ក្មេងស្រីក្នុងរដ្ឋធានីញ៉ូដេលី មួយរូបអាយុ៥ឆ្នាំ  បានធ្លាក់ខ្លួនឈឺជាទម្ងន់ នៅថ្ងៃសៅរ៍ទី២០ខែមេសានេះ បន្ទាប់ពីនាងតូច​ត្រូវបាន«រំលោភ» និងធ្វើ«ទារុណកម្ម» កាលពីដើមអាទិត្យ ដោយជនម្នាក់ ដែលជាអ្នករស់នៅជិតខាងផ្ទះរបស់នាង ហើយ​បានចាប់នាងបង្ខាំងទុក ចំនួនពីរថ្ងៃនៅក្នុងបន្ទប់។

បន្ទាប់ពីបានរកឃើញ បង្ខាំងនៅក្នុងបន្ទប់ នាងតូចត្រូវបានបញ្ជូនទៅកាន់មន្ទីរពេទ្យ។

ភ្នាក់ងារនគរបាល បានអោយដឹងថា នាងតូចដែលទើបតែមានអាយុ៥ឆ្នាំ បានបាត់ខ្លួនតាំងពីថ្ងៃច័ន្ទទី១៥ខែមេសា ហើយ​ត្រូវបានរកឃើញមកវិញ ដោយអ្នកជិតខាងរបស់នាងម្នាក់ទៀត នៅថ្ងៃពុធទី១៧ខែមេសា។ អ្នកជិតខាងនោះ បានលឺ​សម្លេងយំខ្សាយៗ ខណៈដែលនាងត្រូវបានបង្ខាំងទុក នៅក្នុងបន្ទប់មួយ ស្ថិតក្នុងអាគារស្នាក់នៅតែមួយ នឹងលំនៅដ្ឋាន​របស់ឪពុកម្ដាយនាង ដែលប្រកបរបរជាកម្មករ រស់នៅក្នុងសង្កាត់ដ៏ក្រីក្រនេះ។

ជនសង្ស័យអាយុ២២ឆ្នាំ មិនមានវត្តមាននៅនឹងកន្លែងទេ នៅពេលដែលកម្លាំងសមត្ថកិច្ច បានចូលទៅដល់។ ប៉ុន្តែជននេះ ត្រូវបានចាប់ខ្លួន នៅថ្ងៃសៅរ៍នេះ នៅរដ្ឋប៊ីហារ (Bihar) មានចម្ងាយប្រមាណជា១០០០គីឡូម៉ែត្រ ខាងកើតនៃរដ្ឋធានីរបស់​ប្រទេសឥណ្ឌា។ ជននេះ បានគេចខ្លួនទៅទីនោះ ដោយទំនងជាចង់ទុកអោយ នាងតូចរងទុក្ខ រហូត«ស្លាប់»តែម្នាក់ឯង។ នៅថ្ងៃទី១៥​ខែមេសា ថ្ងៃដែលក្មេងស្រីបាត់ខ្លួន នគរបាលបាននិយាយថា ជននេះបានទាក់ទាញនាងតូច ជាមួយ​នឹង​ប្រដាប់​ក្មេងលេង ហើយលូកស្ទាបនាងតូច ជាច្រើនដង។

តាមរូបភាពបញ្ចាំងនៅតាមទូរទស្សន៍ គេឃើញមានមនុស្សជាច្រើន បានព្យាយាមតាមវាយជនសង្ស័យ ហើយខ្លះទៀត​បាន​ព្យាយាមគប់នឹងស្បែកជើង ក្នុងខណៈពេលដែលនគរបាល ដឹកជននេះទៅកាន់អាកាសយាន្ដដ្ឋាន បញ្ជូនទៅរដ្ឋធានីវិញ។

អ្នកទទួលខុសត្រូវម្នាក់នៅមន្ទីរពេទ្យនៃរដ្ឋាភិបាលឥណ្ឌា លោកស្សាម៉ា (D.K. Sharma) បានប្រកាសថា នាងតូចបានរង​មុខរបួសយ៉ាងធ្ងន់ធ្ងរ ជាពិសេសមុខរបួសដែលបង្កពី«មួយកាំបិត» ចំបំពង់ករ និង«ស្នាមខាំ»ជាច្រើន។

ហុចលុយ២៨អ៊ឺរ៉ូ (ប្រមាណជា ៣៥ដុល្លា) ដើម្បីកុំអោយបន្តសំនុំរឿង

ក្រៅពីអំពើហឹង្សា ដែលមិនអាចស្មានដល់នេះ សកម្មភាពរបស់អាជ្ញាធរ នៅចំពោះឪពុកម្ដាយក្មេងស្រីរងគ្រោះ ក៏បាន​បញ្ឆេះអោយមានកំហឹងកើតឡើងជាខ្លាំងដែរ។ ថ្ងៃដែលនាងតូចបាត់ពីផ្ទះដំបូង ឪពុកម្ដាយរបស់នាង ត្រូវបានទទួល​ដោយ​ភ្នាក់ងារនគរបាល ដែលហាក់ដូចជាមិនយកចិត្តទុកដាក់អ្វីសោះ ហើយបានប្រើពេលជាច្រើនម៉ោង ដើម្បីពាក្យបណ្ដឹង​បាត់កូន​របស់ឪពុកម្ដាយ ត្រូវបានទទួលទុកដោយពួកនគរបាលទាំងនោះ។

នៅពេលដែលឪពុកម្ដាយ បានទទួលកូនស្រីមកវិញ និងយល់ពីសភាពដ៏រន្ធត់របស់នាង ពួកគាត់បានត្រឡប់ទៅទៅ​ស្នងការ​នគរបាលវិញ ដើម្បីដាក់ពាក្យបណ្ដឹងជាថ្មី ប្ដឹងពីបទរំលោភ។ ព័ត៌មានមិនផ្លូវការជាច្រើន បាននិយាយ​ពីមាត់មួយ​ទៅមាត់មួយ ថា ភ្នាក់ងារនគរបាលម្នាក់ បានហុចលុយ ២០០០រូពី (ប្រមាណជា២៨,៤អ៊ឺរ៉ូ ឬ៣៥ដុល្លាអាមេរិក) ទៅឲ្យ​ឪពុក​ម្ដាយ ដើម្បីសុំកុំអោយបន្តសំនុំរឿង។ រដ្ឋមន្ត្រីមហាផ្ទៃរបស់ប្រទេស លោក ស៊ុយស្សីល កូមារ ស្សាញឌី (Sushil Kumar Shinde) បានប្រកាសបើកការស៊ើបអង្កេតមួយឡើង ដើម្បីរកអោយឃើញពិតប្រាកដ ទាក់ទងនឹងការខ្ជីខ្ជារ​របស់ពួក​នគរបាលទាំងនេះ។

កំហឹងផ្ទុះឡើងនៅតាមផ្លូវ

បួនខែបន្ទាប់ពីការរំលោភជាក្រុម ប្រព្រឹត្តទៅលើនិស្សិតពេទ្រស្រីម្នាក់ នៅញ៉ូដេលីនោះមក អំពើហឹង្សាដោយ​ការរំលោភ​ផ្លូវភេទ នៅប្រទេសឥណ្ឌា មិនបានថមថយកម្លាំងឡើយ។ មនុស្សរាប់ពាន់នាក់ បានប្រមូលគ្នាចុះនៅតាមដងផ្លូវ នៅ​ថ្ងៃ​សៅរ៍នេះ ដើម្បីសម្ដែងពីកំហឹង នៅចំពោះករណីថ្មី ដ៏«ស្មោគរោគ»នេះ។ ក្រៅពីរបៀបធ្វើការ ដែលនិយម​ការិយាធិបតេយ្យ​ជ្រុលនោះ ពួកគេបានចោទអាជ្ញាធរបន្ថែមទៀត ថាបានប្រើពេល«យូរជ្រុល» ដើម្បីចាត់វិធានការឆ្លើយតប ទល់នឹងអំពើ​អមនុស្សធម៌អស់ទាំងនេះ។

ការចុះធ្វើបាតុកម្មនេះ បានកើតឡើងតាំងពីថ្ងៃសុក្រ តែបានរីកឥទ្ធិពលខ្លាំងឡើង នៅថ្ងៃសៅរ៍នេះ នៅពេលដែលមាន​វីដេអូមួយ បានបង្ហោះនៅលើបណ្ដាញអាំងធើណែត បង្ហាញពីនគរបាលម្នាក់ ដែលទំនងជាបានទះកំផ្លៀង​បាតុករ​ ជាស្ត្រី​មួយរូប៕

------------------------------------------------
ដោយ ៖ កេសរកូល - ភ្នំពេញ ថ្ងៃទី២០ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ