កាសែត ដៀលីអេចប្រេស៏ (Daily Express) បានឲ្យដឹងថា ក្រុមបាល់ទាត់នៃប្រទេសអង់គ្លេស ឆែលស៊ី (Chelsea) បាន​យល់ព្រមឲ្យលោក ជូសេ ម៉ូរីញ៉ូ (Jose Mourinho) ធ្វើជាគ្រូបង្វឹកថ្មីនៅទឹកដី ស្ទែមហ្វដប្រិជ (Stamford Bridge) នៅរដូវ​ក្តៅខាងមុខ និងមានកិច្ចសន្យារយះពេល ៣ឆ្នាំ។

លោក ជូសេ ម៉ូរីញ៉ូ។

លោក ម៉ូរីញ៉ូ និងម្ចាស់ក្លឹបតោខៀវ លោក រ៉ូម៉ែន អាប្រាម៉ូវីច (Roman Abramovich) បានយល់ព្រម ក្នុងលក្ខ័ណផ្ទាល់ខ្លួន​អស់ហើយ ដែលមានកិច្ចសន្យារយះពេល៣ឆ្នាំ។ ប៉ុន្តែនៅចាំតែការចុះហត្ថលេខា របស់គ្រូបង្វឹកវ័យ៥០ឆ្នាំរូបនេះ តែ​ប៉ុណ្ណោះ។ គ្រូបង្វឺករូបនេះ នៅជាប់កិច្ចសន្យាជាមួយ នឹងក្រុមរៀលម៉ាឌ្រីដ (Real Madrid) នៅឡើយ ប៉ុន្តែគាត់នឹងពិភាក្សា​ពីបញ្ហានេះ ជាមួយនឹងម្ចាស់ក្លឹប។

អតីតគ្រូបង្វឹកក្រុមឆែលស៊ីរូបនេះ នឹងត្រឡប់មកដឹកនាំក្រុមវិញ បើសិនជាក្រុមភាគខាងលិចទីក្រុងឡុងដ៏មួយនេះ អាច​លេងក្នុងក្របខ័ណ្ឌឆែមពានលីក (Champions League) នៅរដូវកាលក្រោយ។ ក្រុមឆែលស៊ី ដែលដឹកនាំដោយលោក រ៉ាហ្វា បេនីតេស (Rafa Benitez) បច្ចុបន្បកំពុងឈរនៅចំណាត់ថ្នាក់លេខ៣ ក្នុងតារាងព្រីមែលីក ហើយមាន៥ពិន្ទុនាំមុខ​ក្រុមចំណាត់ថ្នាក់លេខ៥ និងនៅសល់ការប្រកួតចំនួន ៩លើកទៀត។

ជំហ៊ានទី២ លោក ម៉ូរីញ៉ូ មិនចង់ឲ្យអ្នកគ្រប់គ្រងខាងបចេ្ចកទេស លោក មីឆែល អេម៉ិនណាឡូ (Michael Emenalo) មក​ត្រួតត្រាលើគាត់ទេ។ នេះជាបញ្ហាដែលលោក អាប្រាម៉ូវីក ត្រូវដោះស្រាយ ក្នុងពេលខាងមុខ។

លោក ម៉ូរីញ៉ូ បានពាក់ព័ន្ធនឹងការវិលត្រឡប់មកកាន់ក្លឹបឆែលស៊ី ជាច្រើនលើកមកហើយ ហើយក៏ជាក្លឹបដែល​គាត់ធ្លាប់​ដឹកនាំ ពីខែមិថុនា ឆ្នាំ២០០៤ រហូតដល់ខែកញ្ញា ឆ្នាំ២០០៧ដែរ។ គ្រូបង្វឹកសញ្ជាតិព័រទុយហ្គាល់រូបនេះ បានបង្ហាញ​ពីចំណាប់អារម្មណ៏ពីការចង់ត្រឡប់មកកាន់ក្របខ័ណ្ឌព្រីមែលីកវិញ។ គាត់បាននិយាយកាលពីចុងសប្តាហ៏កន្លងទៅថា «ខ្ញុំនឹងវិលត្រឡប់ ទៅកាន់កន្លែងមួយ ដែលខ្ញុំធ្លាប់នៅ។»

ជូសេ ម៉ូរីញ៉ូ បានជួយឲ្យក្រុមរៀលម៉ាឌ្រីដ ទទួលបានពានឡាលីកា (La Liga) លីកកំពូលនៃប្រទេសអេស្ប៉ាញ កាលពី​រដូវកាលមុន។ ប៉ុន្តែក្នុងរដូវកាលនេះ គាត់ធ្វើមិនសូវបានល្អទេ ដោយបច្ចុបន្ប ក្រុមរៀលម៉ាឌ្រីដ កំពុងឈរនៅចំណាត់​ថ្នាក់លេខ២ ហើយមានគម្លាតយ៉ាងឆ្ងាយ ពីក្រុមអ្នកមានបុណ្យ បាសេឡូណា (Barcelona) រហូតដល់១៣ពិន្ទុ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ