លិខិតបដិសេធ ដែលផ្ញើជូនលោកឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ នៅថ្ងៃទី២៩ ខែកក្កដា ឆ្នាំ២០១៧នេះ និងបានមកដល់ដៃអ្នកសារព័ត៌មាន នៅព្រឹកថ្ងៃទី៣០ ខែកក្កដា បានសរសេរថា៖ «ការិយាល័យចរាចរណ៍ផ្លូវគោករាជធានីភ្នំពេញ ពុំដែលមានប្រើប្រាស់បណ្ដាញព័ត៌មានសង្គម ឈ្មោះ ការិយាល័យនគរបាលចរាចរណ៍ផ្លូវគោក និងស្លាកសញ្ញាចរាចរណ៍ [ជារូបសញ្ញា] នោះទេ»។

ក្នុងលិខិត ដែលទទួល«បានឃើញ» ដោយលោកឧត្ដមសេនីយ៍ត្រី អ៊ុច សុខុន ស្នងការរងទទួលផែនសណ្ដាប់ធ្នាប់​នោះ លោកវរសេនីយ៍ ចេវ ហាក់ នាយការិយាល័យ​នគរបាល​ចរាចរណ៍ផ្លូវគោករាជធានី  បានសរសេរបន្តថា៖ «តាងនាមយើងខ្ញុំ ជាថ្នាក់ដឹកនាំ (...) សូមធ្វើការទាំងស្រុង នូវការចោទប្រកាន់របស់លោក ផែង វណ្ណៈ ដែលបានធ្វើសេចក្ដីថ្លែងការណ៍ តាមបណ្ដាញសង្គម ហើយបានចោទប្រកាន់មកលើរូបខ្ញុំបាទ (លោក ចេវ ហាក់) និងមន្ត្រីនគរបាលចរាចរណ៍ផ្លូវគោក ថាបានប្រើសំដីមិនសមរម្យលើរូបលោក និងក្រុមគ្រួសារ»។

នៅទីបញ្ចប់នៃលិខិតនោះ លោក ចេវ ហាក់ បានស្នើសុំឲ្យលោក ឆៃ ស៊ីណារិទ្ធ ផ្ដល់យុត្តិធម៌ដល់រូបលោក និងមន្ត្រីក្រោមបង្គាប់ដទៃទៀត ជុំវិញការចោទប្រកាន់របស់លោក ផែង វណ្ណៈ ដែលលោកអះអាងថា បានធ្វើឡើង ដោយ«គ្មានហេតុផល»។

កាលពីព្រឹកថ្ងៃទី ២៩ ខែកក្កដាម្សិលម៉ិញ លោក ផែង វណ្ណៈ មន្ត្រីក្រសួងមហាផ្ទៃមួយរូប បានសរសេរនៅគណនេយ្យហ្វេសប៊ុក «ផែង វណ្ណៈ» ដ៏ល្បីល្បាញរបស់លោក ស្នើទៅលោក នេត សាវឿន អគ្គស្នងការនគរបាលជាតិ សុំឲ្យមានការដកលោក ចេវ ហាក់ ចេញពីតំណែង​ប្រធានការិយាល័យនគរបាលចរាចរណ៍​ផ្លូវគោករាជធានី និងសុំឲ្យការិយាល័យនេះដដែល ចេញមុខសុំទោសកូនស្រីរបស់លោក ជុំវិញការសរសេររបស់ទំព័រហ្វេសប៊ុក​ ដាក់ឈ្មោះ «ការិយាល័យ​ចរាចរណ៍​​ផ្លូវគោក​ រាជធានីភ្នំពេញ» ដែលហៅកូនស្រីឈ្មោះ ផែង ពិសី ថាជាមនុស្ស«ជម្លើយ» និង«ញៀនថ្នាំ»។

ការបង្ហោះសាររបស់ទំព័រខាងលើ ត្រូវបានគេមើលឃើញថា បានធ្វើឡើង​តបទៅនឹង​ពាក្យសំដីអសុរស របស់លោក ផែង វណ្ណៈ ហៅភ្នាក់ងារនគរបាល​ចរាចរណ៍ ថាជា«មន្ត្រីថោកទាប» ដែលបាន​«លួច​ស្ទាក់​ដូច​ចោរ» ចង់​ឃាត់​រថយន្ដបើកបក ដោយកូនស្រីរបស់លោក បន្ទាប់ពីយុវតីរូបនេះ បានបើកបត់ឆ្វេង ល្មើស​«ផ្លាកសញ្ញាហាមបត់ឆ្វេង» កាលពីព្រឹកថ្ងៃទី២៧ ខែកក្កដាកន្លងមក៕

» អត្ថបទដែលទាក់ទង៖ ផែង វណ្ណៈ ស្នើ​ដក​តំណែង ចេវ ហាក់ ដើម្បី​ស្ដារ​កិត្តិយស​កូន​ស្រី

» ខ្លឹមសារទាំងស្រុង នៃលិខិតរបស់លោក ចេវ ហាក់ ប្រធានការិយាល័យនគរបាលចរាចរណ៍ផ្លូវគោករាជធានី៖