែនៅពេលកំណត់ ឲ្យឈប់សម្រាកដ៏ខ្លីតែប៉ុណ្ណោះដែរ។ សត្រូវ​ថ្មីនោះជាអ្វី? គឺជម្ងឺធាត់ចុះខ្លាញ់។

មើលមួយភ្លែត ហាក់ដូចជាមានមាឌមាំណាស់ តែបើរត់ដេញចាប់ចោរវិញ តើវេទនាយ៉ាងណា?

យុទ្ធនាការមួយត្រូវបានដាក់បញ្ជាឲ្យធ្វើ ក្នុងរយៈពេល១២ថ្ងៃ ចាប់ផ្ដើមពីសប្ដាហ៍នេះទៅ ក្នុងគោលបំណង​ដើម្បីឲ្យ​ភ្នាក់ងារ​ទាំងឡាយរបស់អាជ្ញាធរ រករូបរាងរបស់ខ្លួនត្រឡប់មកវិញ។

នគរបាលប្រមាណជា៦០នាក់ ស្ថិតក្នុងសភាពធាត់ហួសចំណុះ មកពីគ្រប់តំបន់នៅក្នុងប្រទេសថៃ នឹងត្រូវឲ្យចូលរួម​ក្នុង​កម្មវិធីនេះ ដែលរួមមានការហ្វឹកហាត់ តាំងពីព្រឹកព្រហាមស្រាងៗ រហូតដល់ល្ងាចថ្ងៃលិច។ កម្មវិធីនឹងបង្រៀនដូចគ្នាដែរ នូវរបៀបរបបរស់នៅប្រចាំថ្ងៃដើម្បីសុខភាព នៅក្នុងមជ្ឈមណ្ឌលមួយ ស្ថិតនៅឯជាយក្រុងនៃរាជធានីបាងកក។

នៅក្នុងពេលហ្វឹកហាត់នោះ នគរបាលម្នាក់ៗ ដែលពាក់អាវយឺតមានសរសេរអក្សរពីលើថា «យើងកំចាត់ក្បាលពោះចេញ» ត្រូវងើបរត់តាំងពីព្រលឹម បន្ទាប់ត្រូវធ្វើការហាត់ប្រាណ តាមបែប«យូហ្គា» ហាត់រាំរបៀបហក់លោត ហាត់គុនតៃជិដើម្បី​កាត់បន្ថយភាពតានតឹង និងជួយឲ្យឈាមរត់ល្អ និងហាត់ពីរបៀបញ៉ាំចំណីបង្រៀនដោយអ្នកជំនាញ។

អ្នកដែលធ្វើឲ្យខ្លួនឯងបានបាត់បង់ទម្ងន់ច្រើនជាងគេ នឹងទទួលបានប្រាក់រង្វាន់៥០០បាត (ប្រមាណជា១៧០ដុល្លា​អាមេរិក) ដែលជាថ្នូនឹងការលើកទឹកចិត្តទៅដល់ភ្នាក់ងារទាំងនោះ និងបើទោះជាមនុស្សភាគច្រើននៅក្នុងចំណោមនោះ អះអាងពីការគិតផ្ទាល់ខ្លួន ផ្ដល់សារសំខាន់ទៅសុខភាពរបស់ខ្លួននោះ ខ្លាំងជាងក៏ដោយ។

ការពិនិត្យសុខភាពទៅលើនគរបាលប្រមាណជា២០០ពាន់នាក់កាលពីឆ្នាំទៅម៉ិញ បានរកឃើញបញ្ហាសុខភាព​សំខាន់​ប្រាំ​យ៉ាង នៅលើបណ្ដាភ្នាក់ងារ៖ ធាត់ចុកខ្លាញ់ ខ្លាញ់កកក្នុងសសៃឈាម បញ្ហាថ្លើម សម្ពាធឈាមឡើងខ្ពស់ និងទឹក​នោម​ផ្អែម។

នគរបាលស័ក្ដិប្រាំមួយរូប ដែលដឹកនាំមន្ទីរពេទ្យយោធាមួយនៅបាងកក និងជាអ្នកមានគំនិតបង្កើតកម្មវិធីនេះ លោកស្រី​ព័រពេន ប៊ុនណាង (Pornpen Bunnag) បានថ្លែងប្រាប់ទីភ្នាក់ងារអេភីថា «ភ្នាក់ងារនគរបាលងាយរងគ្រោះ​នឹងបញ្ហា​សុខភាពខ្លាំងណាស់ ព្រោះពួកគាត់គេងនិងញ៉ាំមិនបានទៀងទាត់។ ទទួលទានចំណីអាហារនៅពេលយប់ជ្រៅ ផឹកនិង​ជក់ក៏បានជួយឲ្យពួកគាត់មានជម្ងឺធាត់ចុកខ្លាញ់។»

លោកស្រីបន្ថែមយ៉ាងមុតមាំថា «មិនត្រឹមតែប៉ុណ្ណឺងនោះទេ ក្បាលពោះពួកគាត់ដូចជាចង់ធ្លាយ ចេញច្រើនជ្រុលពេកហើយ សម្រាប់សម្លៀកបំពាក់ជាឯកសណ្ឋានរបស់ពួកគាត់»។ សូមទស្សនារូបភាព ពីនគរបាលធាត់ៗទាំងនោះ និងវីដេអូមួយ​ដូច​ខាងក្រោម៖

សូមទស្សនាវិដេអូម្ដងវិញ

-------------------------------------------------
ដោយ ៖ កេសរកូល - ភ្នំពេញ ថ្ងៃទី០៤ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ