កិច្ចចរចារត្រីភាគីរវាង ភាគីតំណាងកម្មករនិយោជិត តំណាងក្រុមហ៊ុនណាហ្គាវើល និងសាលារាជធានីភ្នំពេញ​មិន​ទទួល​បានលទ្ធផលជាវិជ្ជមាននោះទេ នៅក្នុងថ្ងៃនេះ។ ការចរចារត្រីភាគីនេះកើតឡើង​ បន្ទាប់ពីមានការឯកភាពគ្នា រវាងភាគី​ទាំងបី ទទួលយក«ការដោះស្រាយតាមរយៈតុចរចារ» ជំនួសឲ្យការធ្វើបាតុកម្ម។ បាតុកម្មដែលធ្វើឡើង ដោយបុគ្គលិក ណាហ្គាវើល​ច្រើនជាងមួយពាន់នាក់ ត្រូវបានបង្រ្កាបនិងឃាត់ខ្លួនចំនួន១៩នាក់ ពីសំណាក់សមត្ថកិច្ច​កាលពីថ្ងៃ​១៩​ខែមិថុនា​កន្លងទៅ តែត្រូបានដោះលែងមកវិញ​នៅល្ងាចថ្ងៃដដែល។

សណ្ឋាគារ មជ្ឈមណ្ឌលកំសាន្ដ ណាហ្គាវើល នៅមាត់ទន្លេនៃរាជធានីភ្នំពេញ។

អនុប្រធានសហជីពប្រចាំណាហ្គាវើលកញ្ញា ឈឹម ស៊ីថរ ថ្លែងថា៖ «កិច្ចប្រជុំនេះមិនបានទទួលលទ្ធផល ដូចការរំពឹងទុក​ដែលភាគីកម្មករនិយោកជិកចង់បាននោះទេ»។ កញ្ញាបន្ថែមថាក្រុមកម្មករនិយោជិក ត្រូវបានសាលារាជធានីភ្នំពេញ​ជុំរុញ​ឲ្យចូលបំរើការងារវិញ ដោយរង់ចាំការដោះស្រាយជាមួយក្រុមហ៊ុននៅពេលក្រោយ ខណៈពេលដែលគេ​មើលឃើញថា ភាគីទាំងពីរមិនអាចដោះស្រាយវិវាទការងារនេះ ជាមួយគ្នានាពេលកន្លងមក។ កញ្ញាបានបញ្ជាក់ថា ខាងភាគីបុគ្គលិក​នឹង​មិនចូលបំរើការងារវិញ ហើយក៏មិនបន្តធ្វើបាតុកម្មសារជាថ្មីដែរ ដោយរងចាំការពិភាក្សាជាមួយអង្គការជាដៃគូ និង​សហភាពការងារ។

លោក ឌឿ ដារ៉ូ ជាលេខាផ្ទាល់ ប្រធានស្តីទីសហព័ន្ធសហជីពវិស័យទេសចរណ៍សេវាកម្ពុជា (C.T.S.W.S.) បានលើក​ឡើង​ថា៖ «ការចរចារនេះមានស្ថានភាពតឹងតែង ដោយហេតុថា កម្មករនិយោជិកត្រូវបានជុំរុញឲ្យចូល បំរើការងារវិញ​ដោយ​គ្មានលក្ខខណ្ឌ»។ លោកបានបន្តថា សហព័ន្ធសហជីពនេះ ដែលមានសមាជិកច្រើនជាងប្រាំពីរម៉ឺននាក់ ដោយ​ឡែក​តែ​ក្នុងវិស័យទេសចរណ៍មួយមានជាងប្រាំពាន់ (៥០០០) នាក់នឹងបន្តធ្វើបាតុកម្ម​ ក្នុងករណីភាគីក្រុមហ៊ុន និងសាលា​រាជធានី​ភ្នំពេញមិនមានដំណោះស្រាយសមរម្យជូនកម្មករនិយោជិក។

ទាក់ទងបញ្ហានេះមនោរម្យព័ងអាំងហ្វូ មិនអាចសុំការបំភ្លឺពីលោក ឡុង ឌីម៉ង់ បានទេដោយលេខទូរស័ព្ទរបស់លោក​ ពុំ​មានអ្នកទទួល។ ទន្ទឹមនឹងនេះ មេធាវីរបស់ក្រុមហ៊ុនណាហ្គាវើល ក៏មិនអាចសុំការបំភ្លឺបានដែរ ដោយឆ្លើយថា កំពុងជាប់​ប្រជុំ និងចង់ឲ្យអ្នកយកព័ត៌មាន ទៅសម្ភាសផ្ទាល់ដល់កន្លែង។

សូមបញ្ជាក់ថា បាតុកម្មនេះទាមទារលក្ខខណ្ឌមួយចំនួន រួមមាន៖ ទីមួយនិងទីពីរ ទាមទារឱ្យក្រុមហ៊ុនទទួលយកបុគ្គលិក ដែលត្រូវបានបញ្ឈប់ ឲ្យចូលបម្រើការងារ នៅកន្លែងដើមវិញព្រមទាំងទូទាត់ប្រាក់រំលឹក។ ទីបី ទាមទារឱ្យក្រុមហ៊ុន​គោរព​ទៅតាមសេចក្ដីបង្គាប់ របស់ក្រុមប្រឹក្សាអាជ្ញាកណ្ដាល។ ទីបួន ទាមទារឱ្យក្រុមហ៊ុនផ្ដល់ប្រាក់ឈ្នួលទាបបំផុត ចំនួន​១៥០ដុល្លារ រួមទាំងកាំប្រាក់ម្ភៃភាគរយដល់បុគ្គលិកទាំងអស់។ ទីប្រាំផ្ដល់ប្រាក់រង្វាន់ចំនួនមួយខែ ដល់បុគ្គលិកទាំងអស់ ដែលកំពុងបម្រើការងារ នៅក្រុមហ៊ុនណាហ្គាវើលនេះ និងទីប្រាំមួយ សុំឱ្យក្រុមហ៊ុនពិចារណាពីវត្តមាន និងអត្តចរិត​នៃ​ថ្នាក់គ្រប់គ្រងសណ្ឋាគារ ហាប៊ីប៊ួរ រ៉េហាន (Habibur Rehman /EAM-Hotel)។ នាយកផ្នែក VIP លោក ហ្វានី យ៉ុង (Fanny Yong) និងនាយកធនធានមនុស្ស ផ្នែកទំនាក់ទំនងបុគ្គលិកឈ្មោះ ជេរ៉េម៊ី ជា (Jeremy chea) ដែលរងការចោទប្រកាន់ថា កំពុងបង្កបញ្ហាជាមួយបុគ្គលិក។

---------------------------------------------------------
ដោយៈ អ៊ុំ បូរី - ភ្នំពេញថ្ងៃទី២១ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ