ក្រោយពីសវនាការមានការរិតត្បិត ក្នុងការសួរ និងផ្តល់ចម្លើយ កាលពីថ្ងៃកន្លងមក សាលាដំបូងរាជធានីភ្នំពេញ បានបន្តបើកសវនាការករណី ជនជាប់ឃុំ ២៣នាក់ នៅក្នុងហេតុការណ៍ប៉ះទង្គិចគ្នា រវាងកម្មករនិងសមត្ថកិច្ច នៅ​មុខរោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង ដែលបានបែងចែកចេញជាពីរបន្ទប់ នៅថ្ងៃ​នេះបន្តទៀត។ បទយកការណ៍ខាងក្រោមនេះ ជាភាពលំអិតមួយចំនួន ស្ដីពីសសវនាកាកាត់ទោស ទៅលើជនទាំង​២៣នាក់ ដែលបើទោះខ្លួននៅមិនទាន់តុលាការសម្រេចថា មានទោសនោះក៏ដោយ តែបានជាប់ទោសក្នុងពន្ធនាគារ ជិត៥ខែមក​ហើយ។

អាគារសាលាដំបូងរាជធានីភ្នំពេញ ក្នុងទីតាំងថ្មី។ (រូបថត ឯកសារ)

ប្រព័ន្ធយុត្តិធម៌ - ក្រោយពីសវនាការអស់រយៈពេល៧ម៉ោង លោកចៅក្រមជម្រះ លោក កែវ មុន្នី បានប្រកាសថា សវនការនេះ នឹងបន្តសួរដេញដោលនៅថ្ងៃនេះ ម៉ោង ៨ ព្រឹកដោយសារតែបញ្ហាពេលវេលា។

នៅក្នុងបន្ទប់សវនាការទីមួយ ជំនុំជម្រះលើករណីជនជាប់ចោទចំនួន ១០នាក់ ដែលចាប់ខ្លួននៅមុខ​រោងចក្រ​យ៉ាកជីង ត្រូវបានព្រះរាជអាជ្ញា និង មេធាវីជនសង្ស័យបានជជែកគ្នាយ៉ាងតឹងសសៃរក បន្ទាប់ពីក្រឡាបញ្ជីរ​បាន​អានវត្តមានសាក្សី ប៉ុន្តែអវត្តមានរបស់សាក្សីដាក់បន្ទុក ដែលជាមន្ត្រីសមត្ថកិច្ច ដែលមេធាវីជនសង្ស័យ​ទាមទារមិន​ឲ្យអានចម្លើយ និងពិចារណានៅក្នុងដំណាក់កាលចៅក្រមស៊ើបសួរ។

នៅក្នុងបន្ទប់សវការទីមួយនោះ ដែលបានកំពុងដំណើរការសាកសួរជនជាប់ចោទមួយរូបមុនគេ ឈ្មោះ សុគន្ធ សម្បត្តិពិសិដ្ឋ អាយុ ៣១ឆ្នាំ ដែលជាមន្ត្រីចងក្រងនៃអង្គការក្លារីនេះ ត្រូវបានចំណាយពេលមួយព្រឹក ហើយត្រូវ​បាន​លោក ចៅក្រម លោក កែវ មុន្នី បានព្រមាន ទៅលើយុវជនរូបនោះថា នឹងមិនបន្តសួរដេញដោលទៀតទេ​ប្រសិន​បើ​ចម្លើយឆ្លើយមកអសុរស។ លោកចៅក្រម បាននិយាយព្រមានថា ៖«ខ្ញុំស្នើឲ្យជនជាប់ចោទសម្រួលអារម្មណ៍ ជៀស​វាងការឆ្លើយទាំងអារម្មណ៍ក្រេវក្រោធ នៅក្នុងសវនការ បើមិនដូច្នេះទេខ្ញុំនឹងបញ្ចប់ការសួរដេញដោល»។

លោក សុគន្ធ សម្បត្តិពិសិទ្ធិ បាននិយាយខ្លាំងៗ ទាំងអារម្មណ៍ខឹងសម្បានៅក្នុងអង្គសវនាការថា លោកត្រូវបាន​កម្លាំង​សមត្ថកិច្ចទាហានបានចាប់វាយពីក្នុងរោងចក្រយ៉ាកជីង រហូតទៅដល់កន្លែងកត់កំណត់ហេតុ ហើយ​ប្រសិន​បើពុំមានមន្ត្រីប៉េអឹមហាមទេនោះ លោកប្រហែលជាស្លាប់បាត់ទៅហើយ។ លោកបានថ្លែងឲ្យដឹងថា ៖ «នៅពេលខ្ញុំ​ត្រូវសមត្ថកិច្ចចាប់វាយដុំយើងដូចឆ្កែ អូសចេញពីរោងចក្រយ៉ាកជីងនោះ ទៅដល់មានទាហានហ្នឹងធំក្លិនស្រា ហើយ​មើលមុខដូចចង់ស៊ីសាច់មនុស្ស ខ្ញុំគិតខ្លួនឯងថាប្រហែលជាអូសទៅឲ្យក្រពើស៊ីហើយ»។

លោកតាដំបងគ្រញូង ...

ចំណែកឯលោក លោក ចាន់ ពុទ្ធិស័ក្តិ សកម្មជាដីធ្លីបឹងកក់ បានថ្លែងឲ្យដឹងថា លោកស្រេកឃ្លាននូវយុត្តិធម៌ ពីព្រោះ​កំលាំងទាហាន៩១១វាយលោក ហើយបែរជាចាប់ពួកលោកជាជនរងគ្រោះ យកទៅដាក់ចោលនៅឯងត្រពាំងផ្លុង។ នៅថ្ងៃកើតហេតុនោះ នៅពេលលោកកំពុងនិយាយទៅកម្មករកុំប្រើហឹង្សា ស្រាប់តែលោកដើរត្រូវបានកំលាំងទាហាន ប្រមាណ១០នាក់​ មកចាប់វាយលោកតែម្តង។ លោកបានថ្លែងថា៖ «ខ្ញុំស្បថខ្ញុំនិយាយពាក្យពិត ដើម្បីរកយុត្តិធម៌​ដល់​រូបខ្ញុំ ទាហានជាអ្នកវាយខ្ញុំ ខ្ញុំសុំឲ្យអ្នកតាដំបងក្រញូងវាយខ្ញុំបំបាក់កខ្ញុំ បើខ្ញុំនិយាយមិនពិត ប៉ុន្តែប្រសិនតុលាការ​កាត់ទោសមិនយុត្តិធម៌ ខ្ញុំសុំឲ្យអ្នកតាដំបងក្រញូងវាយកំបាក់កដូចខ្ញុំ»។

មិនខុសគ្នាប៉ុន្មាន លោក ថេង សាវឿន មន្ត្រីសម្របសម្រួលសហព័ន្ធសហគមន៍កសិករកម្ពុជា ដែលត្រូវបានរងរបួស​ដោយការបង្ក្រាបរបស់កំលាំងទាហានឆ័ត្រយោង បានថ្លែងនៅក្នុងសវនាការថា នៅក្នុងថ្ងៃនោះ លោកគ្រាន់តែ​ទៅ​ថតរូបប៉ុណ្ណោះ ហើយក្រោយពេលដែលលោកឃើញសមត្ថកិច្ច វាយលោក វ៉ន ពៅ លោកក៏បានលុតជង្គង់​អង្វរកគេ​កុំឲ្យវាយ បែរជាត្រូវគេចាប់ខ្លួនទៅវិញ។ លោកបានថ្លែងថា៖ «ខ្ញុំឃើញសមត្ថកិច្ចជាច្រើនអ្នកវាយបងពៅ។ ខ្ញុំឈប់​ថត ហើយលុតជង្គង់អង្វរទាហានទាំងនោះ ស្រាប់តែមកវាយខ្ញុំ នឹងចាប់ខ្លួនខ្ញុំតែម្តង»។

ទាហានបាញ់ជំពាមកៅស៊ូ ...

លោកបានថ្លែងថា ចាប់តាំងពីថ្ងៃចាប់ខ្លួនរហូតមកដល់ថ្ងៃនេះ ខាងទាហានពុំបានប្រាប់លោកថា តើលោកត្រូវចាប់​ខ្លួន​ដោយសាររឿងអីនោះទេ ហើយនៅថ្ងៃនោះ លោកបានឃើញពួកទាហានរត់វាយមនុស្សមិនរើសមុខ ហើយខ្លះ​បានបាញ់ជំពាមកៅស៊ូទៀតផង។

ចំនែកឯលោក វ៉ន ពៅ ជាអ្នកដែលត្រូវបានសួរប្រមាណជា ៣០ នាទីចុងក្រោយគេ ហើយបានផ្អាកបន្តនៅ​ថ្ងៃនេះ​ទៀត បានថ្លែងឲ្យដឹងថា នៅក្នុងថ្ងៃនោះ លោកគ្រាន់តែឃ្លាំមើលកម្មករធ្វើការទាមទារ ១៦០ដុល្លារប៉ុណ្ណោះ ហើយ​លោកក៏បានស្រែកតាមឃោសនស័ព្ទ អង្វរកទាំងសមត្ថកិច្ច និងកម្មករ កុំឲ្យប្រើហឹង្សាលើខ្មែរគ្នាឯង។ លោកបាន​ថ្លែងឲ្យដឹងទៀតថា៖ «ខ្ញុំគ្រាន់តែអង្វរកគេ កុំប្រើហឹង្សាឲ្យសោះ បែរជាប្រើហឹង្សាវាយមកលើខ្ញុំស្ទើរបាត់បង់ជីវិត។ អ្នកវាយដំពួកខ្ញុំបែរក្លាយជាអ្នកប្តឹងខ្ញុំ ពីបទញុះញង់ និងប្រើហឹង្សាទៅវិញ។ ខ្ញុំអង្វរកទៅបងៗទាហានឆ័ត្រយោង ឈប់ប្រើហឹង្សារវាយលើពលរដ្ឋខ្មែរទៀត។»។

កុំសួរសំនួរដឹកមុខ ....

នៅខណៈ ដែលមេធាវីការពារក្តីឲ្យជនសង្ស័យ ទាមទារបង្ហាញភស្តុតាង ដូចជាបង្ហាញរូបភាព វីដេអូក្លីប រឺក៏និយាយ​ទាក់ទិនទៅនឹងកំលាំងសមត្ថកិច្ច វាយមកលើកម្មករត្រូវបានលោកព្រះរាជអាជ្ញា លី សុផាណ្ណា បានកាត់នឹងសំណូរ ដោយមិនអនុញ្ញាតិឲ្យសួរសំណូរដឹកមុខ បើទោះបីជាមេធាវីព្យាយាមសួរសំណួរមិនដឹកមុខក៏ដោយ។ លោក​បានថ្លែង​ថា៖ «ភស្តុតាងអាចបង្ហាញនៅពេលសន្និដ្ឋាន ហើយកុំសួរសំណួរដដែលៗ រឺដឹកមុខ ដើម្បីកុំឲ្យខាតពេលវេលា»។

លោក មេធាវី សំ សុគង់ ការពារក្តីឲ្យជនសង្ស័យបានថ្លែងឲ្យដឹងថា អ្វីដែលលោកសួរ និងចង់សុំបង្ហាញរូបភាព ព្រម​ទាំងវីដេអូក្លីប គឺលោកគ្រាន់តែចង់ដឹងអ្នកណាជាអ្នកបង្ករអំពើរហឹង្សារតែប៉ុណ្ណោះ។ លោកបានថ្លែងថា៖ «ការដែល​ដាក់​កំហិតឲ្យសួរនោះ គឺវាប៉ះពាល់សិទ្ធិរបស់ជនជាប់ចោទ»។

លោក អំ សំអាត មន្ត្រីស៊ើបអង្កេតជាន់ខ្ពស់អង្គការការពារសិទ្ធិមនុស្សលីកាដូ ដែលបានតាមដានសវនាការ​បាន​ថ្លែង​ឲ្យដឹងថា ការដំណើរការសវនាការនៅថ្ងៃនេះគឺនិតិវិធីដំណើរការ ប៉ុន្តែអ្វីដែលចម្លែកនោះទាក់ទងសិទ្ធិសេរីភាព របស់​ជនជាប់ចោទនិងមេធាវីហាក់ដូចជាកំរិតសិទ្ធិ ពីព្រោះនៅពេលណាដែលជនជាប់ចោទ រឺក៏មេធាវីសួររឺឆ្លើយទាក់ទិន​ទៅ​នឹងហឹង្សារ​ ដែលទាក់ទងសមត្ថកិច្ចត្រូវបានព្រះរាជអាជ្ញាបត់បែន និងមិនឲ្យសួរ ដោយលើកថាមិនទាក់ទង​និង​អង្គហេតុ តែបើមិនទាក់ទងនឹងទាហាន៩១១ទេ ក៏អ្នកទាំងអស់គ្នានោះជាប់ពន្ធនាគារដែរ។ លោកបានថ្លែងឲ្យដឹងថា ៖ «យើងសោកស្តាយចំពោះការព្រមានរបស់ចៅក្រម និងការហាមសួររបស់ព្រះរាជអាជ្ញា ដែលអាចធ្វើឲ្យប៉ះពាល់​ដល់យុត្តិធម៌ សម្រាប់ជនជាប់ចោទ»។

ក្រុមសន្តិសុខ រងរបួសម្ដង ...

នៅឯខាងក្រៅរបងតុលាការវិញ នៅខាងពហុកីឡាដ្ឋានអូឡាំពិក កងសន្តិសុខប្រមាណជា៤០០នាក់ ប្រដាប់​ដោយ​ដំបងឆក់ យាមកាមនៅទីនោះ ដោយបានដាក់ពង្រាយនៅខាងមុខសាលាដំបូង​រាជធានីភ្នំពេញ តាមបណ្តោយ​ផ្លូវ​ព្រះមុន្នីរ៉េត ត្រង់ស្តុបអាងទឹក និង ស្តុបវត្តព្រះពុទ្ធ ដោយមានរបាំង អមដោយរថយន្តពន្លត់អគ្គិភ័យ (ចាំបាញ់ទឹក) ចំនួនបីគ្រឿង។ ហើយនៅក្នុងការរារាំងនោះ កងកម្លាំងសន្តិសុខខណ្ឌនៅរាជធានីភ្នំពេញ៤នាក់ បានរងរបួសក្នុង​ហេតុការណ៍ ប៉ះទង្គិចជាមួយប្រជាពលរដ្ឋ ដែលតវ៉ាទាមទារឲ្យដោះលែងអ្នកទាំង២៣ ដោយសារកងកម្លាំងសន្តិសុខ​ចម្រុះ​មកពី​ខណ្ឌចំនួន៣ គឺខណ្ឌ៧មករា ដូនពេញ និងចំការមន បានព្យាយាមហាមព្រះសង្ឃ និងប្រជាពលរដ្ឋ​មិន​ឲ្យចូលតវ៉ា ក្នុងការទាមទារដោះលែងអ្នកទាំង២៣។

លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងជនជាប់ចោទទាំង ២២នាក់ ត្រូវ​បានអាជ្ញាធរចាប់ខ្លួនក្នុងហេតុការណ៍ប៉ះទង្គិចរវាងកម្មករ និងសមត្ថកិច្ច កាលពីថ្ងៃទី០២ និងទី០៣ ខែមករា នៅមុខ​រោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង នៅពេលដែលកម្មករធ្វើបាតុកម្មទាមទារ ដំឡើង​ប្រាក់ឈ្នួលកម្មករ ១៦០ដុល្លារក្នុងមួយខែ។ អ្នកទាំងអស់ត្រូវបានចោទប្រកាន់ពីបទញុះញង់ ឲ្យប្រព្រឹត្ត​អំពើបង្ក​ឲ្យ​មានភាពវឹកវរធ្ងន់ធ្ងរ ដល់សន្តិសុខសង្គម៕