«នៅថៃ យើងគ្មានបណ្ដាញភេរវនិយមទេ»
«ជនដែលគួរឲ្យសង្ស័យពីរនាក់ ត្រូវបានកោះហៅ ដើម្បីធ្វើការសាកសួរ ទាក់ទងនឹងហេតុការណ៍ភេរវកម្ម នៅក្រុង ហួរហ៊ីន» នេះបើតាមការអះអាង យ៉ាងប្រយ័ត្នប្រយែង របស់អ្នកនាំពាក្យនគរបាលជាតិថៃ លោក ពីយ៉ាប៉ាន ពីងម័ង (Piyapan Pingmuang) ទៅកាន់ទីភ្នាក់ងារព័ត៌មានបារាំង (AFP)។ ប៉ុន្តែអ្នកនាំពាក្យ បានបដិសេធប្រើពាក្យ ហៅជនទាំងពីរ ថាជាជនសង្ស័យ។
អ្នកនាំពាក្យបានបន្ថែមទៀតថា៖ «ហើយជនម្នាក់ទៀត ត្រូវបានឃាត់ខ្លួន នៅក្រុង ណាក់ខន ស៊ីធម្មារ៉ាត់ (Nakhon Si Thammarat - ដែលស្ថិតនៅភាគខាងត្បូង នៃប្រទេសថៃ)»។
លោក ពីយ៉ាប៉ាន មិនបានបញ្ជាក់ ឲ្យបានលំអិតជាងនេះ ពីអត្តសញ្ញាណរបស់ជនទាំងបីទេ តែបើតាមសារព័ត៌មានក្នុងស្រុក បានឲ្យដឹងថា ជនដែលត្រូវបានឃាត់ខ្លួននៅ ក្រុង ណាក់ខន ស៊ីធម្មារ៉ាត់ នោះ ជាមេដឹកនាំមួយរូប នៃក្រុមអាវក្រហម ស្និតនឹងអតីតនាយករដ្ឋមន្ត្រី ស៊ីណាវ៉ាត្រា (Shinawatra) ទាំងពីរនាក់បងប្អូន [...]
