ខួបទី១៧ នៃថ្ងៃ៥-៦ កក្កដា (ឆ្នាំ១៩៩៧-២០១៤) តើនរណាធ្វើអ្វីខ្លះ?
វិបត្តិនយោបាយ - គណបក្សសង្គ្រោះជាតិ កាលពីថ្ងៃទី៣ ខែកក្កដា ម្សិលម៉ិញនេះ បានបង្ហាញឆន្ទះរបស់ខ្លួន ក្នុងការប្រារព្វគោរពវិញ្ញាណក្ខន្ធ អ្នកដែលបានបាត់បង់ជីវិត ក្នុងព្រឹត្តិការណ៍ផ្ទុះអាវុធថ្ងៃទី៥-៦ ខែកក្កដា ឆ្នាំ១៩៩៧។ ដោយឡែកគណបក្សហ្វុនស៊ីនប៉ិច ដែលមានអ្នកជិតស្និតរបស់ខ្លួន ស្លាប់ក្នុងព្រឹត្តិការណ៍នេះ នៅមិនទាន់បង្ហាញឆន្ទៈ ពីការរៀបចំប្រារព្វពិធីនេះនៅឡើយទេ។
ក្នុងបរិយាកាសបែបនេះ ប្រាកដជាមានអ្នកសួរថា តើថ្ងៃទី៥ ទី៦ ខែកក្កដា ឆ្នាំ១៩៩៧ ជាថ្ងៃអ្វី?
សម្រាប់លោក កឹម សុខា អនុប្រធានគណបក្សសង្គ្រោះជាតិ ក្នុងថ្ងៃទី៤ ខែកក្កដាឆ្នាំ២០១៤នេះ បានចាត់ទុកថា ព្រឹត្តិការណ៏៥-៦ កក្កដា ១៩៩៧ ជាព្រឹត្ដិការណ៏មួយ ដែលបានធ្វើឲ្យឈាមខ្មែរអ្នកស្នេហាជាតិហូរដោយអយុត្តិធម៌ ហើយក៏ជាព្រឹត្តិការណ៏មួយ ដែលសម្លាប់ពន្លកប្រជាធិបតេយ្យនៅកម្ពុជា។ [...]
