មនុស្ស១៤នាក់ បានរងរបួស កាលពីថ្ងៃអង្គារទី០៩ខែមេសានេះ ដោយសារអាវុធស្រួច របស់និស្សិតអាមេរិកាំងម្នាក់ នៅ​ក្នុងអន្តេវាសិកដ្ឋានមួយ នៃសកលវិទ្យាល័យ ឡូន​ស្ដារ មិនឆ្ងាយប៉ុន្មាន ពីទីក្រុង ប៊ូសស្តុន រដ្ឋតិចសាស។ អ្នករបួសពីរនាក់ បានស្ថិតនៅក្នុងសភាពធ្ងន់ធ្ងរ គួរអោយព្រួយបារម្ភ។

អន្តេវាសិកដ្ឋាន ស៊ីហ្វែរ នៃសកលវិទ្យល័យឡូនស្ដារ។

និស្សិតម្នាក់ បានធ្វើអោយមនុស្ស១៤នាក់រងរបួស ក្នុងនោះមានពីរនាក់របួសធ្ងន់ ជាមួយនឹងអាវុធស្រួច (កាំបិតស្នៀត ឬដាវសាមារ៉ៃ?) ដែលគេនៅមិនទាន់កំណត់បាននៅឡើយ នៅក្នុងអន្តេវាសិកដ្ឋានមួយ នៃសកលវិទ្យាល័យ ឡូនស្ដារ (Lone Star) ស្ថិតនៅក្បែរទីក្រុងប៊ូសស្តុន (Houston)។ នគរបាលបានប្រកាសប្រាប់ពីហេតុការណ៍នេះ ដោយបាន​បញ្ចាក់​ថា និស្សិតរូបនោះត្រូវបានចាប់ខ្លួន នៅក្រោយពេលបង្កហេតុរួច។

នៅម៉ោងប្រមាណជា១១ ម៉ោងក្នុងស្រុក (ម៉ោង០៩យប់ ម៉ោងនៅកម្ពុជា) អាជ្ញាធរបានទទួលដំណឹងថា ជនប្រដាប់ដោយ អាវុធចុងស្រួច បានដើរ«ចាក់»គេឯង ដោយសេរី នៅក្នុងគ្រឹស្ថានទទួលអោយស្នាក់នៅ ឈ្មោះ ស៊ីហ្វែរ (Cyfair) នៃ​សកលវិទ្យាល័យនេះ។ នគរបាលប្រចាំតំបន់ បានថ្លែងថា «យើងមិនបានដឹងអោយពិតប្រាកដ ថាជាអាវុធអ្វី ដែលនិស្សិត​ប្រើនោះនៅឡើយ។ យើងមិនដឹងថា តើវាជាកាំបិត ឬជាអ្វីផ្សេងទៀតនោះនៅឡើយ។»

«យើងបានឃាត់ខ្លួន យុវជនស្បែកសររូបនេះ ដែលមានអាយុប្រហែលជា ២១ឆ្នាំ ហើយដែលជានិស្សិតមួយរូប នៅក្នុង​សកលវិទ្យាល័យ» នគរបាលបាននិយាយបង្ហើប ពីរូបរាងជនប្រពឹត្តិ តែមិនបានបញ្ជាក់អោយលំអិតជាងនេះ ហើយក៏​មិន​បានពន្យល់ពីមូលហេតុ ដែលជម្រុយអោយយុវជននេះ យកអាវុធស្រួចទៅ«ចាក់»មនុស្សនៅទីនោះយ៉ាងដូច្នេះនោះដែរ។

នៅលើគេហទំព័ររបស់សកលវិទ្យាល័យ បាននិយាយពីជនសង្ស័យទីពីរ នៅក្រោយពីហេតុការណ៍នេះ តែត្រូវបាន​ច្រាន​ចោលដោយនគរបាល។ នគរបាលបានរៀបរាប់ថា យុវជនដ៏អស្ចារ្យ ត្រូវបានចាប់បោកទៅលើដី ដោយនិស្សិតម្នាក់ទៀត មុននឹងត្រូវបានឃាត់ខ្លួន។ នគរបាលបានបន្ថែមថា អ្នករបួសចំនួនបួននាក់ ត្រូវបានដឹកតាម ឧទ្ធម្ភាគចក្រ ទៅកាន់មន្ទីរ ពេទ្យ  និងអ្នករបួសពីរនាក់ ស្ថិតក្នុងសភាពធ្ងន់ធ្ងរ។

សកលវិទ្យាល័យ .ដែលបានបិតទ្វាជាបណ្ដោះអាសន្ននោះ បានផ្សាយនៅលើគេហទំព័ររបស់ខ្លួន ថាអំពើរល្មើស បាន​កើតឡើងនៅជុំវិញ មហាវិទ្យាល័យវិទ្យាសាស្ត្រសុខាភិបាល ហើយថា ព័ត៌មានស្ដីពីឈុតឆាក នៃឧក្រិដ្ឋកម្ម បានបន្ត​មាន​ឥតឈប់ឈរ។ គ្រឹស្ថានអប់រំនេះ នឹងត្រូវបើកទ្វាឡើងវិញ នៅថ្ងៃពុធនេះ។

សូមបញ្ជាក់ថា នៅក្នុងអន្តេវាសិកដ្ឋាននេះ តែនៅផ្នែកផ្សេងមួយទៀត ក៏ត្រូវបានរងដោយ ការបាញ់បោះម្ដងរួចហើយដែរ កាលពីខែមករាឆ្នាំ២០១៣នេះ ដែលកាលនោះ ជនល្មើសបានបាញ់ ធ្វើអោយមនុស្សបីនាក់រងរបួស៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី០៩ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ