ព្រះចៅអធិការវត្តភ្នំខ្ពស់ ត្រូវដកដំណែង ព្រោះចែកអំណោយដល់ជនរងគ្រោះ
តាមកិច្ចសម្ភាសជាមួយទស្សនាវដ្តីមនោរម្យ.អាំងហ្វូ ព្រះតេជគុណ ឃឹម សំអឿន បានសង្ឃដីកាថា ព្រះអង្គបានមកកាន់តំណែង ជាព្រះចៅអធិការនេះ ចាប់តាំងពីការកកើតវត្តនេះមកម្លះ។ ព្រះអង្គបន្តថា ដើមឡើយ វត្តនេះមានតែនេនពីរអង្គប៉ុណ្ណោះ ហើយព្រះអង្គក៏ត្រូវបានធម្មការខេត្ត និងប្រជាពលរដ្ឋ គាំទ្រក្នុងការគ្រប់គ្រង និងកសាងវត្តភ្នំខ្ពស់ តរៀងមកដល់ឆ្នាំ២០១៤នេះ។
បញ្ហាពាក់ព័ន្ធ នឹងការដកតំណែងជាចៅអធិការវត្តភ្នំខ្ពស់នេះ ព្រះអង្គបានបន្តថា ព្រះអង្គមិនដែលទទួលបានលិខិត ឬការណែនាំណាមួយ ពីមន្ទីរធម្មការស្រុក ក៏ដូចជាសាលាខេត្តបាត់ដំបងម្តងណាឡើយ។ ស្រាប់តែថ្ងៃទី១៩ ខែតុលានេះ មានកម្លាំងសមត្ថកិច្ចជាច្រើន ចាប់ពី៣០ ទៅ៤០ នាក់ក្នុងឯកសណ្ឋាន ស៊ីវិលផង ប៉ូលីសផង និងប៉េអ៊ឹមផង បាននាំគ្នាមកស្នាក់នៅក្នុងវត្ត [...]