អាដហុកថាការរំលោភសិទ្ធិពលករខ្មែរ កំពុងមានច្រើនទៀតនៅម៉ាឡេស៊ី
- ដោយ: ក. វិច្ចនី អត្ថបទ ៖ក. វិច្ចនី ([email protected]) - យកការណ៍៖ អ៊ុម វ៉ារី -ភ្នំពេញ ថ្ងៃទី ១៨ មករា ១០៥
- កែប្រែចុងក្រោយ: January 28, 2015
- ប្រធានបទ: សិទ្ធិពលករ
- អត្ថបទ: មានបញ្ហា?
- មតិ-យោបល់
-
សមាគមការពារសិទ្ធិមនុស្សក្នុងស្រុក ដ៏ចាស់វស្សាមួយឈ្មោះ អាដហុក បានចេញសេចក្តីប្រកាសមួយថា ការអនុវត្តគំរោង ស្តីពីការជួយពលករចំណាកស្រុកទៅក្រៅប្រទេស ដែលទទួលរងនូវការរំលោភបំពានសិទ្ធិ និងការជួញដូរកំលាំងពលកម្ម តាមបណ្តាប្រទេសនានា នៅលើពិភពលោក នៅមានចំណុចអរវិជ្ជមាននៅឡើយ ជាពិសេសសម្រាប់ពលករខ្មែរដែលចេញទៅធ្វើការ នៅក្នុងប្រទេសម៉ាឡេស៊ី។
សមាគមមួយនេះ បានរកឃើញបញ្ហាសេសសល់ នៅក្នុងប្រទេសម៉ាឡេស៊ី ចំនួន១៣០ករណី ដែលពលករជាជនជាតិខ្មែរ នៅមិនទាន់ទទួលបានយុត្តិធម៌ និងមិនអាចទទួលយកបាន។ ករណីនៃពលកររងគ្រោះទាំងនោះ រួមមាន ថៅកែនិងទីភ្នាក់ងារធ្វើទារុណកម្មលើរូបរាងកាយមានចំនួន ១៦ករណី ការបាត់ដំណឹង ២៩ករណី ការបាត់ខ្លួន ៦៣ករណី មិនបានទទួលប្រាក់បៀវត្សរ៍ ២២ករណី និងការបង្ខំបន្តអណត្តិ ១២ ករណី។
លោក ធុន សារ៉ាយ ប្រធានសមាគមអាដហុក បានថ្លែងនៅក្នុងសន្និសីទមួយ នាព្រឹកថ្ងៃទី ២៧ ខែមករានេះ ថាបញ្ហាដែលនៅសេសសល់ នៅប្រទេសម៉ាឡេស៊ី និងដែលមិនទាន់ បានដោះស្រាយរួច អាចមានចំនួនលើសពី១៣០ករណី ព្រោះថាសមាគមរបស់លោក មិនអាចមើលឃើញបញ្ហានៅក្នុងប្រទេសម៉ាឡេស៊ី គ្រប់ជ្រុងជ្រោយនោះទេ។
លោកបានបន្ថែមថា ពលករភាគច្រើនដែលទៅធ្វើការនៅប្រទេសម៉ាឡេស៊ី សុទ្ធតែស្របច្បាប់ ព្រោះពួកគេទៅតាមក្រុមហ៊ុន ដូច្នេះរដ្ឋាភិបាលគួតែធ្វើយ៉ាងណាជួយរកយុត្តិធម៌ និងចាត់វិធានការចំពោះបញ្ហាទាំងអស់នេះ ឲ្យបានឆាប់បំផុតឲ្យពួកគាត់ និងគ្រួសារពួកគាត់ផងដែរ។ ពលករមួយចំនួន បានបាត់ខ្លួនទៅជាច្រើនឆ្នាំ ហើយអ្នកខ្លះទៀតបាត់ដំណឹង ពី៤ទៅ៥ឆ្នាំ។ លោក ធុន សារ៉ាយ បានថ្លែងទៀតថា ករណីបាត់ដំណឹងនេះ ជាការប៉ះពាល់ដល់សិទ្ធិរបស់ពលករ ព្រោះពលករទៅធ្វើការ ថៅកែមិនអនុញ្ញាតឲ្យទូរស័ព្ទមកសួរសុខទុក្ខអ្នកផ្ទះនោះទេ ដូច្នេះវាការអនុវត្តផ្ទុយពីការគោរពសិទ្ធិមនុស្សធ្ងន់ណាស់។ លោកបានពន្យល់ថា សូម្បីតែអ្នកដែលជាប់ពន្ធនាគានៅកម្ពុជា បច្ចុប្បន្នក៍មានសិទ្ធិ ទូរស័ព្ទមកលេងអ្នកផ្ទះដែរ។ ប៉ុន្តែពលករខ្មែរនៅម៉ាឡេស៊ីវិញ ថៅកែបានធ្វើការគាបសង្កត់ ឃាត់ឃាំងមិនឲ្យទូរស័ព្ទមកផ្ទះ ហើយថែមទាំងធ្វើទារណកម្មលើរាងកាយ មិនបើកប្រាក់បៀវត្សរ៍ឲ្យពួកគេទៀតផង។
ប្រធានសមាគមដដែលនេះបានបញ្ជាក់ទៀតថា រដ្ឋាភិបាលកម្ពុជាបានធ្វើការផ្អាកបញ្ជូនពលករកម្ពុជា ទៅធ្វើការនៅប្រទេសម៉ាឡេស៊ីទៀតហើយ ប៉ុន្តែរដ្ឋាភិបាលមិនបានចាត់វិធានការ ក្នុងការឃ្លាំមើលក្នុងការអនុវត្តការផ្អាកនេះទេ។ ដូច្នេះហើយ បញ្ហានៅកើតមានចំពោះពលករ ពលការនីខ្មែរយើង។ នេះហើយជាកំហុសឆ្គងដ៍ធ្ងន់ធ្ងររបស់ រដ្ឋាភិបាលដែលបណ្តោយឲ្យក្រុមហ៊ុនបន្តបញ្ជូនពលករទៅជាបន្តបន្ទាប់ និងបង្ខំចិត្តពួកគេឲ្យនៅធ្វើការបន្តទៀត។
មិនមានប្រតិកម្មពីក្រសួងការងារ និងក្រសួងការបរទេសកម្ពុជានៅឡើយ ទៅលើការលើកឡើងរបស់សមាគមខាងលើ៕