ក្រុមស៊ាំស្ស៊ុងបានប្រកាសចេញនូវ ប្រភេទកាមេរ៉ាថ្មី ដែលអាចប្តូរកាណុងបានច្រើនប្រភេទ លើកដំបូងបង្អស់ ដែល​ដំណើរ​ការដោយប្រព័ន្ធអេនដ្រយ (Android) មានឈ្មោះថា «ហ្គាឡាក់ស៊ី អ៊ិនអ៊ិច» (Galaxy NX)។ ឧបករណ៏នេះ ជាជំនាន់​ក្រោយ​ថ្មីមួយទៀត បន្ទាប់ពី «ហ្គាឡាក់ស៊ី កាមេរ៉ា» (Galaxy Camera) ដែលនាំមកនូវទំហំធំជាងមុន និងកាណុងគ្រប់​បែប។

ហ្គាឡាក់ស៊ី អ៊ិនអ៊ិចនេះ នឹងធ្វើឲ្យអ្នកប្រើប្រាស់មានការជាប់ចិត្ត ជាមួយនឹងគុណភាពរូបភាពយ៉ាងច្បាស់ល្អ ជាមួយ​នឹង​ទំហំ ២០.៣មេហ្គាភិចស្ស៊ែល និងអាចថតជាវីឌីអូ បានទំហំ១០៨០ភិចស្ស៊ែល។

អ្វីដែលជាលក្ខណៈពិសេសដ៏អស្ចារ្យបំផុតរបស់វានោះ ជាមួយនឹង «ហ្គាឡាក់ស៊ី អ៊ិនអ៊ិច» អ្នកអាចប្រើប្រាស់​ប្រភេទ​កាណុងណាមួយដែលអ្នកពេញចិត្តបានយ៉ាងអស់ដៃ ដែលមានជាច្រើនប្រភេទឲ្យជ្រើសរើសដូចជា៖ pancake lenses, fish eye lenses, long primes និង zoom lenses។

លក្ខណៈសម្បត្តិរបស់កាមេរ៉ា «ហ្គាឡាក់ស៊ី អ៊ិនអ៊ិច» ពិសេសៗទៀត មានដូចជា៖
• កាមេរ៉ាទំហំ៖ ២០.៣មេហ្គាភិចស្យ៊ែល
• អេក្រង់ទំហំ៖ ៤.៨អ៊ីញ ប្រភេទ HD TFT LCD
• ប្រតិបត្តិការ៖ ប្រព័ន្ធអេនដ្រយ ៤.២.២ (Android 4.2.2)
• ម៉ាស៊ីនទំហំ៖ ១.៦ជីហ្គាអែក ប្រភេទ quad-core processor
• អង់ចងចាំ (RAM)៖ ២ជីហ្គាបៃ
• អាចផ្ទុកបាន៖ ១៦ជីហ្គាបៃ និងអាចបន្ថែមកាតបានដល់ ៦៤ជីហ្គាបៃ
• វិមាត្រ៖ ១៣៦.៥ X ១០១.២ X ២៥.៧មីលីម៉ែត្រ
• ទម្ងន់៖ ៤៩៥ក្រាម
• ថ្មមានកំរិតថាមពល៖ ៤៣៦០មីលីអំពែម៉ោង

ជាងនេះទៅទៀត កាមេរ៉ាស៊េរីទំនើបនេះ មានប្លូធូស ៤.០ (Bluetooth 4.0) និងមានប្រព័ន្ធវៃហ្វាយ (Wi-Fi a/b/g/n) ដែល​អាចភ្ជាប់អ៊ីនធើណែត និងភ្ជាប់ទៅនឹងទូរស័ព្ទដៃឆ្លាតវ៉ៃ បានយ៉ាងងាយស្រួលផងដែរ។ ប៉ុន្តែទោះជាយ៉ាងណា ក្រុមហ៊ុនពុំ​ទាន់បង្ហាញពីតម្លៃឲ្យដឹងនៅឡើយទេ៕

សូមទស្សនារូបភាពមួយចំនួនបន្ថែម ដូចខាងក្រោម៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២១ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ