យ៉ាងហោចណាស់ កម្មករកម្មការិនីចំនួន២៣នាក់ បានរងរបួសនៅថ្ងៃច័ន្ទនេះ នៅក្នុងព្រឹត្តិការណ៍បាក់រលំរោងបាយ ក្នុង​រោងចក្រសម្លៀកបំពាក់មួយ ស្ថិតនៅជាយរាជធានីភ្នំពេញ។ នេះជាព្រឹត្តិការណ៍មួយទៀត ដែលបានកើតក្រោយ​តែបួន​ថ្ងៃប៉ុណ្ណោះ ពីព្រឹត្តិការណ៍បាក់ពិតានរោងចក្រមួយផ្សេងទៀត ដែលបានបង្កអោយកម្មករពីរនាក់ស្លាប់។

សកម្មភាពលើកកកាយ ដើម្បីស្វែងរកជនរងគ្រោះ។

គ្រោះថ្នាក់បានកើតឡើងនៅថ្ងៃត្រង់ ខណៈដែលកម្មករកំពុងសម្រាប់ទទួលទានបាយ នៅក្នុងរោងបាយមួយ​ដែលសង់​ពី​បេតុង និងប្រកសង្កសី ដែលជាផ្នែកមួយនៃរោងចក្រ «ថបវើល (Top World)» ក្នុង ភូមិជ្រោយអំពិល សង្កាត់ក្បាលកោះ ខណ្ឌមានជ័យ រាជធានីភ្នំពេញ។

អធិការនគរបាលខណ្ឌលោកហ៊ី ណារិន បាននិយាយប្រាប់អ្នកសារព័ត៌មានថា «រោងនេះ មានសភាពចាស់ទ្រុតទ្រោម ហើយបានបាក់ស្រុតចុះ ទៅក្នុងបឹងកំបោ្លក នៅពេលដែលកម្មករជាច្រើននាក់បានជួបជុំគ្នាញ៉ាំបាយថ្ងៃត្រង់»។ បើ​តាម​មន្ត្រីនគរបាលដដែល ហេតុការណ៍បាក់រោងបាយនេះ បានបង្កឲ្យមនុស្សរបួសចំនួន២៣នាក់ តែមិនមានអ្នករងគ្រោះថ្នាក់ ដល់អាយុជីវិតនោះទេ។

សាក្សីជាច្រើននៅនឹងកន្លែង បាននិយាយថា ការជួយសង្គ្រោះនៅតែបានធ្វើ រហូតមកដល់ពេលរសៀលថ្ងៃច័ន្ទដដែល ដើម្បីធានាថា នឹងគ្មាននរណាផ្សេង នៅជាប់ក្រោមបំណែកបាក់បែកនៃរោងបាយនេះទៀតទេ។ ប្រធានសហភាព​ការងារ​កម្ពុជា លោក អាត ធន់ បានឲ្យដឹងថា រោងចក្រនេះ ផលិតសម្លៀកបំពាក់ជាច្រើន សម្រាប់ឲ្យក្រុមហ៊ុនសម្លៀកបំពាក់​របស់​ប្រទេសស៊ុយអែដ មានយីហោ H&M ដ៏ល្បីនៅអ៊ឺរ៉ុប។

កាលពីថ្ងៃព្រហស្បត្តិ៍មុន ពិតានអាគាររោងចក្រផលិតស្បែកជើងមួយ ស្ថិតនៅខេត្តកំពង់ស្ពឺ បានបាក់ធ្លាក់ បង្កអោយ​កម្មករ​ពីរនាក់ស្លាប់។ នៅក្នុងព្រឹត្តិការណ៍ដ៏រន្ធត់មួយទៀត កាលពីខែមេសាកន្លងទៅ នៅប្រទេសបង់ក្លាដេស អាគារ​រោងចក្រដ៏ធំ​មួយបានបាក់ស្រុត ហើយបានសម្លាប់កម្មករប្រមាណជា ១១២៧នាក់។ ហេតុការណ៍ទាំងអស់នេះ បានបង្ហាញឲ្យឃើញ​កាន់តែច្បាស់ ពីលក្ខខ័ណ្ឌការងារ ដែលមិនសមប្រកប សម្រាប់កម្មករកម្មការិនីនៅក្នុងប្រទេសមួយចំនួន នៅទ្វីបអាស៊ី។

ការនាំចេញផ្នែកសម្លៀកបំពាក់ បានផ្ដល់ចំណូលទៅឲ្យប្រទេសកម្ពុជា ចំនួន៤,៦ពាន់លានដុល្លា កាលពីឆ្នាំកន្លងទៅ។ វិស័យវាយនភ័ណ្ឌ បានផ្ដល់ការងារអោយពលរដ្ឋកម្ពុជាប្រមាណជា ៦៥០ពាន់នាក់ ក្នុងនោះពលរដ្ឋ៤០០ពាន់នាក់ ធ្វើការ​ឲ្យសហគ្រាស់ ដែលផលិតសម្រាប់តែការនាំចេញ។ ប៉ុន្តែការក្អួតចង្អោរ និងការដួសសន្លប់ របស់ក្រុមកម្មករ ដែលមាន​ចំនួនយ៉ាងសន្ធឹកសន្ធាប់ជាបន្តបន្ទាប់នោះ បានបង្កឲ្យមានការរិះគន់កាន់តែខ្លាំងឡើង ពីលក្ខខ័ណ្ឌការងារ និងពីស្ថានភាព​សង្គមកិច្ចនៅកម្ពុជា៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី២០ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ