កុមារីមានជំងឺចំលែក ព្រោះនាងមានសាច់«សាហាវ»?
ទំនងជាមន្ទីរពេទ្យគន្ធបុប្ផាអស់លទ្ធភាពក្នុងការព្យាបាល កុមារី សា ណាស់ អាយុ៣ឆ្នាំ ដែលមានជំងឺហើមភ្នែកនិងថ្ពាល់មួយចំហៀង ត្រូវបានបញ្ជូនក្នុងពេលនេះ ទៅព្យាបាលនៅមន្ទីរពេទ្យមិត្តភាព កម្ពុជា-រ៉ូស្សី ក្នុងក្ដីសង្ឃឹមថានឹងអាចជួយនាងតូចបាន។ បើតាមម្ដាយកុមារី បានឲ្យដឹងថា មន្ទីរពេទ្យគន្ធបុប្ផាបានលើកឡើងថា សាច់របស់កូនស្រីអ្នកស្រី មានលក្ខណៈកាចសាហាវណាស់ ហើយមន្ទីរពេទ្យជំនាញខាងកុមារនេះ គ្មានថ្នាំសំរាប់ព្យាបាលឲ្យជំងឺរបស់នាងនោះទេ។
អ្នកស្រី សុស ម៉ារី ត្រូវជាម្តាយកុមារី សា ណាស់ បាននិយាយរៀបរាប់ប្រាប់ទស្សនាវដ្តីមនោរម្យ.អាំងហ្វូថា កូនស្រីរបស់គាត់ដំបូងឡើយមិនដែលមានជំងឺអ្វីនោះទេ។ ប៉ុន្តែក្រោយពីនាងលេងជាមួយបងស្រីរបស់នាង ហើយបានត្រូវកំប៉ុងមួយធ្លាក់ចំសៀតផ្ការបស់នាងរួចមក [...]