ពីមួយសប្តាហ៍ទៅមួយសប្តាហ៍ សាលារាជធានីភ្នំពេញ ថានឹងដោះស្រាយបញ្ហាជូនប្រជាពលរដ្ឋ ប្រាំមួយសហគមន៏តាម​ការស្នើសុំ។ រាល់ការសន្យាទាំងនេះ បានអូសបន្លាយជាច្រើនសប្តាហ៍ តែការឆ្លើយតប ឬការចុះទៅតាមការសន្យានោះ នៅតែមិនទាន់មានដំណោះស្រាយណាមួយឡើយ។

រដូវវស្សាបានចូលមកដល់ បានធ្វើឲ្យប្រជាពលរដ្ឋទាំងនោះត្អូញត្អែរ ពីជួបការលំបាកក្នុងការរស់នៅ ដែលស្ថិតនៅ​កណ្តាលថ្ងៃ ហាលភ្លៀង រស់នៅជាមួយបរិដ្ឋានដ៏អាប់អួរ។ ប្រជាពលរដ្ឋទាំងប្រាំមួយសហគន៍បានរួមគ្នា ស្នើរសុំឲ្យមាន​ការដោះស្រាយដ៏សមស្របមួយ មុនការបោះឆ្នោត។

នាថ្ងៃទី២០ ខែឧសភាព្រឹកម៉ិញនេះ សហគមន៍ទាំងប្រាំមួយរួមមាន អតីតបឹងកក់អ្នកចាកចេញ(៣៧៥គ្រួសារ) បុរីកីឡា (៨៣គ្រួសារ) ថ្មគោលប្រលានយន្តហោះ(៣០គ្រួសារ) បេងកក់ភូមិ២២(១៣គ្រួសារ) សហគមន៍៣៤៧(១២គ្រួសារ) និង​សហគមន៍បឹងឈូក(៤៩គ្រួសារ)។ សហគមន៍ទាំងប្រាំមួយនេះសរុបមានចំនួន៥៦២ គ្រួសារ បានស្នើសុំជាថ្មីទៅ​លោក​អភិបាល ប៉ា សុជាតិវង្ស ជួយបញ្ចប់នូវជម្លោះដីធ្លីដ៏រាំរ៉ៃ ដែលបានអូសបន្លាយមកជាច្រើនឆ្នាំ។

លោក ពៅ បញ្ញា តំណាងសហគមន៍៣៤៧ បានលើកឡើងថា កន្លងមកខាងសាលារាជធានី បានហៅតំណាង​ប្រជា​ពលរដ្ឋសហគន៏នីនួយៗចូលជួប នឹងសន្យាថាដោះស្រាយបញ្ហាជូននៅសប្តាហ៍ក្រោយ។ រាល់ការសន្យាមិនត្រូវបាន​អនុវត្តឡើយ ដូច្នេះពួកគាត់សម្រេចផ្លាស់ប្តូរពីចាត់តំណាងចូលជួប ឲ្យគាត់ ចុះជួបជាមួយប្រជាពលរដ្ឋទាំងអស់វិញ ហើយសន្យានឹងដោះស្រាយពេលណាប្រាកដ។ តំណាងរូបនេះបន្តរថា សម្រាប់ពួកគាត់ទាំងប្រាំមួយសហគមន៍​ទុក​ពេលមួយសប្តាហ៍ សម្រាប់ធ្វើការដោះស្រាយ។ «បើមិនដូចឆ្នោះទេ ប្រជាពលរដ្ឋទាំងអស់នឹងមកស្នាក់នៅមុខ​សាលា​រាជធានីទាំងយប់ ទាំងថ្ងៃ ហូបចុកនៅទីនោះតែម្តង»។

អ្នកស្រីហេង មុំ តំណាងប្រជាពលរដ្ឋមកពីសហគមន៍អតីតបឹងកក់អ្នកចាកចេញ បាននិយាយថា ពួកគាត់មកក្នុងថ្ងៃនេះ ដោយសារតែសាលាក្រុងបានធ្វើការវាស់វែងរួចជាស្រេចហើយ តែមិនព្រមដោះស្រាយនូវប្លង់កម្មសិទ្ធិដល់ពួកគាត់។ អ្នកស្រីបន្តថា សម្រាប់ការស់នៅរបស់ពួកគាត់ហាក់បីដូចជាគ្មានការកក់ក្តៅសោះ មិនដឹងថាពួកគាត់នឹងប្រឈមមុខ ទៅនឹងបញ្ហាអ្វីទេនាថ្ងៃខាងមុខ។ អ្នកស្រីលើកឡើងថា ហេតុអ្វីបានជាសាលារាជធានីមិនព្រមចេញប្លង់ កម្មសិទ្ធិជូន​ពួក​គាត់? នេះជាចម្ងល់ដែលពួកគាត់ធ្វើការទាមទា។

អ្នកនាំពាក្យសាលារាជធានី ភ្នំពេញ លោកឡុង ឌីម៉ង់ បានប្រាប់មនោរម្យព័ងអាំងហ្វូថា លោក កើត ឆែ ព្រមចុះមកទទួល​យកញ្ញតិរបស់ប្រជាពលរដ្ឋ។ លោក កើត ឆែ មិនបានធ្វើការសន្យាអ្វីទេចំពោះករណីនេះ ដោយគ្រាន់តែបញ្ជាក់ថា​សាលា​រាជធានីភ្នំពេញ នឹងធ្វើការដោះស្រាយជូនចាប់ពីសប្តាហ៍នេះទៅជាបណ្តើរៗ។ លោកបន្តថា ដោយសារការងារមានច្រើន ហើយក្នុងសប្តាហ៍មុនក៏ឈប់ច្រើនទៀត ដែលជាបញ្ហារាំងស្ទះនូវការងារទាំងនេះ។ លោកបានបញ្ជាក់ថា ប្រទេសមាន​ច្បាប់ សូមឲ្យប្រជាពលរដ្ឋទាំងអស់គោរពច្បាប់ សូមកុំធ្វើអ្វីឲ្យបាត់បង់នូវសណ្តាប់ធ្នាប់ និងរៀបរៀបរយសារធារណៈ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២០ ឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ