បន្ទាប់ពីត្រូវបាន សម័យប្រជុំវិសមញ្ញ របស់រដ្ឋសភា កាលពីថ្ងៃពី១៩ ខែមីនា ឆ្នាំ២០១៥ គាំទ្រដោយសម្លេងឯកច្ឆន្ទ រួច​មក សេចក្តីព្រៀងសេចក្តីស្នើច្បាប់ ស្តីពីការរៀបចំ និងការប្រព្រឹត្តទៅ នៃ គ.ជ.ប និងច្បាប់ ស្តីពីការបោះឆ្នោត ជ្រើស​តាំង​តំណាង​រាស្ត្រ ត្រូវបានព្រឹទ្ធសភា អនុម័តជាផ្លូវការ នាព្រឹកថ្ងៃទី២៣ ខែមីនានេះ។

ការពិភាក្សា ការពិនិត្យ និងការអនុមត័ លើច្បាប់ទាំងពីខាងលើនេះ ដោយព្រឹទ្ធសភា នឹងដាក់ជូនទៅ ក្រុមប្រឹក្សា​ធម្មនុញ្ញ ក្នុងការពិនិត្យ ពីធម្មនុញ្ញភាពនៃច្បាប់ទាំងពីរ ឲ្យស្របតាមច្បាប់នានា ពិសេសច្បាប់រដ្ឋធម្មនុញ្ញ ដែលជាច្បាប់​កំពូល​របស់​ប្រទេស។ បន្ទាប់មក នឹងត្រូវដាក់ថ្វាយ ទៅអង្គព្រះមហាក្សត្រ ដើម្បីទ្រង់ឡាយព្រះហត្ថលេខា ដើម្បី​ដាក់​ឲ្យ​ប្រើ​ប្រាស់ ជា«ការប្រញាប់»។

សមសភាពព្រឹទ្ធសភា ដែលបានចូលរួមសម្រេចច្បាប់ទាំងពីរ នៅពេលនេះ មានសមាសភាព មកពីគណបក្ស​ប្រជាជន​កម្ពុជា លោក សាយ ឈុំ ជាប្រធានស្តីទីព្រឹទ្ធសភា និងមកពីគណបក្សសមរង្ស៊ី លោក ចេប គីមអ៊ាង លេខាធិការ​គណៈ​កម្មការទី១ តំណាងអោយលោក គង់ គាំ។ វត្តមានសមាជិកនៃព្រឹទ្ធភា បានចូលរួម មានចំនួន៤៩រូប។

សូមបញ្ជាក់ថា សេចក្តីព្រាង សេចក្តីស្នើច្បាប់ ស្តីពីការរៀបចំ និងការប្រព្រឹត្តទៅ នៃគណៈកម្មាធិការជាតិ រៀបចំការ​បោះឆ្នោត (គ.ជ.ប) មាន៧ជំពូក និង៦៦មាត្រា។ ឯសេចក្តីព្រាង សេចក្តីស្នើច្បាប់ ស្តីពីការបោះឆ្នោត ជ្រើសតាំង​តំណាង​រាស្ត្រ មាន១២ជំពូក និងមាន១៧១មាត្រា។ ច្បាប់ទាំងពីរនេះ ទទួលបានការគាំទ្រ យ៉ាងមុតមាំ ពីលោក សម រង្ស៊ី ប្រធាន​គណបក្សសង្គ្រោះជាតិ ដែលជាគណបក្សប្រឆាំង ពីលោក ហ៊ុន សែន នាយករដ្ឋមន្រ្តីកម្ពុជា និងពីលោក ហេង សំរិន ប្រធានរដ្ឋសភា ហើយត្រូវបានរដ្ឋសភា នៃប្រទេសកម្ពុជា ឯកភាពអនុម័តភ្លាមៗ បើទោះជា ការរិគន់ពី​ក្រុម​អង្គការ សង្គមស៊ីវិល មួយចំនួន នាពេលកន្លងមក ក៏ដោយ។

ក្រោយពីត្រូវបានរដ្ឋសភាអនុម័តភ្លាមៗ  លោក សម រង្ស៊ី មេដឹកនាំក្រុមប្រឆាំង ដែលបានស្នើដោយខ្លួនលោក មិនឲ្យ​មាន​ការដេញដោយ លើច្បាប់ទាំងពីរនោះ បានបង្ហាញពីការមិនពេញចិត្ត នូវចំណុចមួយចំនួន ក្នុងច្បាប់ទាំងពីរនេះ ដូច​សង្គមស៊ីវិលលើកឡើងដែរ ប៉ុន្តែខាងក្រុមប្រឆាំង របស់លោក ត្រូវធ្វើសម្បទានខ្លះ ទៅឲ្យគណបក្សកាន់អំណាច។ លោក​បានសរសេរ នៅក្នុងទំព័រហ្វេសប៊ុករបស់លោកថា៖ «វប្បធម៌សន្ទនា ធ្វើឲ្យប្រទេសជាតិរីកចម្រើន និងនាំមកនូវ​សេចក្តីសុខទាំងផ្លូវកាយ និងផ្លូវចិត្ត ជូនប្រជាពលរដ្ឋខ្មែរ»៕