សំនុំរឿងវ៉ាលីយ៉េ៖ ចៅក្រមនឹងសាកសួរមនុស្សថ្មីម្នាក់ទៀត
ចៅក្រមស៊ើបអង្កេតនៅសាលាដំបូងខេត្តកំពង់ស្ពឺ ដែលបានចូលរួមស៊ើបអង្កេតឡើងវិញ ជាមួយភាគីបារាំង លោក ឆែម រិទ្ធី បាននិយាយប្រាប់ កាលពីថ្ងៃច័ន្ទទី០១ ខែមេសា ឆ្នាំ២០១៣ថា លោកមានផែនការទៅជួប និងសាកសួរប្អូនថ្លៃម្នាក់ទៀត ដែលត្រូវជាប្អូនថ្លៃរបស់ប្រពន្ធលោកវ៉ាលីយ៉េ ដែលកំពុងជាប់ពន្ធនាគារក្នុងខេត្តកំពង់ចាម។
មន្រ្តីតុលាការរូបនេះ មិនទាន់អាចបញ្ជាក់បាននៅឡើយទេ ពីការកំណត់កាលបរិច្ឆេទ ក្នុងការចុះទៅជួបជនសង្ស័យរូបនេះ ដែលលោកសាកសួរក្នុងនាមជាសាក្សី។
ទាក់ទងនឹងការវិវត្តពីលទ្ធផលថ្មី នៃការស៊ើបអង្កេតបន្ថែម របស់ភាគីចៅក្រមបារាំង លោក ឆែម រិទ្ធី នៅមិនទាន់បានទទួល នូវព័ត៌មានថ្មីណាមួយ ពីក្រុមបារាំងដែលបានចុះមកស្រុកខ្មែរ ដើម្បីធ្វើការស៊ើបអង្កេតករណីស្លាប់ របស់លោកវ៉ាលីយ៉េ ទៀតនៅឡើយ។
លោក បានថ្លែងថា «ខ្ញុំមានគម្រោងរបស់ខ្ញុំ គឺចុះទៅពន្ធនាគារខត្តកំពង់ចាម នៅថ្ងៃណាមួយដើម្បីជួបបុរស ដែលជាប្អូនថ្លៃរបស់ជនរងគ្រោះ»។
លោក ឆែម រិទ្ធី បានបន្ថែមទៀតថា លោក មិនទាន់បានស្គាល់ឈ្មោះ អត្តសញ្ញាណច្បាស់នៅឡើយ ពីប្អូនថ្លៃរបស់លោកវ៉ាលីយ៉េនោះ ប៉ុន្តែលោកគ្រាន់តែបានដឹងថា បុរសម្នាក់នេះបានជាប់ពន្ធនាគារ ពាក់ព័ន្ធនឹងបទល្មើសគ្រឿងញៀន។ លោក បានថ្លែងបន្តថា «ខ្ញុំនឹងទៅជួបគាត់ ដើម្បីធ្វើការសាកសួរ ក្នុងនាមគាត់ជាសាក្សីក្នុងករណីម្នាក់»។
សាកសពរបស់បុរសពោះម៉ាយវ៉ាលីយ៉េ និងកូនតូច៤នាក់របស់លោក ត្រូវបានគេរកឃើញក្នុងរយន្ត SUV ដែលលិចទឹកកាលពីថ្ងៃទី១៤ ខែមករា ឆ្នាំ២០១២ រយៈពេល៤ខែ ក្រោយពីពួកលោកត្រូវបានគេឃើញលើកចុងក្រោយ ពេលនៅមានជីវិត។
កាលពីចុងខែមុន សេចក្ដីថ្លែងប្រកាសព័ត៌មាន របស់ស្ថានទូតបារាំងប្រចាំនៅកម្ពុជា បានសម្រេចថា ការស្លាប់ជាអំពើឃាតកម្ម មិនមែនអត្តឃាតនោះទេ។ ក្នុងសេចក្តីប្រកាសព័ត៌មាន ដែលមានសរសេរជាបីភាសា គឺភាសាបារាំង អង់គ្លេស និងខេមរភាសានោះ លោកស្រី ក្លូឌីន អង់ហ៊្វូ ចៅក្រមស៊ើបសួរ ទទួលបន្ទុកស្រាវជ្រាវ ករណីនៃការស្លាប់របស់គ្រួសារលោក វ៉ាលីយ៉េ បានសរសេរថា ការផ្លាស់ប្តូរវត្ថុតាង និងនិតិវិធី ការស្រាវជ្រាវដ៏ស្រួចស្រាល់ របស់នគរបាលបច្ចេកទេស និងការសាកសួរជាច្រើន ធ្វើឲ្យការស្រាវជ្រាវមានការវិវត្តយ៉ាងខ្លាំង ដែលលទ្ធផលបង្ហាញថា ករណីនេះមិនមែនជាការធ្វើអត្តឃាតនោះឡើយ។
ក្រុមបច្ចេកទេសបារាំង ដែលមកពីក្រុងប៉ារីសដែលមាន នគរបាល និងចៅ៤ក្រម បានមកដល់កម្ពុជាកាលពីថ្ងៃ១០ ខែមិនាឆ្នាំ២០១៣។ នៅព្រឹកថ្ងៃទី១២ ខែមីនាឆ្នាំ២០១៣ ក្រុមអ្នកបច្ចេកទេសទាំងនេះ ក៏បានចុះមកត្រួតពិនិត្យផ្ទាល់ នៅក្នុងលំនៅដ្ឋានលោក វ៉ាលីយ៉េ ដែរ ហើយការស្រាវជ្រាវនឹងគ្រោងធ្វើ រយៈពេល២សប្តាហ៍។
» នគរបាលខ្មែរ នៅពេលរកឃើញ សាកសព នៅក្នុងរថយន្តមួយ ដែលត្រាំទឹកជិត៤ខែកន្លងមក៖
