យ៉ាងហោចណាស់មានមនុស្សម្នាក់ បានស្លាប់ភ្លាមៗ និងមានរបួសជាង១០នាក់ផ្សេងទៀត ក្នុងព្រឹត្តិការណ៍បាក់ស្រុត ផ្លូវហៃវ៉េស៍មួយកំណាត់ ដែលកំពុងសាងសង់ កាលពីរសៀលថ្ងៃព្រហស្បត្តិ៍ ក្នុងទីក្រុងប៊េឡូ អូរីហ្សុនតេ (Belo Horizonte) ទីក្រុងមួយ នៃប្រទេសប្រេស៊ីលដែលទទួលភ្ញៀវមកស្នាក់នៅ សម្រាប់ព្រឹត្តិការណ៍បាល់ទាត់​ពិភពលោក។

ការបាក់ស្រុតស្ពានអាកាស មើលពីលើ។ (រូបថត Futura Press)

បាល់ទាត់ពិភពលោក - សំណង់ផ្លូវ ហៃវ៉េស នេះ ជាគម្រោងមួយ នៅក្នុងការសាងសង់រចនាសម្ព័ន្ធ សម្រាប់ទទួល​ព្រឹត្តិការណ៍បាល់ទាត់ពិភលោក ឆ្នាំនេះ នៅក្នុងប្រទេសប្រេស៊ីល។ អ្នកនាំពាក្យផ្នែកសន្តិសុខមួយរូប របស់ប្រទេស​នេះ បានបញ្ជាក់ពីតុល្យភាពថា មានមនុស្ស២នាក់ បានស្លាប់ និង១៩នាក់ទៀតបានរងរបួស។ ប៉ុន្តែក្រុមអ្នកជួយ​សង្គ្រោះ បានបញ្ជាក់ថា មានមនុស្សតែម្នាក់ទេ ដែលស្លាប់និង១៣ ទៀតប៉ុណ្ណោះ ដែលបានរងរបួស។

ប្រធានាធិបតីប្រស៊ីល លោកស្រី ឌីលម៉ា​ រូសែល (Dilma Rousseff) បានសម្ដែងការចូលរួមទុក្ខក្រៀមក្រំ ជាមួយនឹង​គ្រួសារជនរងគ្រោះ ដោយបានបញ្ជាក់នៅលើទំព័រទ្វីសធើផ្លូវការ របស់លោកស្រីថា៖ «រដ្ឋាភិបាលនឹងចាត់វិធានការ សម្រាប់សាលាក្រុង និងអជ្ញាធរក្រុង ប៊ែឡូ អូរីហ្សនតេ នូវអ្វីៗដែលចាំបាច់»។

ហេតុការណ៍បានកើតឡើង នៅវេលាម៉ោងប្រមាណជា ១៥និង៣០នាទី ម៉ោងក្នុងស្រុក ដោយការស្រុតចុះនៃ​ស្ពាន​អាកាស ធ្វើពីស៊ីម៉ង់ បានបាក់ស្រុកសង្កត់លើរថយន្ដបួនគ្រឿង ក្នុងនោះពីរគ្រឿងជារថយន្ដដឹកទំនិញ មួយគ្រឿងជា​រថយន្ដក្រុង និងមួយគ្រឿងទៀត ជារថយន្ដតូច។ ទីកន្លែងដែលកើតហេតុនោះ ស្ថិតនៅចំងាយប្រមាណ ៥​គីឡូម៉ែត្រ​ប៉ុណ្ណោះ ពីពហុកីឡាដ្ឋាន ដែលទទួលការប្រកួតបាល់ទាត់ពិភពលោក។

សាក្សីម្នាក់បាននិយាយថា៖ «យើងស្មានតែគ្រោះរញ្ជួយដី។ ដីបានរង្គើយ៉ាងខ្លាំង។ ខ្ញុំបានស្ដាប់ឮសម្លេងខ្ទរបាន​លាន់រំពងឡើង ហើយខ្ញុំបានមើលតាមបង្អួច ឃើញទ្រនរផ្លូវហៃវ៉េស៍ទាំងនោះ បានបាក់ស្រុតនៅនឹងដី។»

អ្នកនាំពាក្យរបស់ក្រុមអ្នកជួយសង្គ្រោះ បាននិយាយថា៖ «ស្ពានអាកាស ធ្វើផ្លូវហៃវ៉េស៍ នេះ កំពុងសង់ជិតដល់ពេល​បញ្ចប់ហើយ។ នៅពេលដែលគ្រោះថ្នាក់បានកើតឡើង ក្រុមកម្មករកំពុងតែដកប្រព័ន្ធទ្រស្ពាននេះចេញ។»។

ស្ពានអាកាសដែលផ្ដើមសាងសង់តាំង ពីជាងមួយឆ្នាំមកហើយនោះ ស្ថិតក្នុងគម្រោងអភិវឌ្ឍន៍ នៃការប្រកួត​បាល់​ទាត់​ពិភពលោកឆ្នាំ២០១៤នេះ។ វានឹងត្រូវសម្ភោធដាក់ឲ្យប្រើប្រាស់ នៅចុងខែកក្កដាខាងមុខ។ សូមបញ្ជាក់ដែរថា​ ទីក្រុង ប៊ែឡូ អូរីហ្សនតេ បានទទួលការជំនួបបាល់ទាត់ពិភពលោក ចំនួន៥ប្រកួតរួចមកហើយ ហើយទីក្រុងនេះ​ក៏​នឹងគ្រោងទទួលជំនួបប្រកួតដដែល ក្នុងវគ្គពាក់កណ្ដាលផ្ដាច់ព្រ័ត្រ នាថ្ងៃអង្គារខាងមុខនេះដែរ៕

សូមទស្សនាវីដេអូ ពីហេតុការណ៍នេះ ដូចខាងក្រោម៖