គេហទំព័របណ្ដាញសង្គមធំជាងគេ ចាប់ផ្ដើមលប់ចេញបន្តិចម្ដងៗ ជម្រើសដែលសមាជិកទាំងឡាយ អាចលាក់ខ្លួនបាន​ពី​ការុកករក។ ជម្រើសលាក់ខ្លួន ឬព័ត៌មានរបស់សមាជិក ដែលមិនត្រូវគ្នាជាមួយប្រព័ន្ធរុករកថ្មីមួយ ដែលហ្វេសប៊ុកខ្លួន​ឯង ទើបនឹងដាក់ឲ្យដំណើរការ។

ហ្វេសប៊ុក និងជម្រើសសុវត្ថិភាពរបស់បណ្ដាញនេះ សម្រាប់អ្នកប្រើប្រាស់។ (រូបភាពកាត់ត)

ទីក្រុងប៉ារីស - សមាជិកហ្វេសប៊ុកទាំងឡាយ ដែលមានបំណងមិនចង់ឲ្យគេហទំព័រនេះ បង្ហាញថាខ្លួនមានវត្តមាន​ក្នុង​បណ្ដាញសង្គមនោះ នឹងលែងមានវាសនា អាចលាក់ខ្លួនបានតទៅទៀតហើយ។ បណ្ដាញសង្គមនឹងលប់ជម្រើសនេះ ជាស្ថាពរក្នុងពេលខាងមុខ ដែលនឹងសមាជិកក្នុងបណ្ដាញអាចកំណត់ពីពេលមុនថា ខ្លួនមិនចង់ឲ្យគេរកឃើញខ្លួន នៅ​ក្នុងការរុករកនៅលើគេហទំព័រ។ ជម្រើសកំណត់នេះត្រូវបានហ្វេសប៊ុក កែសម្រួលតាំងពីខែធ្នូមុនមកម្លេះ។

ដូច្នេះ ពីថ្ងៃនេះតទៅ គណនីនៃសមាជិកណាក៏ដោយ ក៏អាចត្រូវបានរកឃើញដោយ ការរុករកនៅលើហ្វេសប៊ុកនេះដែរ។ សម្រាប់អ្នកដែលបានជ្រើសរើស លាក់គណនីរបស់ខ្លួនកន្លងមកនោះ ហ្វេសប៊ុក នឹងផ្ញើរសេចក្ដីជូនដំណឺងបន្ដិចម្ដងៗ ដើម្បីប្រាប់ថា ជម្រើសនៃការលាក់ខ្លួននេះ នឹងលែងមានប្រយោជន៍តទៅទៀត។ ហ្វេសប៊ុក បានជម្រុញអ្នក​ប្រើប្រាស់​បណ្ដាញរបស់ខ្លួន ឲ្យចូលទៅលាក់ទិន្និន័យនានានៃគណនីខ្លួន ទៅតាមការកំណត់នៃ«ភាពឯកជន»នោះវិញ ជាពិសេស​ត្រូវប្រុងប្រយ័ត្ន ទៅនឹងការផ្សាយផ្សាយទាំងឡាយណា ដែលខ្លួនត្រូវដាក់ជាសាធារណៈ រវាងមិត្តភ័ក្រ ឬសម្រាប់តែ​ខ្លួន​ឯង។

ហ្វេសប៊ុក បានពន្យល់ទៀតថា ជម្រើសនេះមិនត្រូវបានដាក់បញ្ចូលក្នុងបណ្ដាញ នៅពេលដែលបណ្ដាញសង្គមនេះ ទើប​នឹងបង្កើតឡើងនោះទេ។ ម្យ៉ាងទៀត ទុកជម្រើសលាក់ខ្លួននេះឲ្យនៅដំណើរការ អាចបង្កជាបញ្ហាទៅដល់​អ្នកប្រើប្រាស់​មួយចំនួន រកមិនឃើញមិត្តភ័ក្រ ឬមនុស្សដែលគេចង់ស្វែងរក។

ការផ្លាស់ប្ដូររបស់ហ្វេសប៊ុក ក៏បានកើតឡើងចំពេលដែលបណ្ដាញសង្គមដ៏ធំដូចយក្ស កំពុងត្រៀមរៀបចំដាក់ឲ្យ​ដំណើរ​ការ នូវប្រព័ន្ធរុករកថ្មីមួយ ដែលមានឈ្មោះថា ហ្គ្រាហ្វ ស៊ើជ (Graph Search)។ ប្រព័ន្ធរុករកនេះ នឹងអនុញ្ញាតឲ្យ​អ្នក​ប្រើ​ប្រាស់គេហទំព័រ អាចរកឃើញសមាជិកណាម្នាក់ តាមរយៈរូបថតណាមួយដែលសមាជិកនោះចេញមុខ ឬតាមរយៈ​ទំព័រ​ណាមួយដែលសមាជិកនោះចូលចិត្ត ឬព្រឹត្តិការណ៍ណាមួយ ដែលសមាជិកនោះចូលរួម៕

-------------------------------------------------
ដោយ៖ ឈូករ័ត្ន - ​ ថ្ងៃទី១៣ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ