ការចុះបង្ក្រាបមួយ បានកើតឡើង បន្ទាប់ពីនគរបាលព្រហ្មទណ្ឌ នៃអធិការដ្ឋាននគរបាលខណ្ឌច្បារអំពៅ បានដាក់លិខិត ស្នើរទៅព្រះរាជអាជ្ញា អមសាលាដំបូងរាជធានីភ្នំពេញ ដើម្បីសុំឆែកឆេរ កន្លែងរកស៊ីមួយកន្លែង ដែលសង្ស័យថា មាន​ល្បែង​ខុសច្បាប់ បង្កឲ្យមាន ការពង្វក់អារម្មណ៍យុវជន ជាច្រើនាក់ ជារៀងរាល់ថ្ងៃ។ ក្នុងការចុះបង្កា្របនេះ កម្លាំង​នគរបាល​ខណ្ឌ បានធ្វើការដកហូត ទូហ្គេម២គ្រឿង ម៉ូតូ២គ្រឿង និងឃាត់ខ្លួន ក្រុមយុវជនអ្នកលេងហ្គេម ១០នាក់ ក្នុង​នោះ​មាន​ស្រី៣នាក់ ប្រុស៧នាក់ ដែលសុទ្ធតែមានអាយុប្រមាណ ជាជាង២០ឆ្នាំ។

អធិការងខណ្ឌច្បារអំពៅ លោក ម៉ៅ សឿត បានឲ្យទស្សនាវដ្តីមនោរម្យ.អាំងហ្វូដឹងថា កម្លាំងនគរបាល​កម្រិត​ស្រាល​របស់​លោក បានចុះធ្វើការឆែកឆេរ ហាងហ្គេមខុសច្បាប់មួយនេះ កាលពីវេលាម៉ោង១២ និង៤៥នាទី និងបញ្ចប់ នៅម៉ោង១ និង​៣០នាទី រសៀលថ្ងៃទី២៩ ខែមេសា ឆ្នាំ២០១៥ ដែលមានទីតាំង នៅភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ​រាជធានី​ភ្នំពេញ ក្រោយពីបានទទួល ការអនុញ្ញាតពីព្រះរាជអាជ្ញា អមសាលាដំបូងភ្លាម។

តែអ្វីដែលលោកអធិការង មិនយល់នោះ គឺនគរបាលប៉ុស្តិ៍ច្បារអំពៅ មិនបានចូលរួមសហការ ក្នុងការអនុវត្តន៍ការងារ​នេះ​ទេ ហើយលោកមិនបានដឹង ពីមូលហេតុ ដែលអវត្តមានមន្ត្រីសមត្ថកិច្ច ក្នុងមូលដ្ឋាននេះដែរ។ មិនអាចសុំការបក​ស្រាយ​បាន​ទេ ពីមេប៉ុស្តិ៍ច្បារអំពៅក្នុងពេលភ្លាមៗ ពីការលើកឡើងខាងលើ។

បច្ចុប្បន្ន វត្ថុតាង ត្រូវបានប្រមូលទុក ហើយក្រុមអ្នកលេងហ្គេម ទាំង១១នាក់ ត្រូវបានឃុំខ្លួន ជាបណ្តោះអាសន្ន នៅ​អធិការដ្ឋាន​នគរបាល ខណ្ឌច្បារអំពៅ ដែលសមត្ថកិច្ច កំពុងកសាងសុំនុំរឿង បញ្ជូនទៅតុលាការ។ លោក ម៉ៅ សឿត បាន​បញ្ជាក់ឲ្យដឹងទៀតថា ម្ចាស់ដែលបើកទីតាំងហ្គេម (បាញ់ត្រី) ខាងលើ មានឈ្មោះ ហួរ អាយុប្រមាណ ៣៥ឆ្នាំ រស់​នៅ​បើកអាជីវកម្ម ក្នុងភូមិសង្កាត់ខាងលើ ជារៀងរាល់ថ្ងៃ ដោយគ្មានច្បាប់អនុញ្ញាត ត្រឹមត្រូវ៕