សេរីភាពបញ្ចេញមតិនៅកម្ពុជាបច្ចុប្បន្ន កំពុងតែឈមនឹងបញ្ហា បើទោះបីជាមានភាពប្រសើរឡើង ក្នុង​លក្ខខណ្ឌខ្លះ​ក៏ដោយ។ នេះបើយោងទៅតាមវេទិកាពិភាក្សាគោលនយោបាយ ស្តីពី ការលើកកម្ពស់សិទ្ធិសេរីភាពបញ្ចេញ​មតិនៅ​កម្ពុជា មានការចូលរួមពីតំណាងគណបក្សនយោបាយចំនួនប្រាំពីរ ដែលរៀបចំដោយមជ្ឍៈមណ្ឌលសិទ្ធិមនុស្សកម្ពុជា នៅសណ្ឋាគារអ៊ីមភើរៀ នាព្រឹកនេះ។

កិច្ចពិភាក្សាគ្នា នៅសណ្ឋាគារអ៊ីមភើរៀ។ (រូបថត MONOROOM.info/ U.Bory)

លោក បណ្ឌិត ឡៅ ម៉ុងហៃ អ្នកវិភាគឯករាជ្យ និងជាអ្នកតាមដានស្ថានភាពនយោបាយនៅកម្ពុជាមានប្រសាសថា៖ «សិទ្ធិសេរីភាពបញ្ចេញមតិ នៅកម្ពុជាបច្ចុប្បន្ននេះ មានភាពចំរុះ »។ លោកពន្យល់ថា បើទោះជាមានការផ្តល់នូវសិទ្ធិ​សេរីភាព ក្នុងការបញ្ចេញមតិតាមប្រព័ន្ធផ្សព្វផ្សាយ ការជួបជុំធ្វើកូកម្ម(...) ប៉ុន្តែសកម្មភាពទាំងនេះ នៅតែទទួលរងនូវ​ការរិតត្បិត គំរាមកំហែង បង្ក្រាប និងការប្ដឹងផ្តល់ ជាពិសេសនៅពេលសកម្មភាពទាំងនេះ មានការប៉ះពាល់ដល់​អ្នក​មាន​អំណាច។

កញ្ញា សន រ៉ាមណា អ្នកសម្រសម្រួលគម្រោងសេរីភាពបញ្ចេមតិ នៅមជ្ឍៈមណ្ឌសិទ្ធិមនុស្សកម្ពុជា បានលើកឡើងអំពី​ឧបស័គ្គមួយចំនួន ដែលប៉ះពាល់ដល់សេរីភាពបញ្ចេញមតិ ដែលក្នុងនោះរួមមានខ្វះការសហការពីមន្ត្រីរដ្ឋាភិបាល ប្រព័ន្ធតុលាការមិនឯករាជ្យ ការបកស្រាយច្បាប់ខុស ការប្រើច្បាប់ដើម្បីបង្រ្កាប សកម្មជន អ្នកប្រឆាំង ឬអ្នក សារពត៌មាន​ជាដើម។

លោ អ៊ូ ចាន់រិទ្ធ ជាប្រធានគណៈកម្មការវិន័យរបស់គណៈបក្សសង្គ្រោះជាតិ បានថ្លែងថា ប្រជាធិបតេយ្យរស់ទៅបាន អាស្រ័យ​មានការគោរពសិទ្ធិមនុស្ស ការគោរពសិទ្ធិមនុស្សអាស្រ័យលើការបញ្ចេញមតិ។ លោកបញ្ជាក់ថា៖ «វាចាំ​បាច់ណាស់​ដែលត្រូវមានច្បាប់ស្តីពីការទទួលពត៌មានពីព្រោះពលរដ្ឋ និងអ្នកសារពត៌មានត្រូវការពត៌មាន ជាពិសេស​នោះគឺ​ពត៌មានដែលមានភាពឯករាជ្យ»។ លោកបន្តថាក្នុងពេល ដែលលោកធ្វើជាអ្នកតំណាងរាស្រ្ត លោកគ្នាន​សិទ្ធិ​បញ្ចេញ​មតិនៅក្នុងរដ្ឋសភា ខណៈដែលលោកបានដាក់សំណួរជាច្រើននៅក្នុងរដ្ឋសភាទៅកាន់រដ្ឋាភិបាល តែមិនបាន​ទទួល​ចំលើយត្រឡប់មកវិញសូម្បីតែមួយ។

សូមរំឮកថាវេទិកាពិភាក្សានេះ មានការចូលរួមពីតំណាងគណៈបក្សនយោបាយចំនួន ប្រាំពីរខណៈពេល ដែល​អវត្តមាន​របស់គណៈប្រជាជន ដែលជាគណៈបក្សកាន់អំណាច ដោយលើកហេតុផលថាជាប់រវល់។

----------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៥ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ