សេចក្តីរាយការណ៏មួយបង្ហាញថា ក្រុមហ៊ុនទូរគមនាគមន៏ដ៏ធំ នៃប្រទេសកាតា កំពុងតែពិភាគ្សាចង់ឧបត្ថម្ភ​ក្រុមហង្ស​ក្រហមលីវើភូល (Liverpool) និងមានគំរោងប្តូរឈ្មោះកីឡាដ្ឋាន អេនហ្វៀល (Anfield) ទៅជាឈ្មោះថ្មី។

កីឡាដ្ឋាន អេនហ្វៀល របស់ក្រុមហង្សក្រហម លីវើភូល។

បណ្ដាញទូរទស្សន៍ អាល ចាស្សេរ៉ា (Al Jazeera) បានផ្សាយពាក្យសម្តីរបស់ នាយកក្រុមហ៊ុនទូរគមនាគមន៏ អូអូរ៉េដូ (Ooredoo) នៃប្រទេសកាតា ថា «គោលដៅរបស់យើងចង់ឧបត្ថម្ភដល់ក្រុមធំ នៅអង់គ្លេស ដែលធ្លាប់មានប្រវត្តិសាស្រ្ត​ដ៏អស្ចារ្យ។ តាមការស្រាវជ្រាវរបស់យើង ក្រុមអាសិណល (Arsenal), ម៉ែនឆេស្ទើ យូណៃធីត (Manchester United) និង​ក្រុម ម៉ែនឆេស្ទើ ស៊ីធី (Manchester City) កំពុងតែជាប់កិច្ចសន្យាជាមួយនឹង ក្រុមហ៊ុនដទៃទៀត ក្នុងរយះពេលវែង។ ដូច្នេះ លីវើភូល ជាក្រុមមួយ ដែលយើងនៅមានឱកាស ក្នុងពេលបច្ចុប្បន្ន។»

គាត់បន្តថា «យើងចង់ឧបត្ថម្ភ ដល់ក្លឹបគ្រប់ផ្នែកទាំងអស់។ យើងចង់ឧបត្ថម្ភទាំងកីឡាដ្ឋាន (ប្តូរឈ្មោះ) និងនៅលើអាវ របស់កីឡាករ។ គោលដៅរបស់យើង ចង់បានទីផ្សារដ៏ធំ នៅអាស៊ី ដែលសម្បូរទៅដោយ អ្នកគាំទ្រក្រុមបាល់ទាត់​ព្រីមែលីក (Premier League)។»

នាយករូបនោះ បានបន្ថែមថា «វាជាការចាប់អារម្មណ៏មួយ ព្រោះក្រុមលីវើភូល កំពុងតែត្រូវការលុយច្រើន ដើម្បីធ្វើការ​ប្រកួតប្រជែង ជាមួយនឹងក្រុមធំៗ នៅអ៊ឺរ៉ុបដទៃៗទៀត ហើយយើង ក៏កំពុងតែសិក្សាលើចំណុចទាំងនោះ។»

ក្រុមហង្សក្រហម បច្ចុប្បន្នក្រុមហ៊ុន ស្តែនដាដ ឆាតថឺ (Standard Chartered) ជាអ្នកឧបត្ថម្ភ ក្នុងកិច្ចសន្យាមួយ ២០លាន​ផោន ក្នុងមួយឆ្នាំ។ ប៉ុន្តែក្រុមហ៊ុននេះ នឹងអស់កិច្ចសន្យា នៅរដូវក្តៅឆ្នាំក្រោយ។

កាលពីខែតុលា ឆ្នាំមុន អ្នកចាត់ការក្លឹប លីវើភូល លោក អ៊ីយ៉ាន អាយរ៉េ (Ian Ayre) ក៏បាននិយាយដែរថា «ក្រុមរបស់​លោក នឹងមិនធ្វើការប្តូរឈ្មោះ កីឡាដ្ឋាន អេនហ្វៀល នោះទេ ព្រោះវាជាប្រវត្តិសាស្រ្តរបស់ក្លឹប ជាពិសេសអ្នកគាំទ្រ​របស់​យើង នឹងមានការមិនពេញចិត្តទេ បើយើងប្តូរវា។»

គួររំឭកថា ក្រុមហង្សក្រហម លីវើភូល ជាក្រុមមួយ ដែលជោគជ័យជាងគេ ក្នុងប្រទេសអង់គ្លេស ដែលធ្លាប់លើកពាន​ព្រីមែលីកបាន ១៨លើក នឹងលើកពានរង្វាន់កំពូលរបស់អ៊ឺរ៉ុប ឆែមពានលីក (Champions League) បានចំនួន ៥លើក។ ប៉ុន្តែ ៣រដូវកាលចុងក្រោយនេះ ក្រុមនេះ បានធ្លាក់ទម្រង់លេងយ៉ាងខ្លាំង ហើយបច្ចុប្បន្នក៏កំពុងតែឈរ​នៅចំណាត់​ថ្នាក់​លេខ៧ ជាតំណែងមួយ ដែលមិនអាចចូលនៅក្របខ័ណ្ឌអ៊ឺរ៉ុប នោះរដូវកាលក្រោយថែមទៀត។

គោលបំណងរបស់ក្រុម លីវើភូល ធ្វើយ៉ាងណា ឲ្យបានឈរនៅដំណែងកំពូលទាំង៤ ក្នុងក្របខ័ណ្ឌព្រីមែលីកមកវិញ ប៉ុន្តែ​គោលបំណងនោះ មិនទាន់ធ្វើបានសម្រេចនោះទេ ដោយសារតែបច្ចុប្បន្ន ក្រុមផ្សេងៗ ក៏កាន់តែខ្លាំង និងមានលុយ​ច្រើន ចំណែកឯ លីវើភូល មានចំនួន លុយដ៏តិចតួច។ ប៉ុន្តែបើសិនជា ក្រុមហ៊ុនធំប្រទេសកាតាមួយនេះ មកធ្វើការឧបត្ថម្ភ នោះ​លីវើភូល អាចនឹងមានសង្ឃឹម បង្កើតប្រវត្តិសាស្ត្រ ក្លាយជាក្រុមខ្លាំងជាថ្មីម្តងទៀត៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ