មានពាក្យចចាមអារាមមួយចំនួន បានដឹងមុនថា ការរួមសហការគ្នារវាង ក្រុមហ៊ុនអេចធីស៊ី (HTC) របស់តៃវ៉ាន់ និងក្រុម​ហ៊ុនហ្វេសប៊ុក (Facebook) បានបង្កើតឡើងនូវប្រភេទទូរស័ព្ទដៃទំនើបថ្មីមួយ ឈ្មោះថា ទូរស័ព្ទដៃហ្វេសប៊ុក (Facebook Phone)។

រូបជំនួស។ រហូតមកទល់នឹងពេលនេះ គេនៅមិនទាន់ស្គាល់រូបរាងទូរស័ព្ទហ្វេសប៊ុក នោះយ៉ាងម៉េចនៅឡើយ។

ទូរស័ព្ទដៃទំនើបថ្មីនេះ ត្រូវបានគេដឹងថា មានប្រព័ន្ធប្រតិបត្តិការណ៏ គូកល អេនដ្រយ ៤.២ អូអេស (Google Android 4.2 OS)។ វាមានទំហំអេក្រង់ ៤.៣អ៊ីញ កាម៉ារ៉ាក្រោយមានទំហំ ៥ម៉េកាភិចស្យែល និងកាម៉ារ៉ាមុខមានទំហំ ១.៦ម៉េកា​ភិចសែល សំរាប់ហៅជាវីឌីអូ ហើយមានអង្គចងចាំ ១៦ជីកាបៃ។ វាមិនទាន់បានគេដឹងតម្លៃនៅឡើយទេ ប៉ុន្តែទូរស័ព្ទថ្មីនេះ បង្កើត​ឡើងមានទ្រង់ទ្រាយ និងសេវាកម្មរបស់ហ្វេសប៊ុក និងចង់ឲ្យមានអ្នកប្រើប្រាស់ហ្វេសប៊ុក នៅលើទូរស័ព្ទដៃឲ្យ​កាន់តែ​ច្រើន។

ទទឹមនឹងនោះ ក៏មានការចោទជាសំនួរថា តើការរួមសហការគ្នាជាលើកទី២ រវាងក្រុមហ៊ុនអេចធីស៊ី និងក្រុមហ៊ុនហ្វេសប៊ុក អាចទទួលបានជោគជ័យដែរទេ? ជាក់ស្តែងការសហការរវាងក្រុមហ៊ុនទាំង២ លើកដំបូងក្នុងឆ្នាំ២០១១ ដែលផលិត​ទូរស័ព្ទ​ដៃម៉ាក ឆាឆា (ChaCha) និងសាលសា (Salsa) ត្រូវបរាជ័យទាំងស្រុង បន្ទាប់ពីចេញលក់លើទីផ្សារបាន២ ឬ៣ខែ។

ដូចយើងធ្លាប់បានដឹងហើយ សព្វថ្ងៃមានអ្នកប្រើប្រាស់ហ្វេសប៊ុកប្រមាណជា ១ពាន់លាននាក់ នៅលើពិភពលោក ក្នុង​នោះ​មាន ៦៨០លាននាក់ ប្រើប្រាស់តាមទូរស័ព្ទដៃ។ ដោយសារតែមានអ្នកប្រើប្រាស់ តាមទូរស័ព្ទច្រើនលើសលប់ដូចនេះ ទើប​ក្រុមហ៊ុនទាំង២ បង្កើតទូរស័ព្ទដៃថ្មីនេះឡើង និងកាន់តែមានភាពងាយស្រួល ដល់អ្នកប្រើប្រាស់ និងចូលចិត្តលេង​ហ្វេសប៊ុក។

ទោះបីជាយ៉ាងណាក៏ដោយ ទូរស័ព្ទដៃទំនើបៗជាច្រើន ក្នុងពេលបច្ចុបន្ប ក៏មានភាពងាយស្រួល ក្នុងការភ្ជាប់ទៅ​កាន់​កម្មវិធីសង្គមហ្វេសប៊ុក ការដំឡើងកម្មវិធី និងអាចទាញយកកម្មវិធីបានយ៉ាងងាយដូចគ្នា ដូច្នេះតើអ្នកប្រើប្រាស់​ទាំងអស់​នោះ អាចចោលទូរស័ព្ទរបស់គេ បែរមកទិញ ទូរស័ព្ទដៃហ្វេសប៊ុក ឬមួយយ៉ាងណា?

មតិមួយចំនួនទៅលើទូរស័ព្ទដៃហ្វេសប៊ុកនេះ បានឲ្យដឹងថា វាជាការរំខានដល់ពេលវេលារបស់គេ ក្នុងការបង្ហាញនូវអ្វី​ដែលថ្មី នៅលើហ្វេសប៊ុក ដែលអាចប៉ះពាល់ដល់ម៉ោងធ្វើការ និងធ្វើជំនួញនានា។ ហើយពួកគេថែមទាំងនិយាយថា គេ​គ្រាន់តែប្រើប្រាស់ហ្វេសប៊ុក នៅលើទូរស័ព្ទដៃគេ វាគ្រប់គ្រាន់ណាស់ទៅហើយ មិនចាំបាច់ទៅទិញទូរស័ព្ទដៃ​ហ្វេសប៊ុក​អ្វីទៀតនោះទេ។

ប៉ុន្តែការលើកឡើងខាងលើនេះ គ្រាន់តែជាមតិដែលទូរស័ព្ទនេះ មិនទាន់ចេញជាផ្លូវការតែប៉ុណ្ណោះ អត្ថប្រយោជន៏ និង​លក្ខណៈសម្បត្តិរបស់វាយ៉ាងណានោះ យើងមិនទាន់ដឹងច្បាស់នៅឡើយទេ ដូច្នេះតើវាមានអ្វីប្លែក សំរាប់ទាក់ទាញ​ដល់​អ្នកប្រើប្រាស់នោះ សូមរង់ចាំទស្សនាការបង្ហាញជាផ្លូវការនៅថ្ងៃព្រហស្បតិ ទី០៤ខែមេសា ក្នុងរដ្ឋកាលីហ្វ័ញ៉ា (California) ខាងមុខ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០១ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ