នៅពេលដែលសម្លឹងតាមបង្អួច មើលទៅក្រៅ បុរសចំណាស់ម្នាក់ ដែលជាអ្នករស់នៅ ក្នុងក្រុង «Grand Rapids» នៃរដ្ឋមីឈីហ្គែន  បានប្រទះឃើញ នូវឈុតឆាកដ៏កម្រមួយ ដែលបានកើតឡើង នៅចំពោះមុខគាត់ កាលពីថ្ងៃសុក្រមុន។ ក្រាបនៅរាបស្មើ លើដំបូលផ្ទះរបស់ខ្លួន យុវជនអ្នកជិតខាងមួយរូប ដែលនៅផ្ទះជាប់​ទល់មុខ កំពុងលេងបិតពួន​ ជាមួយនឹងក្រុមនគរបាល។ បុរសចំណាស់ ដែលបានថតរូបនេះ យកមកដាក់​បង្ហោះ នៅលើគេហទំព័រចែករំលែករូបភាព «Imgur» បានសរសេរអមនឹងរូបថតថា៖ «នគរបាល​ចំណាយ​​ពេល​ជាង១០នាទី ទម្រាំ​រក​បុរស​នេះ​ឃើញ»។ រូបថត(ខាងក្រោម)នេះ គ្រាន់តែបានដាក់បង្ហោះភ្លាម មាន​មនុស្ស​ចុច​ចូលទៅមើល ចំនួនដល់ទៅជាង៣លានដង៕

ភ្នាក់ងារនគរបាល ប្រចាំតំបន់មួយរូប លោក តេរី ឌីស៊ុន (Terry Dixon) បានសរសេរ នៅលើទំព័រហ្វេសប៊ុក​ថា៖ «មើលទៅ រូបថតនេះបានក្លាយជា រូបថតដ៏អស្ចារ្យ ហើយមនុស្សម្នាចង់ដឹងថា តើមានរឿងអ្វីកើតឡើង»។ ហើយ​ដើម្បីបំពេញចិត្ត អ្នកដែលចង់ដឹងរឿងរ៉ាវនេះ ភ្នាក់ងារនគរបាលយើង បានថ្លែងរៀបរាប់ ពីរឿងរ៉ាវនេះ ប្រាប់​សារព័ត៌មាន «New York Daily News»។

នៅក្នុងអត្ថបទរបស់សារព័ត៌មាន ភ្នាក់ងារ តេរី ឌីស៊ុន បានបញ្ជាក់ថា នគរបាលបានចេញ ទៅធ្វើអន្តរាគមន៍ នៅក្នុង​គេហដ្ឋាន​របស់យុវជន អេវ៉ាដ៍ ម៉ាតាំង (Edward Martin) អាយុ២៥ឆ្នាំ ដោយសារនគរបាល ទទួល​បាន​ការហៅទូរស័ព្ទ​ដ៏បន្ទាន់មួយ ទាក់ទងនឹងជម្លោះទាស់ទែង ក្នុងគ្រួសារមួយនេះ។ នៅពេល​នគរបាល​មកដល់ យុវជន អេវ៉ាដ៍ ម៉ាតាំង បានបើកទ្វាឃើញនគរបាល ក៏បានបិទទ្វាវិញភ្លាម ដោយទុកឲ្យ​ភ្នាក់ងារ​អាជ្ញាធរ ទាំង​ពីរនាក់នេះ នៅខាងក្រៅរហូតដល់នាងជាសង្សា បានមកបើកទ្វា។

ល្បែងបិតពួន ដែលត្រូវចាយដើមទុនច្រើន!

នៅខាងក្នុងផ្ទះ នគរបាលបានស្វែងរកយុវជន អេវ៉ាដ៍ មួយសន្ទុះធំ ប្រមាណជាង១០នាទី តែរកមិនឃើញ​សោះ។ នៅទីបំផុតភ្នាក់ងារនគរបាលម្នាក់ បានចេញមកខាងក្រៅផ្ទះ ហើយបានសម្លឹងទៅផ្នែកខាងលើផ្ទះ ទើបឃើញយុវជនកំពុងក្រាប នៅលើដំបូល។ នគរបាលបានបង្ខំ ឲ្យយុវជនចុះពីលើដំបូលផ្ទះ និងបាននាំខ្លួន​ទៅឃុំអស់មួយយប់ ពីបទរារាំងនឹងការឃាត់ខ្លួន ហើយបង្កការរ៉ៅឆាន ដល់ការងារនគរបាល។ យុវជន​ត្រូវ​​បាន​ដោះលែង ឲ្យមានសេរីភាពនៅថ្ងៃស្អែកឡើង តែនឹងត្រូវត្រឡប់ ចូលទៅសវនាការកាត់ទោសវិញ នៅថ្ងៃ​​ទី១០ ខែសីហានេះ៕