ប្រតិកម្មនឹងព័ត៌មាន «ថោង សារ៉ាត់ ជាកូនប្រសារ កឹម សុខា»
មើលទៅ សំនុំរឿងលោក ថោង សារ៉ាត់ ដែលដូចជាស្ងាត់ទៅមួយរយៈនេះ នៅមានភាគបន្តច្រើនទៀត។ ជាពិសេស នៅពេលដែលបញ្ហាដ៏រំជើបរំជួលនេះ ត្រូវបានគេភ្ជាប់ចូលមកក្នុងបញ្ហានយោបាយ។ នៅថ្ងៃទី១៣ ខែមករា ឆ្នាំ២០១៤ សារព័ត៌មានភ្នំពេញថ្មី បានចេញផ្សាយអត្ថបទមួយ ដែលមានចំណងជើងថា «ទម្លាយពត៌មានលោក ថោង សារ៉ាត់ ជាកូនប្រសារលោក កឹម សុខា» ដោយលើកយកប្រភពមិនចេញអត្តសញ្ញាណ មកសំអាងថា លោកឧកញ៉ា ថោង សារ៉ាត់ គឺជាកូនប្រសាររបស់លោក កឹម សុខា អនុប្រធានទី១រដ្ឋសភា និងជាអនុប្រធានគណបក្សសង្គ្រោះជាតិ។
ព័ត៌មាននេះ ត្រូវបានទំព័រហ្វេសប៊ុកមួយចំនួន ដែលស្និតនឹងគណបក្សប្រជាជនកម្ពុជា និងរដ្ឋាភិបាលលោក ហ៊ុន សែន យកមកចុះផ្សាយជាបន្តបន្ទាប់ នៅព្រឹកថ្ងៃទី១៤ ខែមករា ឆ្នាំ២០១៥នេះ បង្កឲ្យមានអ្នកចែករំលែក និងផ្ដល់ជាយោបល់យ៉ាងច្រើនផុលផុស។ [...]