ហ៊ុន សែន ឲ្យស៊ើរើច្បាប់​ហាម សម រង្ស៊ី-កឹម សុខា ដឹកនាំ​គណបក្ស

បុរសខ្លាំងកម្ពុជា បានថ្លែងព្រមានជាថ្មី ថានឹងធ្វើ​វិសោធនកម្ម លើច្បាប់គណបក្សនយោបាយ​ ដើម្បី​​ខារខាំង​​ឥស្សរជន​នយោបាយ​​ណា ដែល​មាន​ទោស​ជាប់ខ្លួន មិនឲ្យឡើង មកដឹកនាំ​គណបក្ស។ ជាការ​ថ្លែង​ធ្ងន់ៗ ​ដែល​គេ​ដឹង​ថា ជា​ការ​សំដៅ​​ទៅ​រក​លោក សម រង្ស៊ី ជា​ប្រធាន​គណបក្ស​ប្រឆាំង ដែលកំពុង​ត្រូវ​និរទេស​ខ្លួន នៅឯ​បរទេស ចេញ​ពី​ការ​ផ្ដន្ទាទោស និង​លោក កឹម​ សុខា អនុប្រធាន (សព្វថ្ងៃជាប្រធានស្ដីទី) គណបក្ស​ប្រឆាំង ដែល​កន្លង​មក មាន​រឿង​ចម្រូង​ចម្រាស់ នៅឯ​តុលាការ​ដែរ​នោះ។
ហ៊ុន សែន ឲ្យស៊ើរើច្បាប់​ហាម សម រង្ស៊ី-កឹម សុខា ដឹកនាំ​គណបក្ស
លោក ហ៊ុន សែន នាយករដ្ឋមន្ត្រីកម្ពុជា។ (រូបថតលើហ្វេសប៊ុក)
Loading...
  • ដោយ: ដារា រិទ្ធ ([email protected]) - ភ្នំពេញ ថ្ងៃទី៣១ មករា ២០១៧
  • កែប្រែចុងក្រោយ: January 31, 2017
  • ប្រធានបទ: នយោបាយកម្ពុជា
  • អត្ថបទ: មានបញ្ហា?
  • មតិ-យោបល់

ល្បែងនយោបាយ របស់លោក ហ៊ុន សែន កំពុងបន្តមានទៅមុខ មិនចេះអស់។ នេះ បើតាមការអះអាង ដោយផ្ទាល់មាត់ ចេញពីបបូរមាត់​របស់លោក ហ៊ុន សែន នាយករដ្ឋមន្ត្រីកម្ពុជា តាមរយៈឧឃោសនស័ព្ទរដ្ឋសភា នៅក្នុងអង្គប្រជុំមួយ ដើម្បីដកតំណែងលោក កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ ចេញពី «ប្រធានក្រុមមតិភាគតិច» នៃរដ្ឋសភា កាលពីព្រឹកថ្ងៃអង្គារនេះ។

នាយករដ្ឋមន្ត្រីបីទសវត្សន៍ជាង របស់កម្ពុជា បានព្រមានជាថ្មីថា លោក​សំណូមពរ ឲ្យស្វែង​រក​នីតិវិធី​មួយ​ចំនួន​ ក្នុងការឈាន ទៅ​ធ្វើវិសោធនកម្មច្បាប់ ស្ដីពីគណបក្សនយោបាយ ដើម្បីខារខាំងបុគ្គល ជាអ្នកនយោបាយណាក៏ដោយ ដែលមានទោសជាប់ខ្លួន ឡើងមកដឹកនាំគណបក្ស។

ក្នុងកាយវិការ ដៃម្ខាងចង្អុលទៅមុខ និងដៃម្ខាងទៀតកាន់ទូរស័ព្ទ លោក ហ៊ុន សែន បាននិយាយឡើងថា៖ «ធ្វើវិសោធនកម្មច្បាប់ ស្ដីពីបក្សនយោបាយ ក៏ត្រូវតែធ្វើ។ វិសោធនកម្ម ៥០បូក១ ទេតើ។ ដាក់ថែម អ្នកដែលមានទោស អត់មានសិទ្ធិធ្វើគណបក្សនយោបាយ (...) ដើម្បីឲ្យវា​អស់​សិទ្ធិ​តែ​ម្ដងទៅ នៅលោកប្រធានៗ អីទៀត។ អ្នកមានទោស គឺអត់មានសិទ្ធិ ធ្វើប្រធាន អនុប្រធានបក្សនយោបាយ អញ្ចឹងតែម្ដងទៅ។»។

ការថ្លែងរបស់លោក ហ៊ុន សែន បើទោះជា​មិន​បានបញ្ចេញ​ឈ្មោះឲ្យចំ តែត្រូវបានគេរំពឹងថា លោកនាយករដ្ឋមន្ត្រី ចង់សំដៅទៅរក ប្រធាន និងអនុប្រធានគណបក្សសង្គ្រោះជាតិ ដែលសុទ្ធតែជាប់ពាក់ព័ន្ធ (ទោះក្នុងពេលនេះ ឬពេលមុន) ទៅនឹងក្ដីក្ដាំងជាច្រើន នៅឯតុលាការ។ នៅខណៈនេះ លោក សម រង្ស៊ី ប្រធាន​គណបក្ស​ប្រឆាំង​ធំ​ជាង​គេ នៅកម្ពុជា កំពុងរងបណ្ដឹង យ៉ាងហោចណាស់ ចំនួន៦ពាក្យបណ្ដឹង និងកំពុងត្រូវ​និរទេស​ខ្លួន​ នៅ​ឯ​បរទេស ដើម្បីគេស​ចេញពីការចាប់ខ្លួន របស់អាជ្ញាធរខ្មែរ ក្រោមសាលក្រមចូលជាស្ថាពរមួយ នៅក្នុង​សំនុំ​រឿង​បណ្ដឹង របស់​លោក ហោ ណាំហុង អតីតរដ្ឋមន្ត្រីការបរទេស។

ទាក់ទងនឹងករណីនិរទសខ្លួន របស់ប្រធានគណបក្សប្រឆាំងនេះ លោក ហ៊ុន សែន នៅបានថ្លែងព្រមានទៀតថា លោកនឹងបញ្ហា ឲ្យ«វ៉ៃខ្នោះ»ឲ្យទាល់តែបាន ប្រសិនណា ជាលោក សម រង្ស៊ី ត្រឡប់ចូលមកក្នុងប្រទេសវិញ។ បុរសខ្លាំងកម្ពុជា​បានថ្លែងថា៖ «ឥឡូវ ចូលមក! ចូលមក​ក្នុងស្រុកមក! តែសុំកុំភ្លេចណា វ៉ៃខ្នោះ គឺវ៉ៃទាល់តែបាន។ សូមបញ្ជាក់!»។

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...