បុគ្គលិកនៃវិទ្យុអាស៊ីសេរី ផ្សាយជាភាសាខ្មែរមួយចំនួន ក្រោយការលាឈប់ និងដល់កំណត់នៃកិច្ចសន្យា របស់​ខ្លួន មិន​ត្រូវ​បានអ្នកគ្រប់គ្រង នៃវិទ្យុមួយនេះ គិតអតីតភាពការងារ ដែលខំបំរើការ អស់ជាង១០ឆ្នាំ​នោះ​ឡើយ។ នេះបើតាមការ​អះអាង របស់ក្រុមបុគ្គលិកមួយចំនួន ដែលបានសម្ដែង ការមិនពេញចិត្តរបស់ខ្លួន ហើយ​គ្រោង​នឹង​ដាក់​ពាក្យបណ្ដឹង ប្រឆាំង​ថ្នាក់​ដឹកនាំវិទ្យុ ក្នុងពេលខាងមុខ។

ក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ អ្នកស្រី អ៊ុក សាវបូរី ដែលមានប្រវត្តការងារចាស់ទុំ ក្នុង​វិទ្យុ​អាស៊ីសេរី តាំងពីបើកដំណើរការរបស់វិទ្យុ ជាង១៧ឆ្នាំមកនោះ បានបើកកកាយ នូវភាពមិនប្រក្រតី​ក្នុង​វិទ្យុ​មួយ​នេះ​ថា ថ្នាក់ដឹកនាំ បានធ្វើបាបបុគ្គលិកចាស់ៗ តាមរយៈការគាបសង្កត់ ផ្នែកពេលវេលា ថវិការ និងទីកន្លែង ដែល​ត្រូវ​យកព័ត៌មានជាដើម។ អ្នកស្រីបន្ថែមថា «ឲ្យខ្ញុំចុះខេត្ត។ អ្វីដែលតវ៉ា គឺចុះខេត្តតាកែវ កំពត កែប ដែលបី​ខេត្ត​នេះ ឲ្យ១០០ដុល្លា ក្នុងមួយខែ (ប្រាក់​បេសកកម្ម)។ គ្រាន់តែទឹញទឹកសុទ្ធ ទូរស័ព្ទ និងអ៊ីធើណែត​មិន​គ្រាន់​ផង។ គេធ្វើបាបអញ្ចឹង ដែលនាំឲ្យពួកយើង​ដើរ​ចេញ។»

អ្នកស្រីបន្តថា ក្នុងវិទ្យុមួយនេះ ប្រហែលជាមិនមានបុគ្គលិកពេញសិទ្ធិទេ ព្រោះអ្នកស្រី និងមនុស្ស​មួយ​ចំនួន​ទៀត ដែល​ធ្វើការជាង១៧ឆ្នាំទៅហើយនោះ នៅតែជាបុគ្គលិកបណ្តែតនៅឡើយ។ អ្នកស្រីគ្រោង នឹង​ធ្វើ​ពាក្យ​បណ្តឹង នាពេលខាង​មុខ បើអ្នកគ្រប់គ្រងវិទ្យុអាស៊ីសេរី មិនគិតប្រាក់អតីតភាពការងារ ឲ្យនោះទេ។ អ្នកស្រី​បញ្ជាក់​ថា៖ «ខ្ញុំធ្វើការជា​បុគ្គលិក​អាស៊ី​សេរី ជិត១៧ឆ្នាំ។ តាំងពីឆ្នាំ១៩៩៨ មកទល់ពេលនេះ ខ្ញុំនៅតែជា​បុគ្គលិក​បណ្តែត។ (...) នេះហើយ ដែល​អាមេរិកាំង មិនគោរពច្បាប់ប្រទេសខ្មែរយើង។ បើគ្មាន​ដំណោះ​ស្រាយ ពី​អតីតភាព​ការងារទេ ខ្ញុំនឹងដាក់ពាក្យ​បណ្តឹង​តាម​ច្បាប់។»។

លើកឡើងប្រហែលគ្នានេះដែរ លោក អ៊ុំ សារិន អ្នកសារព័ត៌មានជើងចាស់ម្នាក់ទៀត នៃវិទ្យុអាស៊ីសេរី ក៏​បាន​បង្ហាញ​មុខ គាំទ្រនូវការទាមទារ ស្វែងរកប្រាក់អតីតភាពការងារ ពីវិទ្យុមួយនេះដែរ។ រូបលោកផ្ទាល់ ដែលទើប​នឹង​បញ្ចប់​​កិច្ចសន្យា​​ការងារ និងបានសម្រេចចិត្ត ដើចេញពីវិទ្យុអាស៊ីសេរី កាលពីថ្ងៃទី២៥ ខែមេសានេះ បាន​បញ្ជាក់​ប្រាប់​​ទស្សនាវដ្តី​មនោរម្យ.អាំងហ្វូ​ថា ក្រោយពីផ្លាស់ប្តូរ អ្នកគ្រប់គ្រងពីជនជាតិអាមេរិក មកជាខ្មែរ​អាមេរិក​កាំង ក្នុងឆ្នាំ២០០៩មក វិទ្យុដែល​ទទួល​ការ​ឧបត្ថម្ភ ពីសភាអាមេរិកមួយនេះ មានការុកគួនច្រើន ដែល​នាំ​ឲ្យ​បុគ្គលិក​ចាស់ៗ ពិបាកធ្វើការជាមួយ។

លោកបន្តថា ស្ថិតក្រោមការគ្រប់គ្រងរបស់លោក សំ ប៉ូលី (ប្រធាន) និងលោក ហួត វុទ្ធី ឬ ជុន ចាន់បុត្រ (អនុ​ប្រធាន) ដែលប្រចាំការនៅសហរដ្ឋអាមេរិក រាល់ព័ត៌មានទាំងអស់ ហាក់ដូចជាមានភាពលំអៀង មិនមាន​ភាព​ឯករាជ្យ និងងាក​រេ​ទៅ​រកគណបក្សនយោបាយ។ ឯបរិយាកាសការងារ មិនទូលំទូលាយ ដូចជំនាន់គ្រប់គ្រង ដោយ​ជនជាតិ​អាមេរិកាំង​​ឡើយ។

លោកបានបន្ថែមថា សម្រាប់លោកផ្ទាល់ខ្លួន ត្រូវបានគេបង្ខំឲ្យចុះ ទៅធ្វើការនៅខេត្ត ព្រមទាំងកាត់​ប្រាក់ខែ​ថែម​ទៀត និងបង្ខំឲ្យធ្វើការ ក្នុងមួយថ្ងៃ១២ម៉ោង។ គ្រប់គ្រងដោយមិនគោរពច្បាប់ខ្មែរ។ លោកបន្តថា កត្តា​ទាំង​នេះហើយ ដែល​ធ្វើ​ឲ្យលោក មានការមិនពេញចិត្ត នឹងវិទ្យុអាស៊ីសេរី។ លោក បានថ្លែងទៀតថា៖ «គេរកវិធី​ធ្វើ​បាបយើង យើងធ្វើអ្វី ក៏មិន​ត្រូវ​ចិត្តគេ។ (...) អ្នកគ្រប់គ្រង គេមិនពេញចិត្តនឹងយើង គេរករឿងយើង គ្រប់បែប​គ្រប់​យ៉ាង ធ្វើអ្វីក៏មិនត្រូវ ខុសរហូត។»

លោកបញ្ជាក់យ៉ាងមុតមាំថា លោកនឹងស្វែងរកអ្នកច្បាប់ ដើម្បីធ្វើការតវ៉ា និងទាមទារឿងប្រាក់​អតីតភាព​ការងារ​នេះ។

ដោយឡែកលោក អាន ស៊ីថាវ និងអ្នកស្រី ទេព សុរ៉ាវី លោក វ៉ាន់ វាចារ លោក មុំ សុផុន វិញ ដែលបាន​ដើរ​ចេញ ពី​វិទ្យុ​អាស៊ី​សេរី​នេះ​ដូចអ្នកខាងលើ បានបញ្ជាក់ពីមូលហេតុថា ដោយសារបញ្ហា តម្រូវការផ្ទាល់ខ្លួន​នៃ​គ្រួសារ ព្រោះចង់ផ្លាស់ប្តូរ នូវបទពិសោធការងារជាដើម។ យ៉ាងណា ពួកគាត់បានលើកឡើងថា មិន​មាន​គំនាប ផ្នែកការងារ​ណាឡើយ ពីថ្នាក់​ដឹកនាំ​នៃវិទ្យុអាស៊ីសេរីនោះទេ។

អ្នកស្រី ទេព សុរ៉ាវី បានលើកឡើងថា អ្នកស្រីបានសុំលាឈប់ ពីការងារមុនការចប់ កិច្ចសន្យាការងារ (ចប់​ខែ៩)។ អ្នកស្រីដែល​ទើប​បំរើការងារ នៅក្នុងវិទ្យុអាស៊ីសេរី បានជាងពីរឆ្នាំនេះ បានថ្លែងឡើងថា ពិតជាបញ្ហា​ផ្ទៃក្នុងមួយចំនួន ដែលកំពុងកើត​មាន នៅក្នុងស្ថាប័នផ្សព្វផ្សាយ របស់អាមេរិកមួយនេះមែន។ តែអ្នកស្រី សុំមិន​ធ្វើការអត្ថាធិបាយឡើយ ព្រោះជាកិច្ចការ​ផ្ទៃក្នុង​ស្ថាប័ន។ ឯការលាឈប់ ពីការងាររបស់អ្នកស្រី ក៏ព្រោះតែ​អ្នកស្រី​ចង់ចូលរួម និងមកធ្វើការ នៅក្នុងទូរទស្សន៍ វិញម្តង​ប៉ុណ្ណោះ។ ក្នុងកិច្ចបំរើការ នៃវិទ្យុអាស៊ីសេរីនេះ ដែល​​ទើប​តែ​បាន​ជាង​បីឆ្នាំនោះ អ្នកស្រីបានបន្តថា៖ «ជាបុគ្គលិកជួល ខ្ញុំ​គ្មាន​អតីតភាពការងារទេ។ ពេល​ចេញ​មក​​នេះ បាន​តែ​ប្រាក់​ខែ​ចុង​ក្រោយ​ទេ អ្វីៗដែលតាមច្បាប់នៅស្រុកខ្មែរ គឹគ្មានអ្វី​ទាំង​អស់។»។

សម្រាប់លោក អាន ស៊ីថាវ វិញ ការចាកចេញពីវិទ្យុអាស៊ីសេរី មិនមានរឿងអ្វី ដែលធ្ងន់ធ្ងរឡើយ។ រីឯការ​ថ្នាំង​ថ្នាក់​ក្នុង​ន័យ​ការងារ ក៏វាមិនជៀស​ផុត​នោះ​ដែរ។ តែអ្វីដែលលោកចង់បាន គឺការផ្លាស់ប្តូរ​បទ​ពិសោធន៍ការងារ ពីទស្សនាវដ្តី មកវិទ្យុ និងមកទូរទស្សន៍ជាដើម។ លោកថា លោកចង់រៀន អ្វីដែលថ្មី​ពីទូរទស្សន៍ ហើយវាជា​ការ​សម្រេច​ចិត្ត របស់លោកផ្ទាល់។

ចំណែកលោក មុំ សុផុន ដែលបានបម្រើការ ក្នុងវិទ្យុអាស៊ីសេរី អស់រយៈពេល៧ឆ្នាំនោះ បានថ្លែងឡើងថា ហេតុផល​​នៃ​ការចាកចេញ​​របស់លោក គឺកើតឡើង​ពីបញ្ហាផ្ទាល់ខ្លួន ជាមួយនឹងការលា​ឈប់​ត្រឹមត្រូវ​តាម​ច្បាប់។ លោកមិនទទួលបាន នូវអតីតភាពការងារនោះទេ ហើយក៏មិនធ្វើការ​ទាមទារ​អ្វីដែរ ព្រោះនេះ ជា​មនោ​សញ្ចេតនា​ផ្ទាល់​របស់​លោក។

ទស្សនាវដ្ដីមនោរម្យ.អាំងហ្វូ កំពុងសុំការស្រាយបំភ្លឺ ពីថ្នាក់ដឹកនាំវិទ្យុអាស៊ីសេរី ផ្នែកខេមរភាសា ហើយ​នឹង​ធ្វើការ​ចុះ​​ផ្សាយ នៅក្នុងអត្ថបទក្រោយ​របស់ខ្លួន នៅពេលមានការឆ្លើយតប។

បុគ្គលិកនៅក្នុងប្រទេសកម្ពុជា ដែលបានលាឈប់ ពីវិទ្យុអាស៊ីសេរីរួមមាន លោក សុខ សេរី, អ្នកស្រី គឹម ពៅសុតន់, លោក អ៊ុំ សារិន, លោក មុំ សុផុន, លោក វោហារ ជាតិ, លោក អាន ស៊ីថាវ, អ្នកស្រី ទេព សុរ៉ាវី និង​លោក វ៉ាន់ វាចារ។ ​រីឯ​អ្នកស្រី អ៊ុក សាវបូរី នៅមិនទាន់លាឈប់ជាផ្លូវការ ពីវិទ្យុអាស៊ីសេរី​នេះ​នៅ​ឡើយ៕