ហ៊ុន សែន ឪបណ្ឌិត!
ដើម្បីបញ្ជាក់ថា លោកមានពូជពង្សវង្សត្រកូល ជាអ្នកចេះដឹងដ៏ខ្ពង់ខ្ពស់ លោក ហ៊ុន សែន នាយករដ្ឋមន្ត្រីកម្ពុជា តែងថ្លែងលើកឡើងជាច្រើនដង ពីសញ្ញាប័ត្របណ្ឌិត ដែលកូនរបស់លោកទទួលបាន។ នៅព្រឹកថ្ងៃព្រហស្បត្តិ៍នេះ នាយករដ្ឋមន្ត្រីកម្ពុជា ដែលមិនរង្គើខ្លួនពីតំណែង តាំងពីជាង៣ទសវត្សន៍មក បានឆ្លៀតឱកាស នៃការគម្រាមជាពាក្យសំដី ទៅកាន់អ្នកវិភាគនយោបាយ វ័យចំណាស់ម្នាក់ គឺលោកបណ្ឌិត មាស នី នោះ ដើម្បីតាំងខ្លួនលោក ជា«ឪបណ្ឌិត» ព្រោះលោកមានកូន ជាបណ្ឌិតយ៉ាងហោច២នាក់។
បុរសខ្លាំងកម្ពុជា បានថ្លែងដូច្នេះ នៅចំពោះនិស្សិតរាប់សិបនាក់ ក្នុងពិធីចែកសញ្ញាប័ត្រមួយ នៃសាកលវិទ្យាល័យជាតិគ្រប់គ្រង។ លោកបានលើកឡើងថា៖ «នែលោក មាស នី ខ្ញុំផ្តាំទៅលោក។ លោកឲ្យល្មមៗបានហើយ ខ្ញុំចេះដែរតើ ព្រោះខ្ញុំឪបណ្ឌិតដែរតើ ខ្ញុំមិនអួតខ្លួនឯងទេ ប៉ុន្តែកូនខ្ញុំវាមានបណ្ឌិត ហើយបណ្ឌិតហ្នឹងប្រហែលជាមិនអន់ [...]
